Ձեր վստահելի աղբյուրը

2018 թվականի համար պետական բյուջեից մոտ 127 մլն դրամ է նախատեսված  դպրոցներում Ինժեներական լաբորատորիաների ստեղծման համար: ԱԺ-ում հայտարարեց ԿԳ նախարար Լևոն Մկրտչյանը:

Նշենք, որ հարցն ԱԺ-ում բարձրաձայնեց «Ելք» խմբակցությունից Գևորգ Գորգիսյանը, նշելով, որ ֆինանսների նախարարությունը ծրագրի իրականացման համար դիմած Ինֆորմացիոն ձեռնարկությունների միության նախագահին  ասել են՝ գումար չկա:

«Ըստ էության, հարցն առաջացել է նրանից, որ ծրագիրն իրականացրել են առաջանցիկ կերպով, ինչի հետևանքով 22 խմբակի ֆինանսավորման հարց է առաջացել: Այն ժամանակ մենք ասացինք կփորձենք դոնոր կազմակերպություններ ներգրավել, իսկ եթե լինեն խնայողություններ, երկրորդ կիսամյակում կներդնենք դրանք, խոսքը 80 մլն դրամի մասին է»,-ասաց ԿԳ նախարարը:

Խնդրին արմատական լուծում տալու համար նախարարն ասաց, որ մտադիր են փոփոխություններ կատարել ինֆորմատիկա և տեխնոլոգիա առարկաներում: Դեռ քննարկումներ կլինեն, նախարարն ասաց, դրանց մասին տեղյակ կպահի:

Գորգիսյանը նշեց, որ ծրագրի իրականացումը կնպաստի տարածքների համաչափ զարգացմանը: