Նորբերտո Բալեկյան. Հավաքականին միանալու որոշումս արագ էր

Սպորտ 15:16 20/03/2018 Հայաստան

Նորբերտո Բալեկյան. Հավաքականին միանալու որոշումս արագ էր

«Արագ որոշում էր, ընտանիքիս անդամների հետ խորհրդակցելուց հետո համաձայնությունս տվել եմ միանալ Հայաստանի հավաքականին»: Այս մասին հայտարարում է Հայաստանի ազգային հավաքականի նորեկ Նորբերտո Բալեկյանը ՀՖՖ պաշտոնական էջում հրապարակված տեսանյութում:

«Իմ ամբողջ ընտանիքն արմատներով սերտ կապված է Հայաստանի հետ»,-ասում է ֆուտբոլիստը:
Հայաստանի մասին նրան պատմել է պապիկը, ով մի քանի տարի առաջ եղել է Հայաստանում: Նորբերտո Բալեկյանը ծանոթ է հավաքականի խաղին, տեսանյութերն է դիտել:

Նա հուզված է օդանավակայանում երկրպագուների վերաբերմունքից, ասում է՝ ամեն բան անելու է, որպեսզի արդարացնի նրանց ջերմ վերաբերմունքն ու սպասումները:

«Ողջ ուժերս ներդնելու եմ Հայաստանի հավաքականի հետ հաջողությունների հասնելու համար, ահամբեր սպասում եմ մարզումներին»,-ասում է Բալեկյանը:

Հիշեցնենք, Արգենտինայի «Ատլետիկո Ուրական» ակումբում հանդես եկող Նորբերտո Բրիասկո Բալեկյանը հրավիրվել է Հայաստան՝ մասնակցելու Վազգեն Սարգսյանի անվան «Հանրապետական» մարզադաշտում մարտի 27-ին՝ ժամը 19:00-ին կայանալիք Հայաստան-Լիտվա ընկերական հանդիպմանը:

Նշենք, որ Ժոաո Ժորդի Մոնրո Արարատը չի մասնակցելու Հայաստանի ազգային հավաքականի նախապատրաստական հավաքին, քանի որ ակումբը, որտեղ հանդես է գալիս ֆուտբոլիստը, կարևոր հանդիպումներ պետք է անցկացնի ներքին առաջնությունում և ակումբի ղեկավարությունը խնդրել է Հայաստանի ֆուտբոլի ֆեդերացիային` թույլ տալ ֆուտբոլիստին չմասնակցել առաջիկա նախապատրաստական հավաքին:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: