Ձեր վստահելի աղբյուրը

14:30


Արշակունյաց պողոտում մեծ թվով ոստիկաններ կան: Նրանք թույլ չեն տալիս «Սինոփսիս Արմենիա» ընկերության և այլ ընկերությունների աշխատակիցներին փակել ճանապարհը: Սակայն մի մեքենա հորիզոնական կանգնել է ՝ փորձելով փակել ճանապարհը: Ոստիկանները հորդորում են բացել ճանապարհը, բայց վարորդն անդրդվելի է: Ոստիկանները փորձեցին մեքենան շարժել: Այստեղ ժամանեց ՃՈ տեսուչը և վարորդին հորդորեց մեքենան դուրս բերել, հակառակ դեպքում այն դուրս կհանեն տեխնիկայի միջոցով:

14:10
Ոստիկանները Հալաբյան փողոցից դուրս են հանել բեռնատարները: Այս մասին հայտնում է Panorama.am-ի թղթակիցը: Հիշեցնենք, որ երեք բեռնատարի վարորդները անջատել են մեքնենաների շարժիչները, կողպել դռներն ու միացել «Իմ քայլը» շարժմանը:

14:00

Նիկոլ Փաշինյանը բեռնատարների վարորդներին թևանցուկ քայլերթով շարժվում է դեպի Սեբաստիա փողոց: 
Նա ցուցարարներին պարբերաբար կոչ է անում հարգալից վերաբերմունք ցուցաբերել ոստիկանների նկատմամբ:
Փաշինյանը հայտարարեց, որ այսօր Ժամը 19:00-ին  հավաքվում են Հանրապետության հրապարակում: 
Մի շարք ճանապարհները շարունակում են փակ մնալ:

14:00
Նիկոլ Փաշինյանը բեռնատարների վարորդներին թևանցուկ քայլերթով շարժվում է դեպի Սեբաստիա փողոց: Նա ցուցարարներին պարբերաբար կոչ է անում հարգալից վերաբերմունք ցուցաբերել ոստիկանների նկատմամբ:

Փաշինյանը հայտարարեց, որ այսօր Ժամը 19:00-ին  հավաքվում են Հանրապետության հրապարակում: Մի շարք ճանապարհները շարունակում են փակ մնալ:

13:37
Այս պահին կաթվածահար է  Կիևյան կամուրջի և Հալաբյան փողոցի երթևեկությունը: Համալիրի մոտ կայանված էին երեք բեռնատարներ: Նիկոլ Փաշինյանը քայլերթի ընթացքում տեսնելով բեռնատարները՝ շարժվեց այդ ուղղությամբ: Նա ողջագուրվեց վարորդների հետ, և առաջարկեց փակել ճանապարհը:

Այսպիսով, բեռնատարներով փակեցին ճանապարհը: Փոխոստիկանապետ Վալերի Օսիպյանը վարորդներին ասաց, որ սխալ բան են անում: Նիկոլ Փաշինյանը ցուցարարներին կոչ արեց հավաքվել վարորդների շուրջը և նրանց հետ միասին շարունակում են երթը:

13:24
Երիտասարդները երթը շարունակում են Գրիգոր Լուսավորիչ փողոցով: Երթևեկությունը կաթվածահար է եղել: Արշակունյաց պողոտայի մի հատվածը, որը փակվել էր «Սինոփսիս» և այլ ընկերությունների աշխատակիցների կողմից, այս պահին  ոստիկանների միջամտությամբ բացվել է, իսկ վարորդները ազդանշաններով ողջունում են  նրանց:

Նիկոլ Փաշինյանն էլ ցուցարարների հետ հասել է Հալաբյան փողոց, բայց  դեռ հստակ  չի հայտարարվել, թե որ ուղղությամբ են շարժվում:

13:11
Երիտասարդները քայլերթով շարժվում են Խանջյան փողոց: Վարորդները ազդանշաններով ողջունում են ցուցարարներին: Չնայած հորդառատ անձրևին այս պահին երթեր են ընթանում մայրաքաղաքի տարբեր հատվածներում: Արշակունյաց պողոտան նույնպես լի է ցուցարարներով: «Սինոփսիս» ընկերության աշխատակիցները դուրս են եկել և փակել փողոցը:

12:50
Նիկոլ Փաշինյանը երթի մասնակիցների հետ հանգստանում է  «Արմենիա» ԲԿ-ի  հարակից այգում: Իսկ երիտասարդներն այս պահին քայլերթով շարժվում են Վարդանանց փողոցով: Նրանց հետ է «Իմ քայլը» նախաձեռնության անդամ Արմեն Գրիգորյանը:

12:22
Մայրաքաղաքի տարբեր փողոցներում երիտասարդները «Միացեք, միացեք» վանկարկումներով երթ են իրականացնում: Մաշտոցի պողոտայով շարժվում են Ամիրյան խաչմերուկ: Նիկոլ Փաշինյանն էլ ցուցարարների հետ քայլում է  Եղվարդի խճուղով:

11:55
Դավիթաշենում Նիկոլ Փաշինյանը լրագրողների հետ զրույցում ասաց, որ առանձին երևույթներ կլինեն, բայց ոստիկանության վերաբերմունքը ամեն րոպե, ամեն ժամ փոխվում է:

«Ես համոզված եմ, որ նրանք  մեր առաջ բացելու են Բաղրամյան 26-ի դռները»,- ասաց նա:
Ինչ վերաբերում է բերման ենթարկվածներին, Փաշինյանն  ասաց, որ իրենք զբաղվում են այդ հարցով:

Անդրադառնալով իշխանության հետ երկխոսությանը՝  «Իմ քայլը» շարժման առաջնորդը բացառեց դա. «Հայաստանում բայց իշխանություն կա՞, որ երկխոսենք, Հայաստանում այլևս իշխանություն չկա, Հայաստանում իշխանությունն այլևս ժողովուրդն է»,- նշեց նա:

Դիտարկմանը, թե ՀՀ նախագահ Արմեն Սարգսյանն է հրավիրել երկխոսության, Փաշինյանը պատասխանեց. «Արմեն Սարգսյանը որևէ բան առաջարկելուց առաջ  պետք է կատարի իր պարտավորությունն իմ առաջ ստանձնած: Նա պետք է ցույց տա տեղեկանք, թե որ թվին է ինքը հրաժարվել Մեծ Բրիտանիայի  քաղաքացիությունից։

11:50
Ֆեյսբուքյան օգտատերերից մեկը տեսանյութ է հրապարակել Ազատության պողոտայից, որտեղ երևում է՝ ինչպես են ցուցարարները փախչում  ոստիկանական «Երազ» մակնիշի մեքենայից: Ոստիկաններին չի հաջողվում նրանց հետ բերել։

Երևան-Աբովյան ճանապարհահատվածում ոստիկանությունը ուժեղացրել է հսկողությունը, նոր ուժեր են կենտրոնացվում մայրուղում ադ հատվածում: 

Ճանապարհին մի մեքենա էր կայանել, որ վարորդի ներկայացրածի՝ փչացել էր: Ոստիկանները հրելով այն դուրս բերեցին ճանապարհից: Վարորդը, որը անունը Մանվել է, ցույցերի ժամանակ հայտնի տղան է, որ իր ծանոթ ոստիկան Աշոտին ցուցարարների կողմն անցնելու կոչ էր անում: 

«Ազատություն» ռադիոկայանի լրագրողի հարցին, թե Աշոտի հետ հանդիպե՞լ է, Մանվելն ասաց, որ Աշոտը դեռ տուն չի եկել, ոչ էլ ընտանիքի անդամներն են տանը:

Հարցին, թե իր կոչն ինչ-որ բան փոխե՞ց, նա պատասխանեց. «Այնքանով բան փոխեց, որ ոստիկաններից շատերը դիմակով են կրում, որ շատերը չճանաչեն»:

Լրագրողի հետ զրուցելու ժամանակ նրանց մոտեցան քաղաքացիական հագուստով անձինք  և Մանվելին բերման ենթարկեցին:
 

10:45
Ցուցարարները Նիկոլ  Փաշինյանի ուղեկցությամբ  շարժվում են Դավթաշենի կամրջով:

10:30
Գյուլբենկյան փողոցում ցույցի մասնակիցներին մոտեցավ Երևանի փոխոստիկանապետ Վալերի Օսիպյանը: «Մի քանի ժամ չենք տեսնում արդեն կարոտում ենք»,- կատակեց Օսիպյանը:

Ի պատասխան Նիկոլ Փաշինյանն ասաց. «Արդեն ուրախանում ենք իրար տեսնելուց»:
Փոխստիկանապետը հետաքրքրվեց, թե ինչպես է Նիկոլ Փաշինյանը, արդյոք վիրակապը փոխե՞լ են, կարերը չե՞ն քանդում:

Հարցին, թե ինչ է ծրագրում Փաշինյանը, վերջինս պատասխանեց. «Ճիշտն ասած՝ «թավշյա հեղափոխություն» ենք ծրագրում»:

Փաշինյանը խորհրդակցելուց հետո որոշում կայացրեց  Գյուլբենկյան փողոցից քայլել դեպի Դավթաշեն:

10:15
Նիկոլ Փաշինյանը լրագրողներին հայտնեց, որ Երևանի տարբեր փողոցներ կամ փակվում են կամ փորձում են ցուցարարները փակել: Նրա խոսքով՝ այսօր որոշեցին կանգ առնել Գյուլբենկյան փողոցում և դա, ըստ նրա, ճիշտ քայլ էր:

«Սցենարի մասին խոսք չկա, սա ալիքաձև տարածվող գործընթաց է, իսկապես ժողովրդական թավշյա հեղափոխություն է և տարբեր դրսևորումներ է ունենում: Դրանց մասնակցում են ոչ միայն Հայաստանում ապրողները, այլև Սփյուռքը: Ուզում եմ առանձնահատուկ ընդգծել Ռուսաստանի և ԱՄՆ-ի հայ համայնքի ակտիվությունը, քանի որ ամենակտիվն այդ երկու համայնքներն են: Իհարկե դա հասկանալի է, քանի որ ավելի հայաշատ են: Շնորհակալություն Ռուսաստանի, ԱՄՆ-ի հայեր»,- ասաց Նիկոլ Փաշինյանը: 

Նա մեկ անգամ ևս շեշետեց, որ տեղի է ունենում թավշյա, ոչ բռնի ժողովրդական հեղափոխություն:

Անդրադառնալով բերման ենթարկվածներին՝ Նիկոլ Փաշինյանը նշեց, որ երեկ աննախադեպ թվով՝ 125 հոգի բերման է ենթարկվել ոստիկանություն, սակայն, ըստ նրա, պետք չէ բերման ենթարկվելն ընկալել որպես սարսափելի ինչ-որ բան. «Բերման ենթարկվելը նույնպես քաղաքացիական անհնազանդության մի դրսևորում է»: 

Ինչ վերաբերում է ակտիվիստ Տիգրան Մազմանյանի կալանավորմանը, նա նշեց, որ դատապարտում է այդ որոշումը. «Հանրային ռադիոյի հետ կապված բոլոր որոշումներն անձամբ ես եմ կայացրել, եթե իրավապահ մարմիններն ասելու բան ունեն՝ թող ինձ ասեն: Նաև հասկանալի է, որ նրանց խնդիրն է ակցիաների մասնակիցներին ճնշել, քանի որ խնդիրը ես չեմ, խնդիրը մարդիկ են և առանց քաղաքացիների մասնակցության այս գործընթացը ոչ մի արժեք չունի: Ուստի հասկանալի է, որ այս պահին  տակտիկական նկատառումներով ոչ թե ինձ են թիրախավորում,այլ՝ մասնակիցներին՝ բերման ենթարկելով»: 

Լրագրողի հարցին՝ դա հետևանք չի ունենա շարժման վրա, քանի որ Տիգրան Մազմանյանին խիստ պատիժ կարող է սպասվել, Նիկոլ Փաշինյանն արձագանքեց. «Կարծում եմ՝ չեն հասցնի իրադարձություններն այդ ուղղությամբ զարգացնել,  իրադարձությունները կզարգանան այլ ուղղությամբ և մենք առաջիկա օրերին դա կտեսնենք»:

10:00

Գյուլբենկյան փողոցում Նիկոլ Փաշինյանը վարորդներին կոչ արեց կայանել մեքենաներն ու փակել ճանապարհը:

Նրան մոտեցավ ոստիկանության գնդապետն ու ասաց, որ բացեն ճանապարհը.  «Ես խնդրում եմ՝ այն մեքենաները,  որոնց հորդորել եք, որ փակեն ճանապարհը, հիմա հորդորեք, որ բացեն ճանապարհը»:

Ի պատասխան՝ Փաշինյանն ասաց. «Բայց ես արդեն հորդորեցի «պրծա», պարոն գնդապետ: Գոնե Դուք իմ ձայնը խնայեք, էդքան որ խոսեմ ձայնս կկտրվի»:

Պատգամավորի խոսքով՝ հավաքված մարդիկ իրենց բողոքն են հայտնում, և այդ բողոքը կապված է Սերժ Սարգսյանի և նրա գործողությունների հետ, իսկ լարվածությունն առաջանում, որ ոստիկանությունը հանդես է գալիս որպես իշխանության ներկայացուցիչ:

«Մարդիկ ձեզ սկսում են նույնացնել կոռումպացված, փտած համակարգի հետ: Որ պահին դուք հայտարարեք, որ դուք այդ իշխանության ներկայացուցիչը չեք, այդ կոռումպացված համակարգի ու Սերժ Սարգսյանի ներկայացուցիչը չեք, այս լարվածությունը կվերանա»,- ասաց Փաշինյանը:

Ոստիկանության գնդապետն ասաց, որ խոսքը ոչ թե բողոքի, այլ բողոքի ձևի մասին է:

«Ոչ մեկը ձեզ չի արգելում արտահայտվել կամ ձեր իրավունքներից օգտվել: Խոսքը վերաբերում է դրանց օգտագործման ձևին, յուրաքանչյուրն իր իրավունքը պետք է օգտագործի այնպես, որքանով չի ոտնահարում այլոց իրավունքը»:

9:40
Գյուլբենկյան փողոցում ցուցարարներին միացավ «Իմ քայլը» նախաձեռնության առաջնորդ, ԱԺ պատգամավոր Նիկոլ Փաշինյանը: Տեսնելով  ոստիկանական էվակուատորը՝ նստեց նրա դիմաց՝  փորձելով խոչընդոտել իրավապահների աշխատանքը: Մի պահ փողոցում իրավիճակը լարված էր, Փաշինյանը կոչ արեց  ագրեսիվություն չդրսևորել:

«Բացառիկ հարգալից վերաբերմունք ցուցաբերեք ոստիկանների նկատմամբ, ոչ մի բան մի ասեք,  ագրեսիվություն մի դրսևորեք»,- ասաց Փաշինյանը:

Նա կոչ արեց ցուցարարներին գալ Գյուլբենկյան փողոց և փակել ճանապարհը:Այս հատվածում ոստիկանությունն ուժեր է կենտրոնացրել:

8։ 54
Վաղ առավոտից «Իմ քայլը» նախաձեռնության անդամները  սկսել էին ճանապարհներ փակել:  Մասնավորապես, նրանք փորձում էին փակել Հանրապետության հրապարակ տանող ճանապարհները, Ամիրյան փողոցը: Այդ հատվածում Ճանապարհային ոստիկանության ծառայողները կարգավորում են երթևեկությունը:

Հանրապետության հրապարակում էր նաև ակտիվիստ Դավիթ Սանասարյանը, որն ուղիղ եթերով ներկայացնում էր իրենց գործողությունները: Սակայն ոստիկանության ծառայողները  նրան բերման ենթարկեցին: Նա այդ ընթացքում բղավում էր՝ ես ձեզ սիրում եմ, թեկուզ խփեք ինձ, միևնույն է սիրում եմ։ Այդ ամենը  ֆեյսբուքյան իր էջում հենց ուղիղ եթերի միջոցով ցույց էր տալիս Դավիթ Սանասարյանը: