Ձեր վստահելի աղբյուրը

Արարատի մարզի Տափերական գյուղի շատ բնակիչներ գրեթե մեկ շաբաթ զրկված են եղել խմելու ջրից: 1-85 հեռախոսահամարով զանգերի պատասխանները  մի քանի օր նույնն էին՝ խնդրի մասին տեղյակ ենք, կատարվում են վերականգման աշխատանքներ,  աշխատանքների ավարտի հստակ ժամկետ նշել չենք կարող:

Panorama.am-ի հետ զրույցում գյուղացիները պատմեցին, որ անցած գիշեր վերջապես ջրամատակարարումը վերականգնվել է: Բայց մաքուր ջրի փոխարեն, խմելու ջրի համար նախատեսված հորերը լցվել են ցեխաջրով: Մինչդեռ ընկերությունից որևէ մեկը չի զգուշացրել կեղտոտ ջուր գալու հնարավորության մասին:

«Քանի որ գյուղում ջուրը ժամով են տալիս, երբմեն էլ ընդհանարպես օրվա ընթացքում ջուր չի լինում, մենք  մեծ հորեր ենք սարքել, բետոնապատել, հաճախ մաքրում ենք, խմելու ջուրը հավաքում այդտեղ: Առավոտ հորը բացել ենք, ինչ տեսնեք, ցեխաջուր է: Սա կվնասի պոմպերը: Ընկերության անպատասխանբատու աշխատանքի պատճառով հիմա  ստիպված պետք է ամբողջ ջուրը՝ մի քանի հարյուր լիտր դատարկենք, նորից մաքրենք: Պարզ էլ չի, դրանից հետո խողովակներից եկող ջուրը ինչպիսին կլինի»,-բողոքում են գյուղացիները: