Ձեր վստահելի աղբյուրը

ՀՀ կառավարությունն այսօրվա նիստում հավանություն տվեց «Հայաստանի Հանրապետության՝ մի կողմից, և Եվրոպական միության և ատոմային էներգիայի եվրոպական համայնքի ու դրանց անդամ պետությունների՝ մյուս կողմից, միջև համապարփակ և ընդլայնված գործընկերության համաձայնագիրը վավերացնելու մասին» ՀՀ օրենքի նախագծին:

ՀՀ արտաքին գործերի նախարարի տեղակալ Շավարշ Քոչարյանը նշեց, որ շրջանակային նոր համաձայնագիրը կարևորվում է նրանով, որ նոր՝ գործընկերային մակարդակի է բարձրացնում ՀՀ-ԵՄ երկկողմ հարաբերությունները և կոչված է դրանք կարգավորելու գալիք տարիների ընթացքում։

«Այն ավելի ընդգրկուն է և համապատասխանեցվել է երկկողմ հարաբերությունների էությանն ու խորությանը»,- նշեց փոխնախարարը։

Շավարշ Քոչարյանի խոսքերով՝ համաձայնագրի դրույթները համապատասխանում են ինտեգրացիան այլ ձևաչափերում Հայաստանի ստանձնած պարտավորություններին:

«Համաձայնագիրը, որը ստորագրվել է 2017-ի նոյեմբերի 24-ին Բրյուսելում, ամբողջությամբ ուժի մեջ կմտնի, երբ ԵՄ վերջին պետությունը կծանուցի, որ ավարտել է ներպետական գործընթացները: Ներկա դրությամբ միայն Էստոնիան է այդ գործընթացներն ավարտել: Միևնույն ժամանակ մենք ստացել ենք ԵՄ-ից ծանուցում առ այն, որ համաձայնագրի առանձին դրույթների ժամանակավոր կիրառման համար կարող են մտնել ուժի մեջ: Այսինքն՝ համաձայնագրի որոշակի հատված կարող է կիրառվել մինչև վերջնական ուժի մեջ մտնելը»,- ընդգծեց  Շավարշ Քոչարյանը՝ հավելելով, որ դրա համար նախ անհրաժեշտ է, որ Հայաստանն ինքն ավարտի ներպետական գործընթացները: