Ձեր վստահելի աղբյուրը

18:05
Մելիք Ադամյան փողոցում ոստիկանները փակել են ցուցարարների ճանապարհը՝  նրանց թույլ չտալով մոտենալ ՀՀԿ գրասենյակին: Նիկոլ Փաշինյանը ոստիկաններին ասաց, որ իրենք ունեն տեղեկություն, թե Հանրապետական կուսակցության ներկայացուցիչները սադրիչների խմբեր են ձևավորում, որ մտցնեն ժողովրդի մեջ և ոստիկանների հետ բախումներ լինեն:

«Կոնկրետ մարդու անուն է նշվում՝  Առաքել Մովսիսյան»,- նշեց նա:

Ոստիկաններից մեկն ասաց, որ  նման բան չկա: Փաշինյանը ոստիկաններին  խնդրել ստուգել այդ փաստը՝ հիշեցնելով, որ շարժման մասնակիցներին ասել են՝ իրենք խաղաղ քաղաքացիական անհնազանդության գործողությունների մասնակիցներ են, և որևէ մեկի նկատմամբ, այդ թվում՝ ոստիկանների նկատմամբ, ո՛չ բռնություն են գործադրելու, ո՛չ էլ բռնությանը բռնությամբ են պատասխանելու:

17:10
«Սրանից հետո ժողովրդական հեղափոխությունը պետք է շարունակվի և հասնի հաղթական ավարտի»,- այս մասին հայտարարեց «Իմ քայլը» նախաձեռնության առաջնորդ, ԱԺ պատգամավոր  Նիկոլ Փաշինյանը, երբ լրագրողներից տեղեկացավ, որ ՀՀ 3-րդ նախագահ Սերժ Սարգսյանը վարչապետ է ընտրվել 77 կողմ, 17 դեմ ձայներով:  

Լրագրողի հարցին, թե որն է լինելու հանգուցալուծումը, եթե արդեն կա վարչապետ և կառավարություն է ձևավորվում, Նիկոլ Փաշինյանն ասաց, որ հանգուցալուծումը պետք է լինի քաղաքացիական անհնազանդության զանգվածային գործողությունը: 

«Դա կհանգեցնի պետական կառավարման համակարգի կաթվածահար լինելուն: Այսինքն՝ պետական կառավարման համակարգը չպետք է կարողանա աշխատել»,- նշեց նա:
Հարցին, թե ի վերջո կառավարական շենքերը որքան ժամանակ են շրջափակված մնալու, Փաշինյանը պատասխանեց. «Ինչքան կարողանանք, այդքան էլ կպահենք»:

16:51
 Նիկոլ Փաշինյանը շարունակում է ցուցարարների հետ քայլել կենտրոնական փողոցներով, ցուցարարներին տեղեկացնում, որ գնում են Հանրապետության հրապարակ, քանի որ տեղեկություններ ունեն՝ իշխանությունը որոշել է խաղաղ հավաքը ցրելու հիմքեր ստեղծել:

«Դրա համար նրանք բազմաթիվ սադրիչների խմբեր են ստեղծել, որոնք ոստիկանության հետ համագործակցելով պետք է փորձեն ժողովրդին ուղղորդել բռնությունների և անկարգությունների, որպեսզի նրանք կարողանան ժողովրդին ցրելու հիմք ձեռք բերեն: Բայց Դուք տեսնում ենք, մեր ցույցն այնքան կազմակերպված է, որ նույնիսկ դեմքի արտահայտությամբ կարող ենք  ճանաչել ցույցի մասնակիցներին: Խնդրանքս՝ ցուցաբերեք հատուկ զգոնություն և չտրվեք սադրանքներին, հակառակը՝ դուրս բերեք սադրիչներին: Ժողովուրդ ջան, չտրվեք սադրանքներին»,- հորդորեց Նիկոլ Փաշինյանը:

16:15
«Իմ քայլը» նախաձեռնության առաջնորդ, ԱԺ պատգամավոր  Նիկոլ Փաշինյանը մեկժամյա հանգստից հետո այժմ շրջայց է կատարում Երևանի փողոցներում: Նա ցուցարարներին հորդորում է խաղաղ գործողություններ անել և կոչ է անում բոլորին հավաքվել Հանրապետության հրապարակում:

Այժմ բոլոր ուղղություններով ցուցարարները շարժվում են դեպի Հանրապետության հրապարակ:
Փաշինյանը նաև նշեց, որ իրենք սադրիչների մասին տեղեկություն ունեն: Դա, ըստ նրա,  իշխանությունների պլանն է, որպեսզի այդպիսով խափանեն հանրահավաքը:

15:08
Հաղթանակ կամուրջի մոտ ոստիկանական լրացուցիչ ուժեր եկան և շրջափակեցին ցուցարարներին: Դեպի կամուրջ շարժվող մեքենաների մեջ կար դպրոցահասակ մի երեխա, որին դուրս բերեցին մեքենայից՝ նրա անվտանգության նկատառումով:
  
Ոստիկանները հեռացրեցին արգելապատնեշները: Մի պահ լարված վիճակ էր այդ հատվածում, թե ցուցարարները, թե ոստիկանները միմյանց հանգստության կոչեր էին անում:Հաղթանակ կամուրջում երթևեկը վերսկսվեց, ոստիկանները արգելապատնեշ են ստեղծել, որպեսզի ցուցարարները հնարավորություն չունենան առաջ գնալ:

«Ձեր էրեխեքի պես էրեխա ենք, ինչի եք էդպես անում»,- ասում են երիտասարդները:

15:00
Ցուցարարները արգելապատնեշներ տեղադրեցին Հաղթանակ կամուրջից Երևանի քաղաքապետարան տանող ճանապարհի հատվածում: Ոստիկաններից մեկն ասաց՝ հնարավոր է, որ ծանրությունից կամուրջը փլվի: Ցուցարարներն էլ ոստիկաններին ասացին, որ կամուրջը վերևից փակեն, որ խնդիրներ չլինեն:

14:50
Այս պահին ցուցարարները փակել են Հաղթանակի կամուրջը: Ոստիկանները հորդորում են ճանապարհը բացել,  իսկ մարդիկ վանկարկում են՝  «Մենք ենք տերը մեր երկրի», «Ոստիկան միացիր»:

Ցուցարարներին մոտեցավ մի մեքենա, որի վարորդն ասաց, որ մեքենայում հիվանդ երեխա կա: Նրանք թույլ տվեցին, որ մեքենան առաջ շարժվի: Այնուհետև դիմելով կամուրջի վրա կանգնած մեքենաների վարորդներին՝ կոչ արեցին միանալ իրենց:

14:10
Նիկոլ Փաշինյանը հայտարարեց, որ պետական գերատեսչական շենքերի մոտ սկսում են նստացույցերը,  որտեղ հնարավոր է շրջափակելու են:
«Մենք հայտարարել ենք ժողովրդական հեղափոխության մեկնարկի մասին և հիմա այդ հեղափոխությանը հաղթանակ բերելու մարտավարություն ենք որդեգրում: Մի քանի պետական գերատեսչությունների շենքերի մուտքերը նստացույցի միջոցով շրջափակված են: Մեր խնդիրը պետական համակարգի աշխատանքը կաթվածահար անելն է»,- ասաց Փաշինյանը:

Նա նշեց, որ այս պահին փակ է Դատախազության, Արդարադատության, Կրթության և գիտության, Արտաքին գործերի, Տնտեսական զարգացման և ներդրումներ,  նախարարությունների, ՏՄՊՊՀ-ի, Պետական եկամուտների կոմիտեի, Կենտրոնական բանկի շենքերը:

«Նստացույցի մասնակիցներին հրահանգվել է, որ եթե այդ շենքերի դռները բացվեն, ապա մեր կողմնակիցներից երկուսը պառկում են դռների արանքում, մյուսները ներս են մտնում և առանց որևէ բռնության, ներսում սկսում են նստացույց անել: Հետո դռները պահում են և մենք հարյուրներով մտնում ենք ներս: Այսպիսով, կաթվածահար ենք անում  նրանց աշխատանքը: Այսինքն՝ եթե դատախազությունը, ԿԲ-ն կամ մյուս գերատեսչությունները չգործեն, Սերժ Սարգսյանը կառավարելու ոչ մի բան չի ունենա»,- ասաց Փաշինյանը:



13:38
Ցուցարարները շրջափակում են կառավարական շենքերը
Նիկոլ Փաշինյանը ցուցարարների հետ շարունակում է կառավարական շենքեր շրջափակել: Նա մեկ անգամ ևս շեշետեց, որ այսօրվա 18:30-ին անցկացվելիք հանրահավաքը տեղի կունենա Հանրապետության հրապարակում:

«Հրապարակը պետք է լցվի մարդկանցով»,- նշեց նա:

Այնուհետև երթի մասնակիցները շարժվեցին դեպքի ՀՀ կենտրոնական բանկի շենք, նստեցին մուտքի աստիճաններին: Ուսանողների մի մասն էլ ՀՀ արդարադատության և Արտաքին գործերի նախարարությունների շենքի մոտ են: Նրանք աշխատակիցներին կոչ են անում միանալ իրենց երթին:










13:28
Նիկոլ Փաշինյանը երթի ժամանակ պարբերաբար հայտարարում է, թե շարժման մասնակիցները որ փողոցներն են փակել: Ըստ նրա՝ տարբեր ուղղություններով քաղաքացիները միանում են իրենց:

«Այսօր՝ 18։30-ին, Հանրապետության հրապարակում տեղի է ունենալու Հայաստանի պատմության մեջ ամենամեծ հանրահավաքը», - հայտարարեց Փաշինյանը և կոչ արեց բոլորին տեղեկացնել դրա մասին։

13:09
Նիկոլ Փաշինյանի գլխավորած երթի մասնակիցները շարժվեցին դեպի ՀՀ գլխավոր դատախազության շենք, այնուհետև՝ Պետական եկամուտների կոմիտեի շենք: Բոլոր շենքերը կողպված են: Փաշինյանը բոլոր շենքերի մոտ կամավորների է թողնում և շարունակում ճանապարհը:
«Բռնությունը բացառում ենք, ոչ մի բան չենք ջարդում», - ասաց նա։

12:55
Ֆրանսիայի հրապարակում հավաքված ցուցարարները սկսեցին երթը, որպեսզի շրջափակեն կառավարական շենքերը:

Նիկոլ Փաշինյանը կոչ արեց, որ գյուղերում էլ շրջափակեն գյուղապետարանների, քաղաքներում՝ քաղաքապետարանների շենքերը. «Մենք պետք է ցանցային պայքար սկսենք, Սերժ Սարգսյանը պետք է տեսնի, որ ինքը չունի կառավարելու Հայաստան, կառավարելի ժողովուրդ: Կեցցե՛ ժողովրդական թավշյա հեղափոխությունը, կեցցե ազատությունը, կեցցե Հայաստանի Հանրապետությունը»:

Նա նաև նշեց, որ շարժվում են առաջ, բայց  չեն ասելու, թե որ շենքն են շրջափակելու. «Գնանք, տեսնենք` ինչ հարմար շենք կա: Սա շենքերի շրջափակման գործընթաց է, ոչ թե գրավման կամ այլ բան, բողոքի խաղաղ, ոչ բռնի զանգվածային գործողություններ են»:

12:45
Գործողություններ կանենք բոլոր կառավարական շենքերի գործունեությունը պարալիզացնելու ուղղությամբ. Նիկոլ Փաշինյան

Անելիքների մասին խոսելուց առաջ Նիկոլ Փաշինյանը նախ ներկայացրեց այսօր առավոտյան տեղի ունեցած իրադարձությունները: Նա հիշեցրեց, թե փոխոստիկանապետ Վալերի Օսպիյանն ինչպես է իրեն ծանուցել հավաքների դադարեցման մասին ոստիկանության որոշումը, սակայն ինքն այդ թուղթը պատառոտել է: Այդ պահից սկսած, ըստ նրա, իրավիճակը լարվում էր, խաչմերուկներ փակողներին, ուսանողների  բերման էին ենթարկում, հետո սկսեցին երթը, որը գնալով մեծացել է:

Նիկոլ Փաշինյանը հայտարարեց, որ իրենց ճկուն մարտավարությունը պետք է շարունակվի. «Մենք հիմա պետք է ճկուն գտնվենք: Նրանք հիմա ՀՀ-ի ամբողջ ուժային կառույցները հավաքել են Ազգային ժողովի մոտ և մեզ են սպասում, բայց մենք ուրիշ բան կանենք: Հիմա երթով կշարժվենք մեր ուղղությամբ և գործողություններ կանենք մնացած բոլոր կառավարական շենքերի գործունեությունը պարալիզացնելու ուղղությամբ:

Ըստ նրա՝ որտեղ իրենց հաջողվի ներս մտնել, ապա կմտնեն և նստացույց կանեն, իսկ որտեղ չի հաջողվի՝ նստացույց կանեն մուտքերի դիմաց և ոչ մեկին թույլ չեն տա ներս մտնել, իսկ դուրս եկողներին էլ կթողնեն միայն իրենց միանալու պայմանով:

Փաշինյանը ևս մեկ անգամ հիշեցրեց, որ իրենց պայքարը  լինելու է ոչ բռնի, բաց ձեռքերի պայքար:

«ԱԺ-ում կատարվող իրադարձություններն այլևս չպետք է ազդեցություն ունենան Հայաստանի քաղաքական կյանքի վրա»,- ասաց Նիկոլ Փաշինյանը:

12:40
«Իմ քայլը» նախաձեռնության առաջնորդ, ԱԺ պատգամավոր  Նիկոլ Փաշինյանը Ֆրանսիայի հրապարակում հայտարարեց, որ տրվում է  ժողովրդական ոչ բռնի թավշյա հեղափոխության մեկնարկը:

Փաշինյանը հավաքի մասնակիցներին ներկայացրեց, թե այս պահին ինչ է կատարվում հանրապետությունում:

«Ազգային ժողովում արդեն իսկ սկսել է խամաճիկային նիստը, իսկ հանրապետության տարբեր քաղաքներում բողոքի զանգվածային ցույցեր են: Գյումրիում հազարավոր մարդիկ դուրս են եկել հրապարակ, Իջևանում զանգվածային դասադուլ է և փակված է Իջևան-Երևան մայրուղին: Վանաձորում զանգվածային դասադուլ է, Երևանում դասադուլ է և ճանապարհներ են արգելափակված, Կապանում և Մեծամորում դասադուլ է, այսօր առավոտյան դպրոցական երեխաները շրջափակել են Արտաքին գործերի նախարարի ավտոմեքենան:

Ես պաշտոնապես հայտարարում եմ՝ Հայաստանում հաստատված է հեղափոխական իրավիճակ, և ես հիմա այստեղ հայտարարում եմ՝ ժողովրդական ոչ բռնի,  թավշյա հեղափոխության մեկնարկը»,- նշեց Նիկոլ Փաշինյանը: