Ձեր վստահելի աղբյուրը

Երևանի ընդհանուր իրավասության դատարանի Շենգավիթի նստավայրում մարտի 28-ին կայացել է ՊՊԾ գնդի գրավման գործով հերթական դատական նիստը, որի ժամանակ հրապարակվել են 2016 թ. հուլիսյան այդ օրերին սպանված ոստիկանների դիակների դատաբժշկական փորձաքննության արդյունքները։ Դրանք հրապարակել է մեղադրող դատախազ Պետրոս Պետրոսյանը:

Ըստ փորձաքննության արդյունքների` զոհված ոստիկաններից Յուրի Տեփանոսյանի և Արթուր Վանոյանի մարմնի վրա հրազենային վնասվածքներից բացի եղել են նաև բութ առարկայով հասցված վնասվածքներ: Ենթասպա Գագիկ Մկրտչյանի մահը վրա է հասել կրծքավանդակի և որովայնի շրջանում ստացած հրազենային գնդակային թափանցող և միջանցիկ վնասվածքից: Վերջինս զոհվել է գնդի գրավման ժամանակ։

Ոստիկանության գնդապետ Արթուր Վանոյանի մահը վրա է հասել փորձաքննության պահից ավելի քան 24 ժամ առաջ։ Դիակի դատաբժշկական փորձաքննությունը ցույց է տվել՝ նրա մարմնին հրազենային մեկ վնասվածք է եղել, քերծվածքներ են եղել դեմքի և նախաբազկի ձախ հատվածում. դրանք առաջացել են նրա մահվանից ոչ շատ առաջ։ Փորձաքննության եզրակացության համաձայն՝ այդ վնասվածքները բութ առարկայով են հասցվել և Վանոյանի մահվան հետ անմիջական կապ չունեն:

Յուրի Տեփանոսյանի մահվան պատճառ է դարձել ողնուղեղի դիֆուզ վնասվածքային ախտահարումը՝ ողնաշարի պարանոցային հատվածի և գանգի դիմային հատվածի համակցված հրազենային, գնդակային, կույր վիրավորում ստանալու հետևանքով, որն անմիջական կապի մեջ է եղել մահվան հետ: Տեփանոսյանի մարմնի վրա հայտնաբերվել է նաև սալջարդ` կրծքավանդակի հետին մակերեսին, այն պատճառվել է սուր եզր ունեցող կույր առարկայով՝ նրա կենդանության օրոք՝ մահվանից անմիջապես առաջ։