Ձեր վստահելի աղբյուրը

Այս պահին ԱԺ պատգամավոր Նիկոլ Փաշինյանի գլխավորությամբ ցուցարարները նստել են Խանջյան փողոցում:
«Ձեր հաղթանակի ժամը եկել է»,-հայտարարեց Փաշինյանը:

Լրագրողների հետ զրույցում նա ասաց, որ Երևանում իրավիճակը վերահսկելի է, «ոստիկանները մեր եղբայրներն են»:

Նա բոլոր ընդդիմադիր քաղաքական գործիչներին կոչ արեց անել իրենց քայլը: Չմեկնաբանեց «Ելք» դաշինքի մաս կազմող «Լուսավոր Հայաստան», «Հանրապետություն» կուսակցությունների ղեկավարներ Էդմոն Մարուքյանի ու Արամ Սարգսյանի՝ հրապարակ չգալը:

Փաշինյանը նշեց, որ ինքը հանձնարարել է գտնել Հերացի-Կորյուն խաչմերուկում տեղի ունեցած բախման հետևանքով տուժածին, ցուցաբերել օգնություն, հարկ եղած դեպքում, նաև ֆինանսական օգնություն: Նրա խոսքով, իրենք հայաստանցիների ու սփյուռքահայերի ֆինանսական փոխանցումներ են ստանում:

«Այս պահին մեր խնդիրն է, խաղաղ, առանց բռնության քաղաքացու հաղթանակն ապահովելը,-ասաց նա:

Ինչ վերաբերում է իր հնարավոր ձերբակալմանը, ապա Փաշինյանն ասաց. «Ինձ կարող են ձերբակալել այն ժամանակ, երբ ՀՀ քաղաքացին չի ցանկանում հաղթել, իսկ մենք տեսնում ենք, որ ՀՀ քաղաքացին ցանկանում է հաղթել: Մենք առաջ ենք գնալու, եթե նույնիսկ մեզ ռետինե մահակներով խփեն, մենք բռնություն չենք գործադրելու, որևէ մեկին չենք սպառնալու, վիրավորելու: Սա քաղաքակիրթ պայքար է, որից ոչ մեկ չպետք է տուժի»: