Ձեր վստահելի աղբյուրը

Հայաստանի ապագա վարչապետի ընտրության հետ կապված հիմնական ինտրիգը լուծված է: Մարտի 22-ին լրագրողների հետ հանդիպմանը այս մասին նշեց քաղտեխնոլոգ Վիգեն Հակոբյանը:

Նա ասաց, որ չի կարծում՝ որևէ մեկը անակնկալներ է սպասում: Ընտրություններից հետո, ըստ Հակոբյանի, կսկսվի կաբինետի ձևավորումը: Բանախոսի կարծիքով՝  Կարեն Կարապետյանը կստանձնի առաջին փոխվարչապետի կարգավիճակը, իսկ ոլորտների բաժանումը կպահպանվի՝ Սերժ Սարգսյանը կզբաղվի անվտանգության, պաշտպանության, արտաքին և ներքին քաղաքականության հարցերով, իսկ տնտեսությունը կլինի ներկայիս վարչապետի, ապագա փոխվարչապետի տնօրինության ներքո:

«Լինելու են ևս երկու փոխվարչապետներ, այստեղ բավական հետաքրքիր է, թե այդ երկու փոխվարչապետների և վարչապետի փոխհարաբերություններն ինչպիսին են լինելու, որքանո՞վ են նրանք լինելու Սերժ Սարգսյանի վերահսկողության տակ, ոչ թե առաջին փոխվարչապետի»,- ասաց նա:

Ընդդիմությանն անդրադառնալով՝ Հակոբյանը նշեց, որ պետք է մի քանի հարթության մեջ դիտարկել, եթե խոսքը «Քաղաքացիական պայմանագրի» գործողությունների ու հայտարարությունների մասին է. մի կողմից կա Նիկոլ Փաշինյանի՝ բազմիցս հնչեցրած հայտարարությունը, որ ինքը զանգվածներին չի հրավիրելու հրապարակ, եթե չկա իշխանափոխության հստակ քարտեզ, մյուս կողմից՝ ընդդիմության կոչերին հասարակության գոնե ակտիվ մասի վերաբերմունքը վերլուծելու դեպքում պարզ է դառնում, որ այս պահին գոնե զանգվածային պոռթկման նախադրյալներ չեն երևում: Այդ հեռանկարներին, սակայն, ըստ Հակոբյանի, կարելի է գնահատական տալ մարտի 31-ից հետո, երբ Փաշինյանը կհրապարակի իր ճանապարհային քարտեզը՝ 14+4:

«Եթե մի այլ քաղաքական գործիչ այդ մասին հայտարարեր, ես ավելի կտրուկ կլինեի գնահատականներում, բայց Նիկոլ Փաշինյանը փորձված գործիչ է, ճանապարհ է անցել, եթե նա հիմա նման քայլի է գնում, ես անհամբեր սպասում եմ՝ ինչ է իրենից ներկայացնում այդ 14+4 ծրագիրը»,-ասաց նա:

Հակոբյանը նշեց, որ կարող է ենթադրել՝ «Քաղաքացիական պայմանագրի» գլխավոր նպատակն է՝ 2022 թ. դառնալ ընդդիմության միանշանակ լիդերը, որովհետև մտավախություն կա, որ իրենց դասական, խորհրդարանական գործունեությամբ, մեթոդներով կարող են կորցնել բողոքական, արմատական ընտրազանգվածին:

«Ամեն դեպքում, «Ելք» դաշինքում այս ակցիաների անհաջողության դեպքում անգամ Նիկոլ Փաշինյանը կարողանում է բացատրել, որ ինքը շատ էր ուզում, բայց իր գործընկերներն ըստ էության պակաս արմատական են տրամադրված եղել, այս առումով նա կարող է որոշակի քաղաքական դիվիդենտներ քաղել: Բայց կարող եմ գնահատական տալ, երբ տեսնեմ քարտեզը»,- ասաց նա:

Բանախոսը նշեց՝ կա անտարբերության, ապատիայի խնդիր, որը պայմանավորված է նաև ընդդիմության հետ կապված հույսերի բացակայությամբ. «Այնուամենայնիվ, գործոն է այն, որ ընտրական զանգածը տեսնում է՝ ընդդիմությունը մի ձևաչափով է հանդես գալիս, բայց երբ այդ միասնությունը չեն տեսնում անգամ մի դաշինքի ներսում, դա վատատեսության առիթ է դառնում»,- ասաց նա:

Հակոբյանը նշեց նաև, որ կա մի զանգված՝ սոցիալապես անապահով խավից, ովքեր տարիներ, տասնամյակներ շարունակ ընտրությունների ժամանակ ընտրակաշառք են վերցնում և ներքաշվում գործարքների մեջ՝ նույն իշխանության հետ, և տարեցտարի այդ գործարքներում ավելի շատ զանգվածներ են ներքաշվում:

Հարցազրույցում նախապես հստակություն մտցնելով իր ապագա պաշտոնավարման մասին, ըստ Հակոբյանի՝ Սերժ Սարգսյանը ժամանակից շուտ խաղի մեջ է մտցնում դեռևս մինչև վերջ չպատրաստված ուժերին:

Հակոբյանի գնահատմամբ՝ Սերժ Սարգսյանը 2014 թ. մտադիր էր աստիճանաբար ինչ-որ սխեմայով իշխանությունը հանձնել նոր առաջնորդներին, տեսնում էր քաղաքական իր ժառանգորդներին, ում պետք է հանձներ լծակները, սակայն իրավիճակ փոխվեց: Ընտրություններից հետո, ըստ բանախոսի, անմիջականորեն կսկսվի ժառանգորդների նոր մրցավազք:

«Սերժ Սարգսյանի հարցազրույցում ամենաուշագրավն այն էր, որ ասաց՝ մի պայմանով է ստանձնելու վարչապետի պաշտոնը, եթե սերնդափոխություն է պատրաստելու: Դա ակնարկ էր, որ սա իր պաշտոնավարման վերջին ժամկետն է»,- ասաց նա՝ հավելելով, որ նաև ակնարկ կար՝ նոր լիդերները կարող են լինել ոչ հանրապետականներ:

Հակոբյանը չբացառեց, որ քաղաքական մրցապայքարում նոր ուժ կամ ուժեր կհայտնվեն, ինչ վերաբերում է ընդդիմությանը, այստեղ, ըստ նրա, ավելի լուրջ իրավիճակ է. այս դաշտում, առավել ևս արտախորհրդարանական սեգմենտում վակուումային իրավիճակ է, քաղաքական ուժերը, որ չհայտնվեցին խորհրդարանում, մինչ այժմ շոկից դուրս չեն գալիս:

«Ամեն ինչ սպոնտան է, մի մասը հայտարարում է, որ գնում է հրապարակ, մյուսներն ասում են՝ չենք ուզում ծափ տվողի դերում լինել, քաղաքական ուժեր և գործիչներ կան, որոնք իրոք ժամկետանց են, կամ պիտի փոփոխություն լինի, նոր լիդերներ, նոր մարդիկ, որ հույսեր կարթնացնեն, կամ պիտի գնան խոշորացման ճանապարհով: Վերջին ընտրություններն էլ ցույց տվեցին, որ միավորման ճանապարհն է ճիշտը»,- ասաց նա:

Ապրիլյան ընտրություններից հետո, ըստ Հակոբյանի, Կարեն Կարապետյանը պահպանելու է իր ներկա կարգավիճակը, դե-ֆակտո լինելու է գործադիրի ղեկավար: Քաղտեխնոլոգի կարծիքով՝ որոշ նախարարների պորտֆելներ կփոխվեն, բայց շատ լուրջ տոկոսի չեն հասնի այդ փոփոխությունները:

«Տնտեսական ոլորտի նախարարները, որոնք անմիջականորեն կմնան Կարեն Կարապետյանի կուրացիայի տակ, այս փուլում չեմ կարծում, թե կփոխվեն: Ուղղակիորեն տնտեսական բլոկի հետ չառնչվող այլ ոլորտներում կարող են ինչ-ինչ փոփոխություններ լինել, բայց այդտեղ էլ կոալիցիոն պայմանագրի հետ կապված սահմանափակումներ կան, ուստի եթե փոփոխություներլինեն էլ՝ զուտ անձերի հետ կապված կլինեն»,- ասաց նա:

Հայաստանի չորրորդ նախագահ Արմեն Սարգսյանին անդրադառնալով՝ Հակոբյանն ասաց, որ նա նախընտրական հանդիպումների ժամանակ հնչեցնում էր այնպիսի ցանկությունների մասին, որոնց լիազորությունները համենայն դեպս սահմանադրությամբ իրենը չեն: Քաղտեխնոլոգի գնահատմամբ՝ Արմեն Սարգսյանը, բացի իր ֆորմալ պարտավորություններից, ունենալու է նաև ոչ ֆորմալ պարտավորություններ՝ կապված արտաքին աշխարհի հետ հիմնականում, իսկ ներիշխանական համակարգում նա ինչ-որ չափով հավասարակշռող դեր է ունենալու իշխանության տարբեր թևերի մեջ: