Ձեր վստահելի աղբյուրը

Նախագահի երդմնակալությանը մասնակցելը որևէ իրավական հետևանք չի առաջացնում։ Ապրիլի 9-ին լրագրողների հետ ճեպազրույցում այս մասին նշեց «Ծառուկյան» խմբակցության անդամ Գևորգ Պետրոսյանը՝ հավելելով, որ իրենք խմբակցությունով կողմ են քվեարկել նախագահի թեկնածուին, և ինքը որևէ տրամաբանություն չի տեսնում երդմնակալությունը բոյկոտելու մեջ։

«Դա պետական մակարդակի միջոցառում է, ոչ մի տրամաբանություն չկա չներկայանալու, սա մեզ որևէ այլ պարտականությամբ չի կաշկանդում, մենք ասել ենք և պնդում ենք, որ հետևողական ենք լինելու հանրապետության նախագահի աշխատանքը գնահատելու հարցում»,- ասաց նա։

Հարցին՝ հավատու՞մ է, որ Արմեն Սարգսյանը դրական փոփոխություններ կբերի, Պետրոսյանը դրական պատասխան տվեց, նշելով՝ այլ է խնդիրը, որ այսպիսի ծանրության տակ մտնող մարդը պետք է հասկանա՝ պիտի արդարացնի այն հավատը, որ իր նկատմամբ տածել է քաղաքական այս կամ այն ուժը։ Լրագրողները հետաքրքրվեցին՝ մտահոգիչ չէ՞ այն հանգամանքը, որ Հայաստանի նախագահ է դառնում մարդ, ով հրաժարվել է ՀՀ քաղաքացիությունից։

Պետրոսյանն արձագանքեց. «Հայաստանի քաղաքացիությունից հրաժարվելու մասը չեմ կարող հաստատել, եթե դա այդպես է, դա անձի իրավունքն է։ Եթե մարդը, այս կամ այն հանգամանքից ելնելով, հրաժարվել է ՀՀ քաղաքացիությունից, մենք մեխանիկորեն չենք կարող նրան անվանել պետական դավաճան»։

Պատգամավորը նշեց՝ այն վստահությունը, որ տվել են նոր նախագահին, հետո պետք է պահանջեն, և որևէ մեկը կաշկանդված չէ իր տված քվեով։ Թե հետագայում ինչ կլինի, Պետրոսյանի կարծիքով՝ ժամանակը ցույց կտա։ Պատգամավորը նշեց՝ եթե Արմեն Սարգսյանն իր աշխատանքում, իր ունեցած իրավական լծակների, հնարավորությունների շրջանում կհարգի «Ծառուկյան» դաշինքի նախընտրական ծրագիրը, տեղ կտա դրա դրույթներին, իրենք կօժանդակեն, եթե ոչ՝ իրենց գնահատականները կհնչեցնեն ինչպես միշտ։

Պետրոսյանը համաձայն չէ, որ նոր նախագահը լիազորությունների սահմանափակ շրջանակ ունի։ Նա ընդգծեց՝ ՀՀ սահմանադրությունը սահմանում է, որ ՀՀ նախագահը հետևում է սահմանադրության պահպանմանը. դա վերացական գործառույթ չէ, այնտեղ կոնկրետ բովանդակություն կա։

«Եթե սահմանադրությունը առանձին անձանց վրա դնում է պարտականություններ, նախագահը պետք է հետևի՝ դրանք որքանով են պատշաճ կատարվում, հակառակ դեպքում ունի լծակներ՝ դրանց իրավաչափությունը վիճարկելու, իրավունք ունի մեղավոր անձանց պատասխանատվության ենթարկելու միջնորդությամբ հանդես գալու։ Այնպես չէ, որ նախագահը պարփակվի իր աշխատասենյակում և վարագույրի հետևից տեսնի՝ ինչպես է կատարվում սահմանադրության պահպանման գործառույթը»,- ասաց նա։

«Ծառուկյան» խմբակցության անդամը հորդորեց հավատով տրամադրվել՝ բայց ամբողջ գործընթացը թե հասարակական, թե նաև պետական-իշխանական վերահսկողության ներքո պահելու պայմանավորվածությամբ։