Ձեր վստահելի աղբյուրը

Հայաստանը և Հունաստանը կապված են հազարամյակների խորքից եկող բազմաթիվ պատմական և մշակութային կապերով, և Հայաստանը կարևորում է դարավոր բարեկամ Հունաստանի հետ հարաբերությունների առավել խորացումն ու ընդլայնումը։  Այս մասին նշել է Հայաստանի արտգործնախարար Էդվարդ Նալբանդյանը՝ Հունաստանի ազգային պաշտպանության նախարար Փանոս Կամենոսի հետ հանդիպմանը։

ԱԳՆ մամուլի ծառայության հաղորդմամբ՝ Հունաստանի ազգային պաշտպանության նախարարը ընդգծել է, որ իր երկիրը բարձր է գնահատում փոխադարձ վստահության վրա հիմնված հայ-հունական միջպետական փոխհարաբերությունները, հավելելով, որ Հունաստանում ամենանջերմ զգացումներն ունեն Հայաստանի ու հայ ժողովրդի նկատմամբ ու ցանկանում են հնարավորինս զարգացնել համակողմանի փոխգործակցությունը։

Հայաստանի արտաքին քաղաքական գերատեսչության ղեկավարը գոհունակություն է հայտնել պաշտպանական ոլորտում հայ-հունական ընդլայնվող համագործակցության կապակցությամբ։
Նախարարներն անդրադարձել են Հայաստան-Եվրոպական միություն փոխգործակցությանը, բազմակողմ հարթակներում համագործակցության առավել սերտացմանը։

Նախարար Նալբանդյանը Փանոս Կամենոսին ներկայացրել է Լեռնային Ղարաբաղի հիմնախնդրի կարգավորման ուղղությամբ Հայաստանի և ԵԱՀԿ Մինսկի խմբի համանախագահների կողմից գործադրվող ջանքերը։