Ձեր վստահելի աղբյուրը

«Բնության համաշխարհային հիմնադրամի հայաստանյան մասնաճյուղը» (WWF-Հայաստան) և Շվեյցարիայի «Վեսեր» հիմնադրամը միասին սկսում են «Բարև թրեյլս» (BarevTrails) ծրագիրը՝ ուղղված Հայաստանում էկոտուրիզմի զարգացմանը,  այս մասին հայտնում են WWF հայաստանյան մասնաճյուղից:

Ծրագրի նպատակն է հարավային Հայաստանի պահպանվող տարածքներում («Խոսրովի անտառ» պետական արգելոց, «Գնիշիկ պահպանվող լանդշաֆտ», պլանավորվող «Տաթև» ազգային պարկ և «Զանգեզուր կենսոլորտային համալիր») էկոտուրիզմի ենթակառուցվածքների բարելավումը և ընդհանուր առմամբ Հայաստանի ճանաչելիության բարձրացումը որպես էկոտուրիզմի համար նպաստավոր երկիր:

Ծրագրի առաջին փուլով նախատեսված է, որ 3 տարվա ընթացքում 200 երիտասարդներ Մեծ Բրիտանիայից, Շվեյցարիայից, Իսպանիայից և Գերմանիայից կժամանեն Հայաստան՝ մասնակցելու պահպանվող տարածքներում առկա արշավային արահետների բարեկարգմանը, նոր արահետների մշակմանը, որոնք կներկայացնեն տվյալ տարածքի բնության և մշակութային հուշարձանները, ինչպես նաև կենսաբազմազանությունը, արահետների քարտեզագրմանը, ցուցանակների, արգելափակոցների տեղադրմանը, փոքր ենթակառուցվածքների (օրինակ անանցանելի վտակների վրա փոքր կամուրջներ) կառուցմանը և այլն:

WWF-Հայաստանի հաղորդակցությունների ստորաբաժանման ղեկավար Հերմինե Հակոբյանը նշում է. «Այս ծրագիրը շատ ավելին է, քան պարզապես էկոտուրիզմի ենթակառուցվածքների զարգացումը: Մասնակիցները շրջելու են Հայաստանի տեսարժան վայրերով, ծանոթանալու են երկրի հարուստ մշակութային ժառանգության, հայկական խոհանոցի հետ, շփվելու են տեղացիների հետ՝ զգալով նրանց հյուրասիրությունն ու ջերմությունը: Վերադառնալով իրենց երկիր՝ երիտասարդները դառնալու են Հայաստանի յուրահատուկ «դեսպաններ» իրենց երկրներում»:

«Վեսեր» հիմնադրամի ֆինանսավորմամբ նման նախագիծ տարածաշրջանում իրականանում է առաջին անգամ: Ծրագիրը կմեկնարկի այս տարվա մայիսին նախնական 3 տարի ժամկետով: Հաջողության դեպքում, այն շարունակական կլինի: «Բարև Թրեյլս»-ը կսկսվի պլանավորվող «Տաթև» ազգային պարկից: