Ձեր վստահելի աղբյուրը

18:21
Նիկոլ Փաշինյանը Ֆրանսիայի հրապարակում է. «Ողջունում եմ ձեզ ժողովուրդ ջան, դուք հերոս ժողովուրդ եք, հաղթող ժողովուրդ եք»:

Ցուցարարներն առաջարկեցին հանրահավաքն անցկացնել Ֆրանսիայի հրապարակում, ոչ թե Բաղրամյան պողոտայում, ինչպես հայտարարվել էր ավելի վաղ:
«Ժամը 7-ին հանրահավաքն անում ենք այստեղ: Ժողովուրդ ջան, ես ձեր թույլտվությամբ գնամ, «Ելք» դաշինիքի գործընկերների հետ զրուցեմ, քննարկեմ, կվերադառնամ: Եթե նորմալ եք համարում, հանրահավքան այստեղ կանենք, խնդիր չկա»,-ասաց նա:

17:35
Փաշինյանը, դիմելով փշալարերից այն կողմ պատ կազմած ոստիկաններին, ասաց. «Դուք պետք իմանաք, որ մեր եղբայրական զգացմունքները ավելացել են:  Դուք պետք է իմանաք, որ մենք պայքարում ենք հանուն քաղաքացիների հաղթանակի: Մենք կապահովենք քաղաքացիների հաղթանակը, և ես հույս ունեմ, որ հաջորդ անգամ դուք մեզ չեք կանգնեցնի: Եկեք ծափահարենք ոստիկաններին: Մենք մեր հանրահավքը պետք է տեղափոխենք այստեղ»:

17:30
Մեքնայից իջած վիրակապերով Փաշինյանին դիմավորեցին «Ելք» խմբակցության կազմի մեջ մտնող «Լուսավոր Հայաստան» կուսակցությունից պատգամավորներ  Էդմոն Մարուքյանը, Մանե Թանդիլյանը, Գևորգ Գորգիսյանը, «Հանրապետություն» կուսակցությունից՝ Արամ Սարգսյանը: Փաշինյանը գրկախառնվեց գործընկերների հետ, համբուրեց նրանց: Միասին շարժվեցին դեպի ցուցարարները:

17:28
Նիկոլ Փաշինյանը հիվանդանոցից տաքսիով վերադառնում  է Բաղրամյան փողոց: Ճանապարհին հանդիպած բոլոր ոստիկաններին նա բարի ծառայություն մաղթեց:

17:18
Դավիթ Սանասարյանը հայտարարեց. «Արարատ Միրզոյանը հիմա մտնելու է Նիկոլ Փաշինյանի մոտ: Դուրս կգա, կասի՝ ինչ ենք անելու: Հետա գործողությունների համար կարևոր է, որ բոլորս լինենք այստեղ»:

Ի պատասխան ցուցարարները բացականչեցին՝ «Ազատ, անկախ Հայաստան, միացում»:

17:02
Հիվանդանոցում գտնվող Փաշինյանը պատմեց. «Անցա փշալարերը, ինձ հետ քաշեցին, ես բռնեցի փշալարերից, ինչի հետևանքով էլ վնասվածքներ ստացա: Կարել են: Ոտքերս վնասված չեն, կոշիկներս են պատռվել: Ենթադրում եմ աչքի տակի կապտուկը ձայնային նռանկի հետևանք է: Ես վնասվածքներ ստացած ոստիկաներին առողջություն եմ մաղթում, մենք պետք է ամուր կամքով շարունակենք մեր օրակարգը: Ես իմացա, որ ոստիկանությունը չի կարողացել ցրել հավաքի մասնակիցների, հպարտ եմ դրա համար: Դուրս գալուց հետո միանալու եմ նրանց»:
Նրա խոսքով, ձայնային նռնակները վտանգավոր են:

«Ես նման սցենար կանխատեսել էի, բայց հպարտ եմ և ուրախ, որ ցույցի մասնակիցները  բռնի ուժ չեն կիրառել: Ոստիկանները մեր եղբայրներն են, ես բոլոր նրանց նկատմամբ ունեմ եղբայրական զգացումներ: Հենց ոստիկանները տեղափոխեցին ինձ մեքենայով հիվանդանոց: Ես պետք է գնամ դեպքի վայր, ծանոթանամ իրավիճակին, փոխեմ պատառոտված շորերն ու կոշիկները»,-ասաց նա:

16:18
Գյումրու «Ասպարեզ» ակումբի նախագահ Լևոն Բարսեղյան. «Անտեղի է կիրառվել հատուկ ուժը: Կան վնասվածք ստացածներ: Հիմա հարաբերական անդորր է»:

16:00
Ոստիկանները հանեցին հակագազային դիմակները: Բաղրամյան պողտայում է նաև Հայաստանի փոխոստիկանապետ Լևոն Երանոսյանը:

15:58
Փաշինյանի գտնվելու վայրի մասին տեղեկություններ չունի նաև քաղաքագետ Արմեն Գրիգորյանը: Ոստիկանները մի քանի քայլ հետ գնացին:

15:53
Որտե՞ղ են Նիկոլ Փաշինյանն ու մյուս պատգամավորները հարցին, ի պատասխան Դավիթ Սանասարյանն ասաց. «Հստակ չգիտեմ, ոստիկանները նրանց տարել են մի կողմ»:

15:46
Դեպքի վայրում գտնվող շտապ օգնության մեքենայի բժիշկն օգնություն է ցուցաբերում վնասվածք ստացած 3 քաղաքացիների:

15:35
Ակցիայի մասնակիցներից մի քանիսը վնասվածքներ են ստացել:

15:31
Փաշինյանն անընդհատ փորձում է անցնել փշալերի միջով: Ոստիկանները  վահաններով դիմադրում են: Հատուկ միջոցներ, խլացուցիչ նռնակներ կիրառվեց:

15:23
Բաղրամյան պողոտայի սկզբում փշալարեր են տեղադրվել: Մարդիկ բացկանաչում են, խառնաշփոթ է: Ապակե վահաններով պատ կազմած ոստիկանների դիմաց ցուցարարները ձեռքները բարձրացրած կանգնել են:

15:18
Փաշինյանն ու ակցիայի մասնակիցները հանեցին փողոցում դրված երկաթ արգելապատնեշները, ինչից հետո բախում սկսեց ակցիայի մասնակիցների ու ոստիկանների միջև:

15:15
Բաղրամյան պողոտան ոստիկանները փակ են պահում: Երևանի փոխոստիկնապետ Վալերի Օսիպյանը Փաշինյանին ասաց, որ ԱԺ պատգամավորներին թույլ կտան անցնել:
-Ոստիկանությունը չի կարող իմ առաջ պայման դնել, թե ես ինչպես գնամ իմ աշխատանքի վայր,-արձագանքեց Փաշինյանը:
-Եթե դուք եք գնում…,-ասաց Օսիպյանը:
-Այո, ես եմ գնում, և գալիս են լրագրողները, բազմաթիվ քաղաքացիներ: Ժողովուրդ, ո՞վ է ինձ  մոտ այսօր ընդունելության ,-հարցրեց Փաշինյանը:
-Բոլորս,-արձագանքեցին քաղաքացիները:
-Այդպես չի լինի,-ասաց Օսիպյանը:
-Այդպես լինելու է,-պատասխանեց Փաշինյանն ու հորդորեց բացել փակ պողոտան:

15:00
Նիկոլ Փաշինյան. «Հայաստանի ապագան կախված է մեկ մարդուց, և այդ մեկ մարդը դու ես: Ես ուզում եմ հարգանքի ու խոնարհումի  տուրք մատուցել մեր ուսանողներին, ովքեր դուրս եկան փողոց ու տեր կանգնեցին իրենց հաղթանակին, իրավունքին, հայրենիքին: Ես ուզում եմ, հարգանքի տուրք մատուցել ու խոնարհվել այն մարդկանց առաջ, որոնք փակեցին Արշակունյաց, Մաշտոց, Բաղրամյան, Ազատության պողոտաները, Հաղթանակ կամուրջը, Լեոյի, Սարյանի, Պուշկինի փողոցները, դու հզոր ես, այսօր հաղթելու ես: Սերժ Սարգսյանը չի լինելու Հայաստանի վարչապետ, Հանրապետականը չի լինելու իշխանություն Հայաստանում: Հայաստանում իշխանություն չի լինելու ոչ մի քաղաքական ուժ, ոչ մի քաղաքական գործիչ, Հայաստանում իշխանություն լինելու է ժողովուրդը, քաղաքացին: Մենք՝ ԱԺ չորս պատգամավորներս ձեր ուղեկցությամբ գնալու ենք մեր աշխատանքի վայրը, բայց ես ձեզ հիշեցնում եմ, որ ոստիկանները որ կանգնած են այնտեղ, մեր եղբայրներն են: Ես ասել եմ, որ սա բաց ձեռքերի պայքար է, մեր ձեռքերում չկա քար, ատելություն, մեր ձեռքերում կա սեր, լույս»:
Հիշեցնենք, որ Ֆրանսիայի հրապարակում են պատգամավորներ Նիկոլ Փաշինյանը, Սասուն Միքայելյանը, Արարատ Միրզոյանը, Լենա Նազարյանը:

14:47
Քաղաքագետ Արմեն Գրիգորյանը հայտարարեց՝ մի կարևոր սկզբունք կա. «Իշխանությունը մշտապես պատկանում է ժողովրդին: Ժողովուրդը ցանկացած ժամանակ կարող է հավաքվել ու որոշել, թե ինչպիսին պետք է լինի իշխանությունը: Իշխանությունը չի պատկանում պաշտոններ զբաղեցնող մարդկանց, այն մշտապես պատկանում է ժողովրդին: Այսօր այստեղ՝ Ֆրանսիայի հրապարակում տեղի է ունենում Հայաստանի ապագայի կերտումը»:

14:12
Դերասան Հայկ Մարությանը (Կարգին Հայկո) հայտարարեց. «Թվում էր, թե ուսանողությունը խորասուզվել է իր պրոբլեմների ու վախերի մեջ, բայց նման բան չկա,  ես ձեզ ասում եմ: Ինձ հաճախ հարցնում են՝ հըն, մի բան կլինի՞: Այ ձեր ցավը տանեմ, արդեն լինում է, արդեն եղել է»:

13:40
Ցուցարարները Ֆրանսիայի հրապարակում են: Նիկոլ Փաշինյանը հարթակում է: Լրագրողների հետ զրույցում Քաղաքացիական պայմանագիր կուսակցության անդամ, ԱԺ պատգամավոր Սասուն Միքայելյանը չմեկնաբանեց «Ելք» դաշինիքի մյուս երկու կուսակցությունների ներկայացուցիչների՝ իրենց չմիանալու քայլը:
«Մնում են իմ գործընկերները՝ իրենց տեսակետով հանդերձ»,-ասաց նա:

13։07
Ակցիայի մասնակիցները Մաշտոցի պողոտա-Պարոնյան փողոց-Լեո փողոց-Սարյան փողոց երթուղիով առաջ են շարժվում:











12:26
Այս պահին բողոքի ակցիայի մասնակիցները Հաղթանակ կամրջի վրա են: Ոստիկանները թույլ չեն տալիս առաջ շարժվել:

Կամրջի վրա խցանման մեջ հայտնված մեքենաների վարորդներից մեկը մոտեցավ Փաշինյանին, խնդրեց թույլ տան՝ անցնել, քանի որ մեքենայի մեջ երեխաներ կան: Ի պատասխան Փաշինյանն ասաց, երեկ հարթակից հայտարարել էր երեխաներին տնից դուրս չհանել, ինչին քաղաքացիները հարգալից չեն եղել:

11:58

Երևանի  փողոցներում իրականացվող քայլերթի մասնակիցների մի մասը քիչ առաջ մտան  Խ. Աբովյանի անվան մանկավարժական համալսարանի շենք:

«Ժողովուրդ ջան, ծափահարություններով ողջունեք Մանկավարժական համալսարանին, ուսանողներին, դասախոսներին, որ նրանք մեր առաջ դռները չեն փակում: Ողջունում ենք մեր եղբայր ոստիկաններին, ծափերով, ծափերով»,-հայտարարեց Փաշինյանը:

Մինչ այդ համալսարան մուտք գործածները դուրս եկան շենքից ու միացան քայլերթին: