Ձեր վստահելի աղբյուրը

Երևանի ընդհանուր իրավասության դատարանի Էրեբունու նստավայրում մարտի 27-ին շարունակվեց զանգվածային անկարգություններ կազմակերպելու մեջ մեղադրվող «Նոր Հայաստան» շարժման ներկայացուցիչ Անդրիաս Ղուկասյանի գործով դատավարությունը: Ղուկասյանի պաշտպան Կարեն Մեժլումյանը նշեց, որ այս դատավարությունը արդարադատություն իրականացնելուն ուղղված լինելու փոխարեն առերևույթ ուղղված է Անդրեաս Ղուկասյանի նկատմամբ հաշվեհարդարի իրականացմանը:

Մեժլումյանը նախորդ դատական նիստին ինքնաբացարկի միջնորդություն էր ներկայացրել դատավոր Վարդան Գրիգորյանին: Այս դատական նիստին որոշում դեռ չէր կայացվել, պաշտպանը հորդորեց ինքնաբացարկ հայտնել:

Անդրիաս Ղուկասյանն ասաց, որ իրենք կալանքից ազատելու միջնորդությունը մերժելիս իբրև հիմնավորում նշել են, որ ազատության մեջ մնալով՝ ինքը կարող է հանրային կարգի համար լուրջ վտանգ ներկայացնել: Սա, ըստ Ղուկասյանի, ոչ մի հիմնավորում չունի: Նա ընդգծեց՝ ոչ իր քաղաքական կենսագրությունը, ոչ դատարանում քննարկվող դեպքերը նման հիմք չեն տալիս:

Ղուկասյանը նշեց, որ իրեն կալանքի տակ են վերցրել ակնհայտ սուտ ցուցմունքի հիման վրա: Վկաներից մեկը սուտ ցուցմունք է տվել ոչ միայն Անդրիաս Ղուկասյանի, այլև Դավիթ Սանասարյանի և Արմեն Մարտիրոսյանի դեմ, սակայն նրանց դեպքում մեղադրողն այդ ցուցմունքը հիմնավոր ապացույց չի համարել: «Սա մեղադրողի վերաբերմունքն է այդ ապացույցին, որի հիման վրա ինձ կալանքի տակ պահում են արդեն 20 ամիս»,- ասաց նա:
Ղուկասյանն ընդգծեց՝ Արմեն Մարտիրոսյանի ու Դավիթ Սանասարյանի դեպքում դատարանը համարել է, որ գրավը բավարար միջոց է, որպեսզի նրանք գտնվեն ազատության մեջ, սակայն իրեն որևէ լրացուցիչ պատճառաբանություն չեն ներկայացրել, թե ինչու նրանք պիտի ազատ արձակվեին, իսկ ինքը՝ ոչ:

«Իրավունքների պաշտպանություն առանց սահմանների» ՀԿ-ն հաղորդագրություն է տարածել, որով տեղեկացնում են՝ առաջիկայում ՄԻԵԴ-ը քննության կառնի Անդրիաս Ղուկասյանի գործը:

Դատարանը խնդրել է մինչև 2018թ. ապրիլի 11-ը ներկայացնել համապատասխան ապացույցներով հիմնավորված այնպիսի տեղեկատվություն, որը վկայում է դիմողի նկատմամբ Կոնվենցիայի այս կամ այն հոդվածի խախտման և դիմողի կողմից իրավական պաշտպանության ներպետական միջոցների սպառման մասին: