«Ռուս-թուրքական հարաբերությունները դեռ ռազմավարական չեն, բայց այդ ուղղությամբ են շարժվում»
ՌԴ նախագահ Վլադիմիր Պուտինի՝ Անկարա կատարած այցը նրա վերընտրվելուց իր վեր առաջին պաշտոնական այցն է: Ապրիլի 7-ին լրագրողների հետ հանդիպմանը ՀՅԴ Հայ դատի գրասենյակի քաղաքական հարցերի պատասխանատու Կիրո Մանոյանը նշեց, որ պաշտոնական հաղորդագրություններում ոչ մի տեղ չկա, որ հայության հետ առնչվող որևէ հարցի մասին քննարկում է անցկացվել:
Մանոյանի խոսքով՝ պետք է նշել՝ ռուս-թուրքական հարաբերությունները թեև առայժմ դեռ ռազմավարական բնույթի չեն, բայց այդ ուղղությամբ են շարժվում, և դա մեզ պետք է մտահոգի: Նա ընդգծեց՝ Հայաստան-Թուրքիա արձանագրությունների չեղարկումը այս հանդիպման հետ որևէ առնչություն չունի, Ռուսաստանը պետք է գոհ լինի, որ այդ արձանագրությունները չեղարկվեցին, քանի որ ամերիկյան նախաձեռնություն էին, ճիշտ է՝ Ռուսաստանը ինչ-որ պահի ներկա էր դրանցում:
«Պետք է զգոն լինենք այս հարաբերությունների զարգացումներում՝ հաշվի առնելով, որ դրանք կարող են վերածվել ռազմավարականի, իսկ մենք որպես փաստ տեսել ենք, որ այն ժամանակ, երբ Ռուսաստանն ու Թուրքիան կունենան ռազմավարական հարաբերություններ, դա թանկ կնստի մեզ վրա»,- ասաց նա:
Թուրքիայի, Իրանի և Ռուսաստանի հարաբերություններին անդրադառնալով՝ Մանոյանը նշեց, որ այս երեք պետություններն ունեն նաև հակառակ շահեր, բայց այսօր այդ շահերն ինչ-որ իմաստով համընկնում են, դա վերաբերում է Սիրիային, Արևմուտքի հետ հարաբերություններին: ՀՅԴ Հայ դատի գրասենյակի ներկայացուցիչն ընդգծեց՝ խուճապի մատնվելու կարիք չկա, բայց զգոնությունը պետք է պահել:
«Որ իրենց մոտեցումները իրար հակառակ են, դա փաստ է, ՌԴ-ն կողմ է Ասադին, Թուրքիան նրան չի ընդունում, բայց փաստ է, որ այս ամենը արվում է Սիրիայի ժողովրդի հաշվին, իրենք հակասություններ ունեն, բայց ինչ-որ տեղ համադրում են, իրենց միացնողն ավելի շուտ Սիրիայում քրդական ԶՈՒ ազդեցության մեծացումն է և Ամերիկայի գործոնը»,- նշեց նա:
Մանոյանն ասաց, որ Թուրքիան արդեն ներխուժել է Սիրիա, գրավել որոշ տարածքներ, և հաշվի առնելով նրա նկրտումները՝ դժվար է ակնկալել, որ այնտեղից դուրս պիտի գա:
Ըստ բանախոսի՝ հայության հետ կապված Թուրքիայի հայտարարությունները ևս մտահոգիչ պիտի լինեն, և հատկապես պետք է մտահոգիչ լինի, եթե Ղամիշլիի շրջանում, որն այսօր գտնվում է Թուրքիայի վերահսկողության տակ, ռազմական գործողություններ ծավալեն, մտահոգիչ կլինի:
Հայ-թուրքական արձանագրություններին անդրադառնալով՝ Մանոյանը նշեց, որ եթե Թուրքիան ակնկալում էր, թե տարածաշրջանում ինչ-որ փոփոխություններ պիտի տեղի ունենան, ապա նոր պայմաններում նոր բանակցություններ պիտի լինեն, սա էր Մյունխենում ՀՀ նախագահի շեշտածը:
«Սփյուռքը դեմ չէ Հայաստան-Թուրքիա հարաբերություններին: Սփյուռքում կային նաև ուժեր, ովքեր Հայաստանի իշխանությունների մոտեցմանը կողմնակից էին, հարցն այն է, թե այդ հարաբերություններն ինչ գնով պետք է սկսվեին: Պետք է Հայաստան-Թուրքիա հարաբերություններ սկսվեն, եթե պիտի բարիդրացիական հարաբերություններ ունենանք, չի կարելի շրջափակման մեջ պահել։ Պետք է լինի հարաբերությունների նորմալ ընթացք, ոչ թե Հայաստանն ինչ-որ բան վճարի: Թուրքիայի ու Ադրբեջանի հույսը եղել է, որ մենք ծնկի պիտի գանք, բայց մենք ծնկի չենք եկել»,- ասաց նա։
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
