Ձեր վստահելի աղբյուրը

Մարաղայի կոտորածների մասին աշխարհում չէին ցանկանում բարձրաձայնել, քանի որ այդտեղ շահն էր գործում։ Ապրիլի 10-ին լրագրողների հետ հանդիպմանը «Սովորական ցեղասպանություն» նախագծի հեղինակ Մարինա Գրիգորյանը նշեց, որ բարոնուհի Քերոլայն Քոքսը, ով կոտորածների լուրը ստանալուն պես մեկնել է Արցախ և երրորդ օրն արդեն Մարաղայում էր, այնտեղ տեսածի մասին ցանկացել է մամուլում բարձրաձայնել։

Քոքսը, սակայն, տեսածն ու լսածը չի կարողացել հասցնել միջազգային հանրությանը: Արցախից վերադառնալով՝ նա պայմանավորվել է The Daily Telegram-ի հետ, որ նյութը տպագրելու են, սակայն վերջիններս պայմանավորվածությունը խախտել են։ Երբ Քոքսը հարցրել է՝ ինչու չեն տպել՝ այն դեպքում, որ մի ամիս առաջ Խոջալուի մասին նյութը տպագրել են, խմբագիրն ասել է, որ չեն ուզում առևտուր անել ողբերգությունների վրա։

«Այստեղ շահն է գործել։ Մարաղայի կողքով անցնում էր նավթամուղը, կողքին կանգնած էր նավթային աշտարակը, այսինքն՝ ադրբեջանցիները չէին կարող թույլ տալ, որ այդ կարևոր նշանակություն ունեցող տարածքը գտնվի հայերի ձեռքին: Այստեղ նավթային շահերն ու ադրբեջանցիների հայատյացությունը զուգակցվեցին»,- ասաց նա։

Մարաղայի կոտորածի առաջին առանձնահատկությունն, ըստ Գրիգորյանի, այն էր, որ կատարվել է անկախ Ադրբեջանի կողմից, սակայն կա ևս մեկ ուշագրավ հանգամանք. Մարաղայի կոտորածը իրագործելու համար «Գուրթուլուշ» գումարտակի հրամանատար Շահին Թալիբ օղլի Թագիևը ստացել է «Ադրբեջանի Ազգային Հերոս» կոչում, այդ կոչումը նրան տրվել է սպանդը կազմակերպելու համար: Գրիգորյանը հայտնեց, որ ներկայում այդ մարդն ապրում է Շվեդիայում, և պարզապես զարմանալի է՝ ինչու՞ Հայաստանը նրա նկատմամբ միջազգային հետախուզում չի հայտարարում:

Ըստ բանախոսի՝ 2009-ից Հայաստանի տեղեկատվական-քարոզչական քաղաքականությունն ակտիվացել է, Մարաղայի մասին և ֆիլմ են պատրաստել, և կայքեր են ստեղծվել, և հոդվածներ են դրվում, սակայն այդ տեղեկատվական և քարոզչական քայլերին չի համապատասխանում թե դիվանագիտական, թե իրավական դաշտում մեր քաղաքականությունը:

«Ադրբեջանը երբեք չի խոսում Մարաղայի մասին, դա տարօրինակ է, բայց տրամաբանական. նրանք հաստատեցին, որ Ադրբեջանի հայատյաց քաղաքականությունը կապ չունի նրա հետ, թե ով է իշխանության ղեկին. քաղաքականությունն ու մեթոդները նույնն են։ Նրանք Մարաղան չեն հիշատակում նաև այն պատճառով, որ միայն անկախ Ադրբեջանի իշխանություններն են պատասխանատու»,- ասաց նա:

Գրիգորյանը նշեց՝ Ադրբեջանն անընդհատ մեզ հիշեցնում է կատարվածի մասին, իսկ երկու տարի առաջ Թալիշում նրանք գրեթե կրկնեցին Մարաղան:

Բանախոսն ասաց՝ «Սովորական ցեղասպանություն» ֆիլմաշարի ֆիլմերը վերջացնում են մեկ ֆրազայով՝ Նյուրնբերգը դեռ առջևում է։ «Ես ուրախ եմ, որ մեր պատգամավորներն ու քաղաքական գործիչները ևս այդ գաղափարը տարածում են, որ Ադրբեջանը պետք է ենթարկվի Նյուրնբերգի գործընթացին»,- ասաց նա։ Գրիգորյանն ընդգծեց՝ Մարաղայի կոտորածը հանցագործություն է, որ չունի վաղեմության ժամկետ: