Ձեր վստահելի աղբյուրը

ՌԴ նախագահ Վլադիմիր Պուտինը ժամանել է Կեմերովո, որտեղ «Ձմեռային բալենի» առևտրաժամանցային կենտրոնում տեղի ունեցած  խոշոր  հրդեհի հետևանքով զոհվել է վեց տասնյակից ավելի մարդ:

Պուտինը ծաղիկներ է դրել հրդեհված շենքի մոտ, որից հետո զննել է այրված շենքը:  Այնուհետև երկրի ղեկավարը խոսել է հրդեհի պատճառների մասին, գրում է ՌԻԱ Նովոստին: 

«Ի՞նչ է մեզ մոտ կատարվում, դրանք ռազմական գործողություններ չեն կամ հանքավայրում մեթանի հանկարծակի արտանետում: Մարդիկ, երեխաները եկել են հանգստանալու: Մենք խոսում ենք ժողովրդագրության մասին և  այսքան երեխա ենք կորցնում՝ ինչի՞ պատճառով.  հանցավոր անփութության, թափթփվածության»,- ասել է Պուտինը Կեմերովոյում կայացած խորհրդակցության ժամանակ:

Երկրի ղեկավարը հանձնարարել է ՌԴ քննչական կոմիտեի նախագահ Ալեքսանդր Բաստիրկիին  պաշտոնատար անձանց գործողություններին իրավական գնահատական տալ, որոնց պատճառով նման ողբերգություն տեղի ունեցավ: «Առանց գումարի վկայական չես կարող ստանալ, իսկ փողի դիմաց ինչ ասես կստորագրեն», - ասել է նա:

Հիշեցնենք, որ Կեմերովո քաղաքի «Զիմնյայա վիշնյա» 4-հարկանի առևտրի կենտրոնում մարտի 25-ին տեղի ունեցած խոշոր հրդեհի ժամանակ զոհվել է 64 մարդ, որից 8-ը, ըստ պաշտոնական տվյալների, երեխաներ են: Այս պահին, ըստ աղբյուրի, հիվանդանոցներում կա 13 վիրավոր, որոնց մեծ մասը տուժել են թունավոր գազից: