Սերժ Սարգսյանի խոսքը վերաբերում էր նաև Փաշինյանին, Մարուքյանին. Կոստանյան
«Սերժ Սարգսյանի վերջին հարցազրույցի մեխն այն էր, որ երկրի նախագահը բոլորի նախագահն է, և երկրի նախագահը բոլոր երիտասարդների ներուժը օգտագործելու և երկրի բարօրությանն ուղղվելու տեսակետից քաղաքական պատկանելության կամ կողմնորոշման տարբերություններ չի դնում»,- Ազգային ժողովում լրագրողների հետ զրույցում այս մասին ասաց ԱԺ պետական-իրավական հարցերի և մարդու իրավունքների մշտական հանձնաժողովի նախագահ Գևորգ Կոստանյանն՝ անդրադառնալով ՀՀ նախագահ Սերժ Սարգսյանի հարցազրույցին։
«Այո, ես կարծում եմ, որ դա վերաբերում է նաև մեր հարգարժան գործընկերներ Նիկոլ Փաշինյանին, Էդմոն Մարուքյանին, Արտակ Զեյնալյանին և բոլորին, երկրի բարօրության համար պայքարող, երկրին նվիրված և հայրենասեր տղաների և աղջիկների ներուժը կիրառվելու է երկրի զարգացման համար»,- նշեց Կոստանյանը՝ շեշտելով, որ սա վերաբերում է բոլորին՝ անկախ քաղաքական կողմնորոշումից։
Լրագրողի հարցին, թե ինչու՞ է Սերժ Սարգսյանը ստանձնել առաջնորդներ ստեղծելու գործը, պատգամավորն ասաց. «Երկրի նախագահը, երկրի առաջնորդը, բացի երկիրը ղեկավարելուց, նաև այլ՝ չափազանց կարևոր գործառույթ ունի՝ սերնդի դաստիարակությունը և երկրի զարգացման շարունակականությունն ապահովելը։ Իհարկե, բա էլ ո՞վ պետք է նման կոչ աներ, ո՞վ պետք է առաջարկեր, որ հարգելի ժողովուրդ, ես իմ առաջ խնդիր չեմ դնում, որ միայն ՀՀԿ-ի երիտասարդները դառնան լիդեր, կամ այդ կուսակցության լիդերներն օգտագործվեն երկրի կառավարման մեջ: Այս խոսքով նախագահը փաստեց, որ բոլորի նախագահն է, բոլորի առաջնորդն է և յուրաքանչյուրի ներուժն օգտագործելու է երկրի բարօրության համար»։
Լրագրողների դիտարկմանը, թե նախագահ Սերժ Սարգսյանը նման հայտարարությամբ հանդես եկավ, քանի որ կարծում է, որ երկրում ընդդիմություն չկա, Կոստանյանը նշեց, որ համակարծիք չէ այդպիսի տեսակետի հետ։
«Ցանկացած իշխանության և պետության համար ընդդիմության առկայությունն ուղղակի անհրաժեշտություն է: Սերժ Սարգսյանը խոսում էր այն մասին, որ կայուն է իրավիճակը, չկան մեծ տատանումներ՝ քաղաքական և այլ դաշտերում, ինչը երաշխիք է երկրի զարգացման համար: Որևէ երկիր չի կարող զարգանալ, եթե չլինի կայունության երաշխիք»,- ասաց ԱԺ պետական-իրավական հարցերի և մարդու իրավունքների մշտական հանձնաժողովի նախագահը։
Հարակից հրապարակումներ`
Լրահոս
Տեսանյութեր
«Գոյ» թատրոնի դերասանները դիմեցին ոստիկանություն
