Ձեր վստահելի աղբյուրը

Forbes պարբերականը հրապարակել է 2018 թվականի Ռուսաստանի ամենահարուստ 200 գործարարների ցուցակը: Այս անգամ ևս  վարկանշային ցուցակում ընդգրկվել են հայկական ծագում ունեցող 7 գործարար:

Ըստ Forbes-ի՝ Ռուսաստանի ամենահարուստ հայը շարունակում է մնալ «Մագնիտ» առևտրային ցանցի սեփականատեր Սերգեյ Գալիցկին (Հարությունյան):  Նրա կարողությունը գնահատվել է 4 միլիարդ դոլար: Գալիցկինը  զբաղեցրել է վարկանիշային  ցուցակի 28-րդ հորիզոնականը։ Նշենք, որ նախորդ տարի նա 18-րդ հորիզոնականում էր:

«Տաշիր» ընկերությունների խմբի նախագահ Սամվել Կարապետյանը զբաղեցրել է 30-րդ հորիզոնականը՝  3.7 մլրդ դոլար կարողությամբ: 2017 թվականի համեմատ նրա կարողությունն աճել է 300 մլն դոլարով:

Վարկանիշային ցուցակի  109-րդ տեղում ֆինանսիստ Ռուբեն Վարդանյանն է՝ 950 մլն դոլար կարողությամբ: 2017թ-ին Ռուբեն Վարդանյանը վարկանիշային ցուցակում զբացեղնում էր 99-րդ հորիզոնականը:

141 և 142-րդ հորիզոնականներում հայտնվել են Նիկոլայ և Սերգեյ Սարկիսով եղբայրները: «ՌԵՍՈ» ապահովագրական ընկերության սեփականատերերի կարողություններն աճել են 50-ական մլն դոլարով և կազմել 750-ական մլն դոլար:

Հաջորդը ներդրումներով զբաղվող Ալբերտ Ավդոլյանն  է՝  700 մլն դոլար: Նախորդ տարվա համեմատ Ավդոլյանի կարողությունը նվազել է 100 մլն դոլարով: Նա զբաղեցնում է վարկանիշային  ցուցակի 146-րդ հորիզոնականը:

7-րդը ABBYY համակարգչային ծրագրերի ընկերության հիմնադիր Դավիթ Յանն է: Նա եզրափակում է Forbes-ի ցուցակը՝ 200-րդ հորիզոնական։ Յանի կարողությունը գնահատվել է 500 մլն դոլար:

Դավիթ Յանի հայրը չինացի է, իսկ մայրը՝ հայ, երկուսն էլ ֆիզիկոսներ, աշխատել են Երևանի ֆիզիկայի ինստիտուտում։ Նա ծնվել և մեծացել է Հայաստանում, ավարտել է ֆիզմաթ դպրոցը, ապա ուսումը շարունակել Մոսկվայի ֆիզիկատեխնիկական ինստիտուտի ընդհանուր և կիրառական ֆիզիկայի ֆակուլտետում՝ պաշտպանելով «DSL բառարանների նկարագրության լեզուն» թեմայով դիպլոմային աշխատանքը։ Այնուհետև նա պաշտպանել է ատենախոսությունը տեքստերի օպտիկական ճանաչողության տեխնոլոգիաների վերաբերյալ։ Դավիթ Յանը ABBYY ընկերության հիմնադիրն է և տնօրենների խորհրդի նախագահը։ Ֆիզիկա-մաթեմատիկական գիտությունների թեկնածու է, գիտության և տեխնիկայի ոլորտներում Ռուսաստանի կառավարության մրցանակի դափնեկիր։

1989 թվականին, սովորելով Մոսկվայի ֆիզիկատեխնիկական ինստիտուտում, Դավիթ Յանը միկրոէլեկտրոնիկայի տեխնոլոգիայի խնդիրների ինստիտուտի աշխատակից Ալեքսանդր Մոսկալևի հետ համատեղ հիմնադրել է Bit Software ընկերությունը, որը 1997 թվականին վերանվանվել է ABBYY Software House-ի։ Ընկերությունը գործում է աշխարհի ավելի քան 8 երկրներում, նրա հաճախորդների թիվը կազմում է 30 մլն՝ 130 երկրներից։ Լինելով 21-ամյա ուսանող՝ Դավիթ Յանը ստեղծել է Lingvo էլեկտրոնային աշխարհահռչակ բառարանը, համակարգչային FINEREADER և այլ ծրագրերի հիմնադիրն է, որից օգտվում են միլիոնավոր մարդիկ ողջ աշխարհում։ Նա նաև հանդիսանում է առաջին գրպանի համակարգչի ստեղծողը, որը նրան մեծ ճանաչում է բերել ոչ միայն Ռուսաստանում, այլև ողջ Եվրոպայում և ԱՄՆ-ում: