Ձեր վստահելի աղբյուրը

Սիրիական Աֆրինում կա քաղաքական առևտուր, որովհետև Ամերիկայի Միացյալ Նահանգները, Սիրիայում Թուրքիայի քայլերին շատ համաձայն չլինելով հանդերձ, չի ուզում լրիվ առճակատման գնալ: Մարտի 26-ին լրագրողների հետ հանդիպմանը նման տեսակետ հայտնեց ՀՅԴ Հայ Դատի և քաղաքական հարցերի գրասենյակի պատասխանատու Կիրո Մանոյանը:

Նրա խոսքով՝ այդ պատճառով էլ ԱՄՆ-ն քրդական ուժերին ինչ-որ առումով մղեց, որ հետ քաշվեն, և Աֆրինի վիճակը չլինի այն, ինչ եղել է այլ քաղաքներում, որտեղ տարբեր զինյալներ երկար ժամանակ պահել են բնակավայրը, և այն ամբողջությամբ ավերվել է:

«Աֆրինի դեպքում նման բան չեղավ, Թուրքիան թեպետ հոխորտում է, որ հաղթեց, բայց իրականում քրդական ուժերը որոշել են հետ քաշվել և պարտիզանական կռիվներ մղել, որ Թուրքիային ի վերջո դուրս մղեն այդ շրջանից: Հարցը նաև այն է, որ Թուրքիան հայտարարում է՝ սրանով չի վերջանալու, հակառակը՝ ինքը կշարունակի իր գործողությունները՝ հասնելով մինչև Սիրիա-Իրաք սահման, հնարավոր է՝ Սիրիայի կողմից էլ մտնի Իրաք, որ իր հարավային սահմանին անվտանգ զգա»,- ասաց նա:

Մանոյանի խոսքով՝ Սիրիայում Թուրքիայի ներկայությունը և ծրագրերը ևս մեկ փաստ են, հաշվի առնելով նաև Սիրիայում այլ պետությունների զինված ուժերը՝ Սիրիական տագնապը շատ շուտ չի ավարտվելու:

Խոսելով հայաբնակ քաղաքներին սպառնացող վտանգներից՝ Մանոյանը նշեց, որ հիմնական քաղաքը, որտեղ հայեր են բնակվում, Կամիշլին է, և եթե գործողություններն իսկապես հասնեն այդտեղ, նշանակում է՝ ամբողջ քաղաքը, դրա հետ նաև՝ այդտեղ բնակվող ամբողջ հայությունը, վտանգի տակ կլինեն: «Ես վստահ չեմ, որ տարբեր ուժերը՝ լինի Ռուսաստանի Դաշնությունը կամ ԱՄՆ-ն, թույլ կտան, որ այդքան ծավալվի: Այդ տարբերակի մասին առնվազն իրենք են հայտարարում, դրա անմիջական վտանգը չկա, բայց որ Թուրքիան հայտարարում է, թե դա է ծրագիրը, արդեն մտահոգիչ է»,- ասաց նա:

Մանոյանը նշեց՝ այնքան հակասական ուժեր կան Սիրիայում, որ ամեն պահի կարող է իրենց կեցվածքը փոխվել, կեցվածքի փոփոխությունն, ըստ բանախոսի, օրերի խնդիր է: Ըստ բանախոսի՝ այս իրավիճակում, երբ տարբեր պետություններն իրենց Զինված ուժերով ներկա են Սիրիայում, և վաղը կարող է՝ իրար հետ բախում ունենան, Սիրիայի ներքին խնդիրների լուծման հերթը դեռ չի հասնի:

«Մինչև երկրից դուրս չգան հատկապես այն պետությունները, որ Սիրիայի իշխանությունների կողմից չեն հրավիրվել, լուրջ ներքաղաքական հարցերի լուծման մասին խոսելու հիմքեր չկան: Կարող են տարբեր ձևաչափերի քննարկումներ լինել, բայց հարցը չի կարգավորվի, մինչև նրանք դուրս չգան երկրից»,- ասաց նա:
Սինջարին սպառնացող վտանգին անդրադառնալով՝ Մանոյանն ասաց, որ եթե իսկապես թուրքական զինված ուժերը փորձեն Սինջար մտնել, դա կլինի իրաքյան պաշտոնական ուժերի և Իրաքում քրդական ինքնավարության ուժերի համախմբման առիթ, որովհետև երկուսն էլ դժվար հանդուրժեն, որ Թուրքիան այդքան առաջ գնա:

Սիրիայում, ըստ Մանոյանի, իրական հարցը ԱՄՆ կեցվածքն էր, թե որքան թույլ տվեց՝ Թուրքիան առաջ գնա, որքան խրախուսեց քրդերին, որ հետ քաշվեն, որովհետև իսկապես բանը հասել էր այնտեղ, որ ԱՄՆ և Թուրքիայի զինված ուժերը կարող էին իրար դեմ դուրս գալ, և դա լրիվ նոր իրավիճակ կստեղծեր:

«Կարծում եմ՝ Աֆրինն է այն կարմիր գիծը, որ ԱՄՆ-ն, ՌԴ-ն Թուրքիայի առաջ քաշեցին: Թուրքիան իր հնարավորությունները, լծակները բավական լավ է օգտագործում, բայց դրանք անսահման չեն: Աֆրինի գլխավոր խնդիրը եթե առնվազն կիսով չափ Սիրիայից Թուրքիայի զգացած վտանգն է, ապա մնացած կեսը ներքին քաղաքականության համար է, և սա տեսնելու ենք մինչև 2019 թ. Թուրքիայի նախագահական ընտրությունները»,- ասաց նա: