Դուք կրկին բացառիկ հնարավորություն եք ստանում. Մարուքյանը՝ Թովմասյանին

Քաղաքական 13:35 20/03/2018 Հայաստան

Դուք կրկին բացառիկ հնարավորություն եք ստանում. Մարուքյանը՝ Թովմասյանին

«Պարոն Թովմասյանը մի յուրահատուկ հաջողության ու բախտի տեր մարդ է, ով երրորդ անգամ շանս է ստանում լրջագույն մի այնպիսի ինստիտուտ ղեկավարել, որը ՀՀ Սահմանադրական դատարանն է»,- այսօր ԱԺ-ում Սահմանադրական դատարանի նախագահի նշանակման հարցի քննարկման ժամանակ իր ելույթում հայտարարեց «Ելք» խմբակցության պատգամավոր Էդմոն Մարուքյանը։

Պատգամավորը հիշեցրեց, որ մինչ այս Հրայր Թովմասյանը աշխատել է Արդարադատության նախարարի ու ԱԺ-ում Պետական-իրավական և մարդու իրավունքների պաշտպանության հարցերի մշտական հանձնաժողովի նախագահի պաշտոնում և հնարավորություն է ունեցել բարեփոխումների։

«Ես հույս ունեմ, որ դուք երրորդ շանսը պետք է օգտագործեք և այնպիսի որոշումներ կայացնի ՍԴ-ն, որ մենք ասենք այս մարդը այդ հնարավորությունն օգտագործեց»,- նշեց պատգամավորը։

Նաև հավելեց, որ իրենց խմբակցությունը դեմ է քվեարկելու Թովմասյանին՝ ՍԴ նախագահ ընտրվելուն։

ՀՀԿ ղեկավար Վահրամ Բաղդասարյանն էլ իր ելույթում ասաց. «Ես ավելի քան համոզված եմ, այն բարեխղճությամբ, որ Հրայր Թովմասյանը կատարել է իր բոլոր աշխատանքները, թե նախարար եղած, թե հանձնաժողովի նախագահ եղած ժամանակ, նույն բարեխղճությամբ նա իր աշխատանքը կկատարի ՍԴ նախագահի պաշտոնում»։

Բաղդասարյանը հորդորեց բոլոր քաղաքական ուժերին՝ վեր կանգնել քաղաքական մանր շահերից և գնահատել անձին ու նրա մասնագիտական կարողությունները։

Ժամանակավոր հաշվիչ հանձնաժողովի նախագահ Գագիկ Մելիքյանը տեղեկացրեց, որ Սահմանադրական դատարանի նախագահի նշանակման քվեարկությունը կանցկացվի խորհրդարանի նիստերի դահլիճին հարակից նախասրահում, մարտի 21-ին, ժամը 10.30-ից մինչև 11.30-ը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: