Ձեր վստահելի աղբյուրը

«Եթե փորձենք հաշվել, թե գյուղացիական հողերի ոռոգման անվան տակ վերջին տարիներին ՀՀ ԱԺ-ն ինչքան վարկային համաձայնագիր է վավերացվել, ապա մեր ոռոգման համակարգը պետք է ներառվի Գինեսի ռեկորդների գրքում որպես ամենաշատ վարկ կերած և ամենաանարդյունավետ վարկ ծախսած համակարգ»,- ԱԺ-ում  «ՀՀ և Վերակառուցման և զարգացման միջազգային բանկի միջև «Ոռոգման համակարգերի բարելավման ծրագրի համար լրացուցիչ ֆինանսավորում» վարկային համաձայնագիրը վավերացնելու մասին նախագծի քննարկման ժամանակ հայտարարեց «Ծառուկյան» խմբակցության պատգամավոր Նարիա Զոհրաբյանը։

Մինչ պատգամավորի ելույթը հիմնական զեկուցող Ջրային տնտեսության պետական կոմիտեի նախագահ Արսեն Հարությունյանն ներկայացրեց, որ այս ծրագիրը հնարավորություն է տալիս առաջիկա 4 տարիներին այդ ողջ տարածքը ոռոգելի դարձնել, ջրով ապահովել, բերքատվությունը բարձրացնել 11-14 տոկոսով և տնտեսել տարեկան 5 մլն խմ ջուր:

Դիմելով հիմնական զեկուցողին՝ պատգամավորն ասաց. «Երբ հարցնում ես՝ բա ի՞նչ եք անելու, ասում են՝ լավ նպատակների համար ենք բերում: Հարգարժան կառավարության ներկայացուցիչ, մեր տառապանքը փորձ ունի, մենք բազմաթիվ անգամ ԱԺ-ում տեսել ենք, թե ինչպես լավ նպատակների անվան տակ փոշիացել են հսկայական գումարներ, թե ինչպես լավ նպատակի անվան տակ հազարամյակների մարտահրավերների ծրագրով 17 մլն դոլար ծախսվեց «Ինչպե՞ս ցանել, ինչպես տնկել կարտոֆիլը» թեմայով գյուղացիների համար լոլոներ կարդալու անվան տակ»։

Զոհրաբյանի խոսքով՝ բոլոր վատ գործերը վարկային գումարներ մսխելու շրջանակում արվել են լավ նպատակի անվան տակ. «Առաջիկայում «Ծառուկյան»  խմբակցությունը կօգտվի նոր Սահմանադրության ընձեռած հնարավորությունից,  կձևավորի քննիչ հանձնաժողով՝ հասկանալու, թե լավ նպատակների անվան տակ ինչքան վարկեր են բերել, ծախսվել և դրանցից որքանն է եղել արդյունավետ»: