Աղվան Վարդանյանը զարմացած է «Ելք»-ի ու «Ծառուկյան»-ի քվեարկությունից

Քաղաքական 12:11 26/03/2018 Հայաստան

ՀՅԴ խմբակցության ղեկավար Աղվան Վարդանյան ԱԺ-ում ճեպազրույցների ժամանակ նախ խոսեց ոչ թե խմբակցության, այլ կուսակցության աշխատանքների մասին: Ընտրել են ՀՅԴ գերագույն մարմնի 9 անդամներին, առաջին նիստը հրավիրել են երեկ, ԳՄ ներկայացուցիչ է ընտրվել Արսեն Համբարձումյանը:

«Ճանաչում եք, գիտեք, առնչվել եք, շփվել եք»,-ասաց Վարդանյանը:

Ինչ վերաբերում է խորհրդարանում աշխատանքին, ապա դաշնակացական պատգամավորը հիշեցրեց՝ ընդունվել են օրենսդրական այն բոլոր կարգավորումները, որոնք առնչվում էին կիսանախագահական համակարգից խորհրդարանական համակարգին անցնելու գործընթացին:

«Շատ շուտով լիարժեք անցումը կապահովվի»,-ասաց բանախոսը:

Նախորդ արտահերթ նիստում քննարկված հարցերից ներկաների ուշադրությունը նա հրավիրեց ՏՄՊՊՀ-ի կազմավորման հարցին վերաբերող օրինագծին:

«ՀՅԴ խմբակցությունն առաջարկել էր, որ հանձնաժողովը ձևավորելիս վեց անդամներից մեկի թեկնածությունը համախոհությամբ առաջադրի խորհրդարանական ընդդիմությունը»,-հիշեցրեց օրենսդիր մարմնի ներկայացուցիչն ու հավելեց, որ անկախ այն բանից, իրենց քաղաքական ուժը եղել է ընդդիմություն, թե իշխանություն, հարցն իրենց համար միշտ սկզբունքային է եղել:

Ընդդիմությունը պետք է հակակշիռ ստեղծի նման մարմիններում, դրանք դարձնի վստահելի:

Նա ցավ հայտնեց, որ իրենց առաջարկությունը չի ընդունվել, զարմանք հայտնեց քվեարկության արդյունքների վերաբերյալ:

«Միայն մենք ձեռնպահ քվեարկեցին, իսկ խորհրդարանական ընդդիմադիր երկու ուժերը, որոնց համար առաջարկում էինք փոփոխությունը, կողմ քվեարկեցին: Բայց իրենց իրավունքն է»,-ասաց Ա. Վարդանյանը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: