Ձեր վստահելի աղբյուրը

«Միջազգային պայմանագրերի մասին նոր օրինագիծն ունի երկու ուղղություն՝ համապատասխանեցում Սահմանադրական փոփոխություններին և միջազգային պայմանագրերի կնքման ընթացակարգի բարելավում»,- այս մասին ԱԺ-ում Միջազգային պայմանագրերի մասին  և կից ներկայացված օրենքների նախագծերի փաթեթն առաջին ընթերցմամբ ընդունելու հարցի քննարկման ժամանակ ասաց Արտաքին գործերի փոխնախարար Շավարշ Քոչարյանը:

Փոխնախարարը հայտնեց, որ  ՀՀ նախագահի կողմից միջազգային պայմանագրերի հաստատումը, կասեցումը կամ դադարեցումը կարող է լինել միայն կառավարության առաջարկի հիման վրա:

«Սահմանվել է կարգավորում հանրաքվեի միջոցով վերպետական միջազգային կազմակերպություններին ՀՀ անդամակցության, ինչպես նաև ՀՀ տարածքի փոփոխությանը վերաբերող հարցերով միջազգային պայմանագրերի կնքման, վավերացման, կասեցման, փոփոխման համար: Երկրորդ հատվածով վերացվել է միջազգային պայմանագրերի միջպետական, միջկառավարական, միջգերատեսչական մակարդակների տարանջատումը, որը ելնում է նաև այն հանգամանքից, որ միջազգային իրավունքում որպես սուբյեկտ հանդես է գալիս ՀՀ՝ անկախ փաստաթղթի ստորագրման ձևից և այն ստորագրող մարմնից»,- ներկայացրեց Քոչարյանը։

Նրա խոսքով՝ միջազգային պայմանագիրը կառավարությանում քննարկման ներկայացվում է միայն ներպետական համաձայնեցումից հետո:

Փոխնախարարը հիշեցրեց, որ այսօրվա գործող կարգով, երբ կառավարությունը հավանություն է տալիս միջազգային պայմանագրի կնքմանը, ստացվում էր, որ գաղափարին է համաձայնություն տալիս, ոչ թե տեքստին: