Ձեր վստահելի աղբյուրը

Հայաստանում առաջին անգամ անցկացվում է Եվրոպայի մինչև 23 տարեկանների առաջնություն: Ապրիլի 9-ին լրագրողների հետ հանդիպմանը Սուսերամարտի հավաքականի գլխավոր մարզիչ Ալիկ Նավասարդյանը նշեց, որ նման առաջնության՝ մեր երկրում անցկացնելը եզակի երևույթ է մեր սպորտի պատմության մեջ: Նավասարդյանն ասաց, որ մրցումներն անցկացվելու են ապրիլի 14-ից 19, ապրիլի 14-ին ներկայանում են թիմերը, իսկ ապրիլի 15-ին արդեն մեկնարկում են մրցումները:

Առաջնությանը մասնակցելու է 32 երկրի թիմ՝ 31-ը՝ դրսից և մեր հավաքականը, քանակային առումով լինելու է 290 մասնակից, ընդհանուր՝ բոլոր մարզաձևերից լինելու են 60 թիմեր: Նավասարդյանը նշեց, որ Եվրոպայի առաջնությունը ձեռք է բերվել իրենց ֆեդերացիայի ջանքերի շնորհիվ: Նախապես առաջնության անցկացման համար քննարկվել է Հայաստանի և Իսրայելի տարբերակը, սակայն 44 մասնակիցներից 34-ը Հայաստանի օգտին է քվեարկել, 8-ը՝ Իսրայելի:

«Շատերը ցանկություն ունեն գալ, մասնակցել, տեսնել մեր երկիրը, միշտ կարծել են՝ պատերազմող երկիր է, թող գան, տեսնեն, որ ամեն ինչ խաղաղ է, նորմալ է»,- ասաց նա:

Ավագ մարզիչ Արտաշես Մադոյանը տեղեկացրեց, որ Հայաստանը մասնակցելու է երկու զենքաձևում՝ ճկասուսերի մրցումներում՝ աղջիկների և տղաների համար, և խոցասուսերի մրցումներում՝ աղջիկների ու տղաների համար, մասնակցելու են 15 մարզիկ-մարզուհիներ, թիմային մրցումների դեպքում Հայաստանը մասնակցելու է երեք զենքաձևում:

«Մեր թիմը պատրաստ է, այսօր Բելառուսի հավաքական թիմն է ժամանել, համատեղ մարզումներ կլինեն, վաղը կժամանի Վրաստանի հավաքականը, ապրիլի 12-ին՝ Լատվիայինը: Լավագույնս մասնակցելու համար համատեղ մարզումներ են լինելու, երեք զենքաձևում առաջատար մարզիկներ ունենք, նրանք երեք տարի շարունակ դա ապացուցում են: Յուրաքանչյուրը անհատական ծրագրով են պատրաստվում, այս մի քանի օրը մարզվելու են համատեղ»,- ասաց նա:

Մադոյանը նշեց, որ կարևոր է տարբեր տեխնիկա, տակտիկա ունեցողների հետ մարզվել, որ տեղյակ լինես նրանց տակտիկային, անակնկալի չգաս:

Սուսերամարտիկ Էդուարդ Օվիկյանը, ով նույնպես մասնակցում է առաջնությանը, նշեց. «Մեր հայ մարզիկների համար Եվրոպայի առաջնությանը մասնակցելը մեծ պատասխանատվություն է, քանի որ մեր հայրենի հողի վրա է անցկացվելու: Ճիշտ է՝ մեր պատերը օգնում են մեզ, բայց դժվար է լինելու, մինչև 23 տարեկաններինը ամենադժվարն է, քանի որ այդ տարիքում է մարզիկն ամենաուժեղը»:

Մարզիկը նշեց, որ առաջնությանը լավ են պատրաստվում, թեպետ պարապմունքները «դաժան» են անցնում, սակայն հույս հայտնեց, որ իրենց թափած քրտինքն ու ջանքերը սպասելիքները կարդարացնեն: Օվիկյանը տեղեկացրեց, որ վերջերս մասնակցել է մինչև 20 տարեկանների Եվրոպայի ու Աշխարհի առաջնությանը:

Նրա խոսքով՝ ամեն մրցում ևս մեկ փորձ է տալիս, մարզիկն ուժեղանում է, հնարավորինս շատ մրցումների մասնակցելն օգուտ է մարզիկին: Օվիկյանը հույս հայտնեց, որ այս տարի երկու ուժեղ մրցումների մասնակցած լինելը կօգնի՝ ավելի լավ արդյունք ցույց տալ, քան նախկինում էր: