Ձեր վստահելի աղբյուրը

Սոցիալական ցանցերը հերթական անգամ դարձել են տեղեկատվության ձեռքբերման աղբյուր՝ կապված շոկոլադի հետ: Ապրիլի 3-ին լրագրողների հետ հանդիպմանը Պարենային իրավունքի մասնագետ Դավիթ Պիպոյանն անդրադարձավ շոկոլադ այրելու յութուբյան տեսահոլովակներին, նշեց, որ սոցցանցերը կարևոր դեր ունեն, սակայն իրազեկումը պետք է լինի պրոֆեսիոնալ:

«Բոլոր այն մարդիկ, որ հետևում են նաև յութուբյան հոլովակներին, շատերը ուզում են կրկնօրինակել այդ փորձը: Սա տեղեկատվության պակաս է, եթե անգամ վերցնեք կակաո հատիկավորը կամ շոկոլադի հատիկը, այն պետք է այրվի, եթե քիմիա սովորած լինեինք, կահասկանայինք, որ պետք է այրվի: Իսկական շոկոլադը պետք է պարունակի՝ հատիկավոր կակաո, կակաոյի յուղ, շաքար»,- ասաց նա:

Պիպոյանը նշեց, որ փորձել է թե տանը, և թե խանութում եղած կոնֆետները մոնիտորինգի ենթարկել: Նրա խոսքով՝ այս օրերին բարձրորակ շոկոլադ գտնելը խնդիր է, կակաոյի փոխարեն հաճախ կակաոյի փոշի է գործածվում, կամ բարձրարժեք յուղը փոխարինվում է ցածրորակ և ավելի էժան յուղով, մասնավորապես՝ արմավենու յուղով: Այս տեղեկատվությունը մակնշման վրա կա: Պիպոյանը նշեց՝ մենք մի կողմից չենք հետևում մակնշմանը, մյուս կողմից՝ աղմուկ ենք բարձրացնում սիրողական տեսահոլովակից:

Իսկական, որակյալ շոկոլադը տարբերելու համար Պիպոյանը խորհուրդ է տալիս այն հալեցնել ձեռքում. հաշվի առնելով, որ կակաոյի յուղը ունի ցածր հալման աստիճան, այն պետք է ընդամենը պահել ձեռքի ափի մեջ, եթե արագ հալչում է, գործ ունենք կակաոյի յուղի հետ, եթե չի հալչում, նշանակում է՝ արմավենու յուղ է պարունակում: Բացի այդ, բարձրորակ շոկոլադը պետք է քերուկից բաղկացած լինի, փորձագետը խորհուրդ է տալիս տան պայմաններում մեկ կտոր շոկոլադ կոտրել, գցել կաթի մեջ. բարձրորակ սալիկը պետք է անմիջապես սուզվի և նստի հատակին, իսկ ցածրորակը կարող է լողալ: Ջրի մեջ այս փորձը պետք չէ անել, քանի որ խտությունը այլ է: Շոկոլադի որակը ստուգելու հաջորդ տարբերակը այն սառցախցիկում տեղադրելն է. շոկոլադը պետք է սպիտակի, եթե կակաոյի յուղով է, բուսայուղ պարունակողի գույնը մնում է անփոփոխ: Բացի այդ, բնական շոկոլադը պետք է ունենա փայլ:

Բնական շոկոլադն, ըստ Պիպոյանի, օգտակար է, կակաոյի յուղը բարերար ազդեցություն ունի, այն հակաօքսիդանտ է. «Ինքս այս օրերին հետևեցի մակնշումներին, պետք է ասեմ, որ շուկայում առկա արտադրանքները գրեթե բոլորը մակնշված են, որ արմավենու յուղ ունեն, իսկ շատերը նշում են՝ բուսայուղ, ես համոզված եմ, որ նախապատվությունը տալու են ամենացածր գին ունեցող յուղին, բոլորն էլ ցանկանում են գինը նվազեցնել, որ մրցունակ լինեն շուկայում»:

Պիպոյանը ծնողներին խորհուրդ է տալիս՝ երեխաներին շոկոլադ տալիս ուշադրություն դարձնել մակնշմանը. նրանք արմավենու յուղից պատրաստվող, շաքարի մեծ քանակություն պարունակող շոկոլադից պետք է զգույշ լինեն:

«Շուկայում կան նաև բարձրորակ հումքից բաղկացած շոկոլադներ, բայց դրանք թանկ են, այսինքն՝ ճիշտ կլինի, որ մարդիկ սովորեն ուտել երկու անգամ քիչ, բայց բարձրորակ շոկոլադ: Շոկոլադը ոչ միայն ֆիզիոլոգիական պրոցեսների վրա է ազդում, այլև սթրեսի, գնային առումով որակյալ շոկոլադի գինը գրեթե երկու անգամ է ավելի»,- ասաց նա:

Շաքարի մեծ պարունակությամբ և էներգետիկ խտություն ունեցող սալիկն, ըստ Պիպոյանի, չի կարող օգտակար լինել, դրանից երկրորդ տիպի շաքարային դիաբետի ռիսկը զարգանում է:

Նա խոսեց նաև գերբացասական մի նոր երևույթի մասին՝  ծնողները երեխային տալիս են ժելեներ, ներկած կոնֆետները, որոնք երեխայի նյարդային համակարգի վրա ազդեցություն են ունենում. դրանք քիմիական ծագում ունեցող մթերքներ են: