Ձեր վստահելի աղբյուրը

Խոր Վիրապ եկեղեցու հարևանությամբ գտնվող Լուսառատ գյուղում այսօր առավոտից իրարանցում է՝ ոստիկաններ, փրկարարներ, գյուղի բնակիչներ: Դեպքի վայր ժամանած իրավապահներն ու փրկարարները տեղ հասնելուն պես պարզել են, որ ինքնասպանություն գործել ոչ մեկ չի պատրաստվում, փոխարենը գյուղացիները ցանկանում են օգնել վիրավոր թռչունին:

Բանն այն է, որ գյուղի ուսուցիչներից մեկը ծայրահեղ քայլի է դիմել, ահազանգել ԱԻՆ՝ իբր պատրաստվում է տանիքից իրեն նետել, որպեսզի մի քանի օր շարունակ բարձր  ալեհավաքին կանգնած վիրավոր արագիլին իջեցնեն ու օգնություն ցուցաբերեն:

Լուսառատի բնակիչները Panorama.am-ին պատմեցին, որ վիրավոր թռչունը 4-5 օր անշարժ կանգնած է եղել  բարձր ալեհավաքին: Գյուղացիներն իրենց ուժերով չեն կարողացել նրան իջեցնել: Օգնության ակնալիքով դիմել են ԱԻՆ, բնապահպանության նախարարություն, անհատ բնապահպանների, սակայն կանչերն ու օգնության խնդրանքներն անպատասխան են մնացել:

«Ստիպված մեր դպրոցի ուսուցիչներից մեկը նման անմեղ սուտ է հորինել»,-ասացին գյուղացիները:

Կանչից հետո Լուսառատ են ժամանում փրկարարներ, ոստիկաններ: Տեխնիկայի օգնությամբ մի քանի ժամ տևած աշխատանքներից հետո արագիլին բարեհաջող կերպով իջեցրել են:
Թռչունը  վնասվածքներ ունի թևի, ոտքի հատվածներում:

Լուսանկարները սիրողական են, տրամադրել են Լուսառատի բնակիչները: