Դեռ կշահագործենք ԱԷԿ-ի գործող էներգաբլոկը, հետո կորոշենք՝ նորը երբ կառուցել. Աշոտ Մանուկյան
«Էներգետիկ համակարգի ընդհանուր գնահատականը տալ երկու նախադասությամբ մի քիչ դժվար կլինի, բայց փորձեմ ներկայացնել իրավիճակը և մեր տեսլականը՝ համակարգի զարգացման ուղղությամբ առաջիկա տարիների համար»,- այսօր ԱԺ-ում էներգետիկ համակարգի վերաբերյալ «Ելք» խմբակցության հարցապնդման քննարկման ժամանակ նշել է Էներգետիկ ենթակառուցվածքների և բնական պաշարների նախարար Աշոտ Մանուկյանը՝ պատասխանելով «Ելք» խմբակցության պատգամավոր Նիկոլ Փաշինյանի հարցին։
Նրա տեղեկացմամբ՝ այսօր ներքին սպառման կառուցվածքում մոտավորապես երեք արտադրական հզորությունները հավասարաչափ բաշխված են. «Ունենք միջուկային էներգիայի մասնաբաժին գրեթե 33 տոկոս, այս պահին միայն ջրային աղբյուրներից արտադրվող հոսանքի մասնաբաժինը և գազայինը ևս 33-ական տոկոս են։ Այսօր մենք իրականացնում ենք մեր երկրի համար աննախադեպ հայկական ատոմային էլեկտրակայանի երկրորդ էներգաբլոկի ծառայության ժամկետի երկարաձգման և արդիականացման ծրագիր, որով միջուկային էներգիայի արտադրությունը կավելանա մոտավորապես 10 տոկոսով»։
Աշոտ Մանուկյանը հայտնեց նաև, որ առաջիկա տարիներին՝ 2020-21 թվականներին, միջուկային էներգիայի տեսակարար կշիռը ներքին սպառման կառուցվածքում կկազմի 40-41 տոկոս։
«Ելք» խմբակցության ղեկավար Նիկոլ Փաշինյանը հարցրեց նաև, թե ի՞նչ վիճակում է դեռևս 2008-ի հոկտեմբերին Սերժ Սարգսյանի այն հայտարարությունը, որ Հայաստանն սկսում է նոր ատոմակայանի կառուցում։
«Մեկ անգամ ևս փաստեմ, որ հայկական ատոմակայանն ի զորու է շարունակել իր աշխատանքը որոշակի ախտորոշիչ աշխատանքներից հետո, որից հետո կարող ենք որոշել, թե որքան կյանք այն կարող է ունենալ: Հիմա կառուցել նոր էներգաբլոկ, եթե ունենք գործողը, որը կարող է անխափան ու անվտանգ շահագործվել որոշակի տարիներ, որքանո՞վ է դա նպատակահարմար։ Միջուկային տեխնոլոգիաները շատ արագ զարգանում են, և եթե սրանից 5 տարի առաջ մենք ունեինք այլընտրանք երկու տարբեր տեխնոլոգիաների միջև, այսօր ունենք առնվազն 5 այլընտրանք, որոնցից յուրաքանչյուր հաջորդն ավելի անվտանգ է, ավելի հուսալի է, հետևաբար, կառավության որոշումը եղել է հետևյալը՝ շահագործել գործող էներգաբլոկը որքան հնարավոր է, որից հետո կորոշենք, թե երբ կառուցել նոր էներգաբլոկը և ինչ տեխնոլոգիայով»,- պատասխանեց նախարարը։
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
