Ժամկետանց դեղեր վաճառելու նպատակ չկար և չէր կարող լինել. Սերգեյ Խաչատրյան
«Հնարավոր է, որ առողջապահության նախարարությունը դրական գործ է անում, հնարավոր է, որ մտահոգ է քաղաքացիների առողջությամբ, բայց ինչ վերաբերում է օրենքի կազմակերպմանը, ապա ինչպես միշտ ընտրել ենք վատագույն ձևը»,- այս մասին այսօր խորհրդարանում կազմակերպված «Դեղատոմսերի ձևերը, դեղատոմսեր գրելու, դեղեր բաց թողնելու (ներառյալ՝ էլեկտրոնային եղանակով) կարգի, ինչպես նաև դեղերի և դեղանյութերի հաշվառման կարգը սահմանելու վերաբերյալ» թեմայով լսումների ժամանակ ասաց «Ծառուկյան» խմբակցության պատգամավոր Սերգեյ Բագրատյանը։
Նրա խոսքերով՝ միանգամից այնպիսի սթրես են առաջացնում բնակչության մոտ, որ մարդիկ դեղատներից օրերով տուն չեն գալիս, քանի որ կարծում են՝ դեղերը վերջանալու են և այդ սթրեսից իրենց պաշտպանելու համար 2-3 տարվա դեղ են գնում:
«Այսինքն՝ այս որոշումով արդյոք եղե՞լ է թաքնված նպատակ, որ որոշ ժամկետանց դեղեր վաճառեին: Մամուլում գրել էին, որ քաղաքացիները ստացել են դեղեր, բայց չեն ընդունել, այլ հանել են վաճառքի «սև շուկայում», քանի որ այդ դեղերն արդեն դեղատոմսով են։ Հասարակությունը շատ արագ արձագանքում է որոշման բացթողումներին։ Դուք ասում եք՝ թող մարդիկ կիրակի օրով հասնեն պոլիկլինիկա, ինչո՞ւ մենք չենք գնում մեր հասարակության մոտ, ինչո՞ւ դեղատանը բժիշկ չեք ընդունում, որ մարդը վստահ լինի՝ կգնա դեղատուն, իրեն նշանակումներ կանեն, դեղը կստանա»,- ասաց Սերգեյ Բագրատյանը։
ՀՀ առողջապահության փոխնախարար Սերգեյ Խաչատրյանն անդրադառնալով ժամկետանց դեղերի խնդրին՝ նշեց, որ ժամկետանց դեղեր վաճառելու նպատակ չկար և չէր կարող լինել։ «Ինչ վերաբերում է այդ ժամկետանց դեղերի ոչնչացմանը, ապա դրանց համար հստակ մեխանիզմներ կան: Մասնավորապես, կան կազմակերպություններ, որոնք ժամկետանց դեղերը պայմանագրային հիմունքներով վերցնում և ոչնչացնում են։ Դրանք ոչնչացվում են հատուկ ջերմաստիճանային այրման խցիկներում»,- նշեց փոխնախարարը:
Ինչ վերաբերում է օրենքի ներդրման կարգին, Սերգեյ Խաչատրյանն ասաց՝ եթե իրենց նախկինում քննադատում էին, որ դեղատները ազատ վաճառք են իրականացնում, որ վերահսկողություն չեն իրականացնում և դեղատոմսով դուրս գրվող դեղերն ազատ վաճառքի են հանված, հիմա կառավարության որոշման լավ կամ վատ լինելը պայմանավորված է մի շարք շահագրգիռ խմբերի վրա ուղղակի ազդեցություն ունենալու հետևանքով. «Նույնիսկ ամենամեծ բյուջեով նախապատրաստումը պետք է առաջացներ նման հարցեր»։
Հարակից հրապարակումներ`
Լրահոս
Տեսանյութեր
Թովմասյանը՝ Նանուշյանին. Նշել եք՝ ծրագրի իրականացումը պայմանավորված է օրենքով, բայց օրենքը չկա
