Ձեր վստահելի աղբյուրը

«Տրամադրվածությունը միշտ էլ բարձր է, փորձելու ենք հաղթել այդ երկու խաղերում»,- այսօր լրագրողների հետ զրույցում այս մասին ասաց  Հայաստանի ֆուտբոլի ազգային հավաքականի և Լոնդոնի «Արսենալ»-ի ֆուտբոլիստ Հենրիխ Մխիթարյանը՝ անդրադառնալով՝ մարտի 24-ին և 27-ին Երևանում կայանալիք  Էստոնիայի և Լիտվայի հետ ընկերական հանդիպումներին։

Ֆուտբոլիստը նշեց՝ չնայած որ լինելու են մարտավարական փոփոխություններ, ֆուբոլիստների փոփոխություններ, բայց դա ոչ մի ձև չպետք է ազդի հաղթանակի ցանկության վրա։

«Առաջին գոլս խփել եմ հենց Էստոնիայի դարպասին, այս անգամ էլ կփորձեմ գրավել նրանց դարպասը և հաղթել այդ խաղում։ Կփորձենք ուրախացնել մեր երկրպագուներին։ Պետք է կարողանանք այս երկու ընկերական հանդիպումներից լավագույնս քաղել, որպեսզի պատրաստվենք արդեն Ազգերի լիգայի խաղին։ Կարծում եմ՝ պաշտոնական հանդիպումներն ավելի հետաքրքիր են, քան ընկերական հանդիպումները։ Ազգերի լիգան շատ մեծ փորձ է մեզ համար, լինելու են նաև դժվարություններ, թող չթվա՝ թե լավ խումբ ենք ընկել, հեշտ հավաքականների հետ։ Ներկայիս ֆուտբոլում չկան ուժեղ և թույլ մրցակիցներ, կան հավասարազոր մրցակիցներ և ուժեղներ, փորձելու ենք անել հնարավորիս, որպեսզի պատվով դուրս գանք և հաղթենք»,- ասաց Մխիթարյանը։

Խոսելով հավաքականի նորեկ Նորբերտո Բրիասկո Բալեկյանից, Մխիթարյանն ասաց, որ շատ լավ կարծիք ունի նրա մասին. «Շատ լավ է մերվում հավաքականի մարզումներին: Հուսով ենք՝ խաղերում շատ մեծ օգուտ կտա»:

Ինչ վերաբերում է «Արսենալին»՝ նա ասաց. «Փորձել եմ հնարավորինս շուտ ադապտացվել թե խաղին, թե մարզումներին, թե քաղաքին, միշտ էլ դժվարություններ լինում են, շնորհակալություն թիմակիցներիս, որ կարողացան ինձ օգնել շուտ անցնել այդ փուլը, հաղթահարել դժվարությունները»։

Լրագրողների հարցին, թե երկրպագուների կողմից մշտապես լավ խաղ սպասելը չի՞ ճնշում իրեն, Մխիթարյանը պատասխանեց. «Ֆուտբոլ չեմ խաղում, զուտ մասնակցության համար, խաղում եմ, որպեսզի կարողանամ հաջողության հասնել, և ոչ միայն երկրպագուներն են ինձնից լավ խաղ սպասում, այլ հենց ես ինքնս ինձնից։ Փորձում եմ ամեն խաղին մոտենալ շատ թեթև, ազատ, և խաղալ այն խաղը, որը կարող եմ»։