Ձեր վստահելի աղբյուրը

««Հանրաքվեի մասին» օրենքի նախագծում առաջին ընթերցումից հետո որոշակի փոփոխություններ են կատարվել»,- այս մասին այսօր Ազգային ժողովում հայտարարեց Արդարադատության նախագահի տեղակալ Արթուր Հովհաննիսյանը։

«Քաղաքացիական նախաձեռնությամբ՝ 50 հազար քաղաքացի ստորագրությամբ դիմում է Ազգային ժողով՝ այս կամ այն օրենքն ընդունելու, և Ազգային ժողովը կամ կարող է ընդունել, կամ կարող է մերժել օրենքի ընդունումը։ Իսկ դրանից հետո 300 հազար քաղաքացի միանում է նախաձեռնությանը, և հարցը դրվում է հանրաքվեի։ Նախագծում կարգավորված չէր այն հարցը, թե ինչ կլինի, եթե Ազգային ժողովը ցուցաբերի անգործություն, այսինքն՝ հիսուն հազար քաղաքացի դիմեց Ազգային ժողով, և խորհրդարանն էլ ոչ ընդունում է, ոչ մերժում է։ Այստեղ մենք, իրոք, ունեինք փակուղի, և մենք նախատեսեցինք որոշակի ժամանակահատված, որի ընթացաքում, եթե այդ օրենքը չընդունվի կամ մերժվի, ապա սահմանադրական օրենքի ուժով համարվելու է, որ այդ օրենքի ընդունումը մերժված է», - ներկայացրեց փոխնախարարը։

Հանրաքվե նշնակելու մասին որոշումը կայացնելու է Հանրապետության նախագահը, և եթե նախագահի կողմից հանրաքվե չի կայացվում, ապա իրավունքի ուժով համարվում է հանրաքվեն նշանակված։

Իր ելույթում «Ելք» խմբակցության պատգամավոր Էդմոն Մարուքյանը նշեց, որ իրենք առաջարկներ էին ներկայացրել. «Մենք կարծում ենք՝ Սահմանադրության մեջ դրված հիմքերը նշված իրավունքի վերաբերյալ և այս օրենքը այդ իրավունքը դարձնում են պատրանքային իրավունք: Ի՞նչ է նշանակում դա, որ ունես իրավունք՝ որպես քաղաքացի, սակայն այն իրական կյանքում իրագործելը գրեթե անհնարին է։ «Ելք»-ն  առաջարկել էր, որ 300 հազար ստորագրություն հավաքագրելու համար ողջամիտ ժամկետ սահմանել, ինչը չի ընդունվել»։

Պատգամավորն ասաց, որ իրենք քննարկել են այն հարցը, որ, օրինակ, ՀՀ քաղաքացիներին եթե մի օր, ինչպես այսօր է, անհանգստացնի, որ ԵԱՏՄ անդամ է կամ այլ վերպետական կառույցի անդամ է, կամ ցանկություն ունի այլ վերպետական կառույցի անդամագրվել,  հնարավոր չէ քաղաքացիական նախաձեռնությամբ:

«Այսինքն՝ ՀՀ քաղաքացիները, ժողովուրդը չեն կարող նախաձեռնել հանրաքվեի անցկացում, պետք է անպայման կառավարությունը դա առաջարկի, եթե չի առաջարկում, ուրեմն չի անցկացվի։ Այս առումով էլ հենց այդ իրավունքնը պատրանքային է: Շատ բնական է, որ այս իրավունքը կա մեր երկրում որպես պատրանքային իրավունք, որովհետև պատրանքային խորհրդարանական կառավարման երկրում նաև քաղաքացիները պատրանքային քաղաքացիական նախաձեռնության իրավունք ունեն պատրանքային հանրաքվե անցկացնելու տարբեր պատրանքային թեմաներով: Սա պատրանքային պրոցես է, ըստ էության, և այն ուղղելու համար այս օրենքը չի կարող փոփոխվել: Սահմանադրության մեջ պետք է փոփոխություն անել, որ այս իրավունքը դառնա իրագործելի»,- ամփոփեց նա: