Ձեր վստահելի աղբյուրը

18:49
Ցուցարարները կառավարության շենքի դիմաց են: Մեծաթիվ ոստիկաններ շարունակում են փակ պահել  կառավարության շենքի մուտքը:

17:30
Ավելի քան 3 ժամ ընդհատված երթը շարունակվեց: Ցուցարարները թմբուկների ներքո շարժվեցին Հանրապետության հրապարակ՝ կառավարության շենքի մոտ, որտեղ տեղի է ունենում գործադիրի նիստը: Դա Սերժ Սարգսյանի վարչապետի պաշտոնի ստանձնումից հետո  առաջին նիստն է:
Կառավարության շենքը շրջապատված է մեծաթիվ ոստիկաններով, բացի այդ, ոստիկանությունը հատուկ ուժեր բերեց՝ կենտրոնացնելով Կառավարության շենքի տարածքում:

14:22
Մինչ «Իմ քայլը» նախաձեռնության առաջնորդը հանգստանում է, ցուցարարները քոչարի են պարում:

14:08
Երևանի քաղաքապետարանի շենքի առաջ ոստիկանները պատնեշ են կազմել՝ թուլ չտալով ցուցարարներին մոտենալ շենքին: Նրանք Փաշինյանի ուղեկցությամբ շարժվեցին դեպի Մանկական այգի, որտեղ էլ նստեցին հանգստանալու:

Լրագրողները հետաքրքրվեցին, թե ինչով կբացատրի ոստիկանական գործողությունները, ըստ որի՝ բերման են ենթարկում տասնյակ քաղաքացիների՝ Նիկոլ Փաշինյանն ասաց. «Սիրով, սիրով եմ բացատրում»:

Դիտարկմանը՝ սիրելո՞վ են մարդկանց ժամերով ոստիկանությունում պահում, Փաշինյանն արձագանքեց. «Այո, քանի որ նրանք, որոնք բերման են ենթարկվում, երեք ժամ հանգստանալու հնարավորություն են ստանում»:  

«Իմ քայլը» նախաձեռնության առաջնորդը խնդրեց, որ իրեն հնարավորություն տան փոքր-ինչ հանգստանալ:

«Ճիշտ է, լուրեր են պտտվում, որ ես ընդհանրապես չեմ հոգնում, բայց հավաստիացնում եմ՝ այդպես չէ»,- նշեց նա:

13:50
Ոստիկանները  ուժով բացեցին Արշակունյաց պողոտան, որը փակ էր մի շարք ցուցարարների կողմից:  Ոստիկանները շարունակում են հսկել տարածքը, որպեսզի ցուցարարները կրկին այն չփակեն: Զուգահեռ երթը շարունակվում է Իսակովի պողոտայում: Ցուցարարներն արդեն հասել են Հաղթանակի կամուրջ, մի մասն էլ՝  Երևանի քաղաքապետարանի մոտ:

13:01
Երթի մասնակիցներն արդեն հասել են Իսակովի պողոտա: Նրանք տեղեկացնում են, որ երթի վերջից ոստիկանները երիտասարդների են բերման ենթարկում:



«Իմ քայլը» նախաձեռնության առաջնորդ, ԱԺ պատգամավոր Նիկոլ Փաշինյանը հայտարարեց՝ քանի  որ ոստիկանությունը հետ մնացած ցուցարարներին տանում է, ապա  կփակեն Իսակովի պողոտայի երկու երթևեկելի գոտիները՝ մինչև ազատ արձակեն  բոլոր բերման ենթարկվածներին։

12:44
Ցուցարարները Փաշինյանին հայտնեցին, որ երթի մասնակիցներին մեքենաներով տանում են ոստիկանություն: Փաշինյանն ասաց, որ ողբերգություն չկա:

«Ոչինչ, կտանեն, կհանգստանան, դուրս կգան: Մենք խումբ ունենք, որոնք բերման ենթարկվածներով զբաղվում է»,- նշեց նա:

Նաև հայտարարեց, որ բերման ենթարկվածների մասին ամբողջ տեղեկությունը փոխանցեն այդ խնդրով զբաղվող Արայիկ Հարությունյանին և նշեց նրա հեռախոսահամարը՝  093 39-40-90:

Ցուցարարները շարունակում են քայլել: Այժմ նրանք Երևանյան լճի մոտ են:

12:30
Նիկոլ Փաշինյանը ցուցարարների հետ հասան Երևանի Գարեգին Նժդեհի հրապարակ:  Քայլերթի մասնակիցները նստեցին գետնին՝ հանգստանալու:

Փաշինյանը տեղեկացրեց, որ իրեն լրագրողները փոխանցում են՝ Վարդենիսում դպրոցականները դասադուլ են հայտարարել և միանում են իրենց շարժմանը: Այս լուրը ցուցարարները ծափերով ընդունեցին։













11:50
Ցուցարարները Արշակունյաց պողոտայով շարժվում են դեպի Բագրատունյաց պողոտա՝ Երրորդ մաս: Երթևեկությունը միակողմանի փակ է:

















11:24
«Փեթակ» առևտրի կենտրոնի մոտ ոստիկանական պատի առաջ կանգնելով՝ Նիկոլ Փաշինյանն ասաց, որ իրենց նպատակն է առևտուր անել: Փոխոստիկանապետ Վալերի Օսիպյանն ասաց, որ «Փեթակ» առևտրի կենտրոնի ղեկավարությունը դիմել է ոստիկանությանը, որ իրենց անվտանգությունը պահպանեն:

Ոստիկանների հետ բանակցություններից հետո Նիկոլ Փաշինյանը Սասուն Միքայելյանի հետ մուտք գործեց «Փեթակ» առևտրի կենտրոն:

«Ժողովուրդ ջան, դեմ չե՞ք ես գնամ, սուջուխ առնեմ գամ»,- ասաց նա:

Մի քանի րոպե հետո նա դուրս եկավ առևտրի կենտրոնից՝ սուջուխը ձեռքին:

Ցուցարարները երթը շարունակեցին:

11:05
Ցուցարարները Արշակունյաց պողոտայով իջնելիս Նիկոլ Փաշինյանի առաջարկով մտան Սուրմալու տոնավաճառ՝ աշխատողներին իրազեկելու, որ այսօր ևս տեղի կունենա հանրահավաք: Փաշինյանը կոչ արեց տոնավաճառի աշխատակիցներին դուրս գալ փողոց և տեր կանգնել իրենց իրավունքին, հաղթանակին:

Երթի մասնակիցները հասան «Փեթակ» առևտրի կենտրոն, որի մուտքի առջև կանգնած են մեծ թվով կարմիր բերետավորներ: Նրանք փակել են մուտքը և թույլ չեն տալիս երթի մասնակիցներին առաջ գնալ: Լարվածություն առաջացավ ցուցարարների և ոստիկանների միջև, երբ Նիկոլ Փաշինյանը հայտարարեց, թե պետք է մուտք գործի և առևտուր անի «Փեթակ»-ում:  

Հատուկ ջոկատայինները թույլ չտվեցին նրանց մուտք գործել առևտրի կենտրոն: Նիկոլ Փաշինյանը կոչ արեց առևտրի կենտրոնի մյուս մուտքերը փակել:

10։55
«Իմ քայլը» նախաձեռնության անդամները երթը շարունակում են Արշակունյաց պողոտայով: Առաջին անգամ է, որ երթի մասնակիցներն այս ուղղությամբ են գնում:

«Դուրս արի փողոց և տեր կանգնիր քո հայրենիքին, քո իրավունքին, քո հաղթանակին»  վանկարկումներով երթի մասնակիցները անցորդներին, վարորդներին, «Սուրմալու» տոնավաճառի աշխատողներին կոչ են անում իրենց միանալ:

Նիկոլ Փաշինյանը հայտարարեց, որ այսօրվա հավաքը տեղի կունենա ժամը 19:00-ին Հանրապետության հրապարակում: 

Քայլերթին միացավ նաև «Ելք» խմբակցության պատգամավոր Սասուն Միքայելյանը:

10։36
Նիկոլ Փաշինյանը Խանջյան փողոցում հայտարարեց, որ մարտավարությունը փոխում են՝ ոչ թե ճանապարհը փակում են, այլ մեկ ուղղությունը բաց են թողնում, որ  այդ կերպ վարորդները կարողանան ճանապարհի մի ուղղությամբ անցնել և մեքենաների ազդանշաններով մասնակից լինել Սերժ Սարգսյանին դեմ շարժմանը:

Երթի մասնակիցները հասել են  Արշակունյաց պողոտա:

 10:15
«Ժողովրդական հեղափոխությունը այնպիսի բան է, որ նոր կարգախոսներ են ծնվում, և քանի որ ոստիկանները ուժ կիրառեցին, մեր շարժումը պետք է որդեգրի նոր կարգախոս»,- Կառավարության 3-րդ մասնաշենքի մոտ հավաքվածներին ասաց Նիկոլ Փաշինյանը և դիմելով ոստիկաններին վանկարկեց. «Քայլ արա, զենքդ դիր վայր»:  Նրան միացան ցուցարարները:

Նա շնորհակալություն հայտնեց այդ կարգախոսի հեղինակին:

Փաշինյանն այնուհետև զրուցեց Երևանի փոխոստիկանապետ Վալերի Օսիպյանի հետ, վերջինս ասաց, որ ցուցարարները անհամաչափ սահմանափակում են այլոց իրավունքները, հետևաբար, իրենք էլ են սահմանափակող գործողություններ անելու:

Փաշինյանը ցուցարարների հետ «Քայլ արա, զենքդ դիր վայր», «Ոստիկանը մերն ա» վանկարկումներով լքեցին Կառավարության 3-րդ մասնաշենքի տարածքը, Վերնիսաժով քայլեցին դեպի Խանջյան փողոց:

10:00
Ցուցարարների մոտ է ժամանել շտապօգնությունը: Ականատեսների վկայությամբ՝ ցույցի մասնակից մի աղջիկ քթի շրջանում վնասվածքներ է ստացել ոստիկանի հարվածից: ՀՀ ոստիկանության Երևան քաղաքի վարչության պետի տեղակալ, ոստիկանության գնդապետ Վալերի Օսիպյանը խոստացավ՝ մեղավորը կպատժվի:

Ցուցարարները «Քայլ արա, զենքդ դիր վայր» կոչով դիմեցին ոստիկաններին:

Այս պահի դրությամբ բերման է ենթարկվել 17 քաղաքացի:





9:57
Իմ քայլը» շարժումը շարունակում է շրջափակած պահել կառավարական շենքերը։ Մի քանի ցուցարարների ոստիկանները բերման ենթարկեցին, նրանց թվում է Դավիթ Պետրոսյանը:

9:55
Նախարարությունների շենքի դիմաց Նիկոլ Փաշինյանի հետ բանակցում է Երևանի փոխոստիկանապետ Վալերի Օսիպյանը: Մինչ այդ դիմելով շարքային ոստիկաններին, Փաշինյանն ասաց. «Ո՞ւմ եք դուք պաշտպանում, շաբաթ-կիրակի գնում եք ցեմենտ-բիտոն անում, ինչքա՞ն աշխատավարձ եք դուք ստանում, մտածե՞լ եք այս մասին»:

Օսիպյանն արձագանքելով նրա հայտարարություններին, ասաց. «Նրանք են ընտրել իրենց աշխատանքը»:

9։18
Այսօր վաղ առավոտից, խոստացածի պես, Նիկոլ Փաշինյանը և «Իմ քայլը» նախաձեռնության անդամները Հանրապետության հրապարակում էին:

Փաշինյանը լրագրողներին տեղեկացրեց, որ երեկ՝ հանրահավաքի ավարտից հետո հեռախոսազրույց է ունեցել SOAD խմբի հայազգի մեներգիչ Սերժ Թանկյանի հետ, և որ վերջինս հայտնել է՝ միանշանակ աջակցում է գործընթացին, իսկ գալ-չգալու մասին կհայտարարի:

«Եղբայրաբար զրուցեցինք, կարծես վաղուցվա ծանոթներ լինեինք»,- ասաց նա:

Փաշինյանը նշեց, որ իր տեղեկություններով Կառավարության նիստը հետաձգվել է:

Ցուցարարները երթով հասան նախարարությունների շենք, փորձեցին աշխատակիցներին թույլ չտալ՝ մուտք գործել շենք: Ոստիկանները շրջափակել էին նախարարության շենքի մուտքերը: Նրանք սկսեցին բերման ենթարկել առաջին շարքերում նստած ուսանողներին:

Ցուցարարները փորձեցին խոչընդոտել, նրանք շրջափակել էին Ոստիկանության մեքենան, որը փորձում էր տեղափոխել բերման ենթարկվածներին: Ցուցարարներից մեկն էլ պառկել էր ոստիկանական մեքենայի տակ:

Ցուցարարներին չհաջողվեց շրջափակել Կառավարության 3-րդ մասնաշենքը: Ոստիկանները վահաններով շղթա կազմեցին և բացեցին շենքի մուտքը: