Ձեր վստահելի աղբյուրը

ՄԻՊ-ը խնդրահարույց է որակում Հայաստանում  ներքաղաքային և մարզային նշանակության ճանապարհների անբարեկարգ վիճակը, ինչպես նաև դրա արդյունքում՝ մի շարք դեպքերում ազատ տեղաշարժման, ինչպես նաև բեռնափոխադրումների կազմակերպման առումով ստեղծված դժվարությունները:

Տարեկան հաղորդման մեջ Պաշտպանը նշում է դեպքեր, երբ բնակիչները ի նշան բողոքի փակում են ճանապարհները, հիշեցնում, որ վատ ճանապարհների պատճառով տաքսի ծառայություններն կամ հրաժարվում են երթևեկել այդ ճանապարհներով, կամ ավել գումար են պահանջում, իսկ մրցույթում հաղթած ընկերությունը խզում է պայմանագիրը:

«Տվյալ դեպքում հիշատակման է արժանի Շիրակի մարզի մոտ 500 բնակիչ ունեցող Նոր Ախուրյան թաղամասի դեպքը։ Այսպես, Նոր Ախուրյանի երթուղին շահագործած կազմակերպությունը անբարեկարգ ճանապարհների պատճառով պայմանագրի ժամկետի ավարտից հետո հրաժարվել է մասնակցել մրցույթներին, իսկ տաքսի ծառայություն մատուցողները ճանապարհների վատ վիճակի պատճառով ծառայությունից օգտվողներից գանձում են ավելի շատ գումար»,-ասված է ՄԻՊ զեկույցում:

Պաշտպանի աշխատակազմը հիշեցնում է, որ 2017 թվականին տեղեկություններ են հրապարակվել այն մասին, որ Վանաձորի մի շարք երթուղային տաքսիների վարորդներ գործադուլ են հայտարարել՝ բողոքելով ճանապարհների վատ վիճակից։

«Փաստերի և տեղեկությունների ուսումնասիրության և վերլուծության արդյունքում կարելի է փաստել, որ չնայած կատարած աշխատանքների՝ այնուամենայնիվ, համակարգային առումով 2017 թվականին ճանապարհների անբարեկարգ վիճակի խնդիրը մնացել է չլուծված: Ելնելով վերոգրյալից՝ առաջարկում ենք ավելացնել ներքաղաքային և մարզային նշանակություն ունեցող ճանապարհների բարեկարգման համար ֆինանսավորումը»,-առաջարկում է ՄԻՊ-ը:

Անդրադառնալով տրանսպորտի ոլորտում առկա խնդիրներին, ՄԻՊ-ը նշում է հանրային տրանսպորտի գերծանրաբեռնվածությունը, տրանսպորտի սպասարկման որակն ու այլ խնդիրներ:

«Հասարակական տրանսպորտի սպասարկման ընդհանուր որակիանբավարարության խնդիրները 2017 թվականին շարունակվում են պահպանվել և՛ Երևան քաղաքում, և՛ մարզերում:
Ինչպես նախորդ տարիների, այնպես 2017 թվականի ընթացքում, քաղաքացիների կողմից բազմիցս արտահայտվել են դժգոհություններ Երևանի հասարակական տրանսպորտի, հատկապես՝ ավտոբուսների ու միկրոավտոբուսների ոչ պատշաճ աշխատանքի վերաբերյալ։ Սյունիքի մարզի 105 բնակավայրում հանրային տրանսպորտ չի գործում։ Հանրային տրանսպորտ չի գործում նաև, օրինակ` Արագածոտնի մարզի 22 համայնքում (39 բնակավայր), Լոռու մարզի 6 համայնքում և այլն, իսկ Տավուշի մարզի 24 բնակավայրում կանոնավոր ռեժիմով գործող հանրային տրանսպորտի բացակայության խնդիրը կարգավորվում է մասնավոր հիմունքներով գործող տրանսպորտային միջոցների հաշվին»,-մասնավորապես նշում է ՄԻՊ-ը:

Ելնելով խնդիրները պաշտպանն առաջարկում է՝
1. բարձրացնել հասարակական տրանսպորտի սպասարկման որակը՝ սահմանելով վերահսկողության մեխանիզմներ ընդհանուր օգտագործման ավտոմոբիլային տրանսպորտով ուղևորների կանոնավոր փոխադրումներն իրականացնող կազմակերպությունների մատուցած ծառայությունների որակի նկատմամբ,
2. ավելացնել միջհամայնքային հանրային տրանսպորտային միջոցների քանակը, ինչպես նաև ապահովել տրանսպորտի առկայությունը մարզային բոլոր համայնքներում: