Ձեր վստահելի աղբյուրը

18:50
Մաշտոց-Ամիրյան խաչմերուկում գրեթե երեք ժամ լարված իրավիճակ էր:

Ոստիկանները բացում էին Մաշտոցի պողոտան, ակտիվիստները նորից փակում էին այն: Բողոքի ակցիա իրականացնելուց հետո ցուցարարները շարժվեցին Հանրապետության հրապարակ, որտեղ ժամը 19:00-ին տեղի կունենա հանրահավաք:

18:34
Մաշտոց-Ամիրյան խաչմերուկում ոստիկանների և ցուցարարների միջև լարվածությունը պահպանվում է:

Ոստիկանական մեծ խմբի ժամանումից հետո նրանք երկու մայթերի երկայնքով շղթա են կազմել՝ թույլ չտալով, որ քաղաքացիներն անցնեն փողոցը:

Նշենք, որ երթի մասնակիցները ընտրել էին հետևյալ մարտավարությունը՝  կանաչ լույսի ներքո փողոցն անցնելու պատրվակով հասնում էին փողոցի կենտրոնական հատվածն ու կանգնում: Ոստիկանները նրանց ուժով հեռացնում էին:

Երթևեկությունը կաթվածահար է, չնայած ոստիկանների միջամտությանը՝ փակ է Ամիրյան-Մաշտոց խաչմերուկը:

Բողոքի ակցիայի մասնակիցների թիվը գնալով ավելանում է:

Քիչ առաջ նրանց միացավ ցուցարարների նոր խումբ և միասին շարժվեցին դեպի Հանրապետության հրապարակ:

17:50
Մաշտոց-Ամիրյան խաչմերուկում քաոսային վիճակ է: Ոստիկանները լրացուցիչ ուժերի օգնությամբ փորձում են բացել պողոտայի այդ հատվածը, որը պարբերաբար փակում են ցուցարարները: Ոստիկանները մի քանի երիտասարդի բերման ենթարկեցին, սակայն հայտնվեցին նորերը և նրանց էլ կրկին «բերման են ենթարկում»:

Փողոցը բացելուց հետո երթի մասնակիցները նստացույց սկսեցին՝  ի նշան կարմիր բերետավորների գործողությունների:

Ոստիկանները փորձեցին նրանց հեռացնել ճանապարհից, բայց տարիքով մարդիկ թույլ չեն տալիս երիտասարդներին ձեռք տալ և բոլորով միասին սկսեցին վանկարկել՝ «Ոստիկանը մերն ա, ոստիկանը մերն ա»:  

Մաշտոցի պողոտայում կարմիր բերետավորների թիվն ավելացավ, նրանք հեռացրերին նստացույց անողներին և պատ կազմեցին մայթի մոտ՝ թույլ չտալով երթի մասնակիցներին անցնել փողոցը:  Ոստիկանների և երիտասարդների միջև հրմշտոց սկսվեց: Մի քանի երիտասարդի բռնի ուժով բերման ենթարկեցին:

Քաղաքացիները փորձում են միջամտել, որ երիտասարդներին բերման չենթարկեն, բայց ապարդյուն:

17:00
Նիկոլ Փաշինյանի գլխավորած երթը հասավ Մանկական զբոսայգի՝ Կոմայգի:  «Իմ քայլը» նախաձեռնության առաջնորդն ասաց, որ ցուցարարները մտնեն այգի և հանգստանան:

Դրան զուգահեռ ցուցարարների մի խումբ փակել է Ամիրյան-Մաշտոց խաչմերուկը: Նրանք «Միացեք, միացեք» վանկարկումներով կոչ են անում միանալ իրենց երթին: Երբ ոստիկանը նրանց հորդորեց շարունակել ճանապարհը, ակտիվիստները սկսեցին վանկարկել՝ «Ոստիկանը մերն ա»:

Այս հատվածում ևս երթևեկությունը կաթվածահար է, վարորդներն ազդանշաններով ողջունում են  ցուցարարներին:

Նշենք, որ այսօր առավոտից ակտիվիստները քաղաքի տարբեր փողոցներում փորձում են փակել փողոցները, այդ թվում՝ մեքենաներով: Դրա պատճառով  լարված իրավիճակ է առաջանում ցուցարարների և ոստիկանների միջև: Մեծ թվով ոստիկաններ են ժամանում տվյալ վայրեր, փորձում են բացել փողոցները:

Ոստիկանները, այդ թվում՝ քաղաքացիական հագուստներով, «բերման են ենթարկում» ցուցարարներին:

17:00
Ցուցարարը ոստիկանին՝ «Ես հաջորդով կգամ, էլի»:

16:30
«Այսօր մեր ակցիաները հաջողվել են»,- այս մասին «Ազատություն» ռադիոկայանի հետ զրույցում ասաց  «Իմ քայլը» նախաձեռնության առաջնորդ, ԱԺ պատգամավոր Նիկոլ Փաշինյանը:

Նրա խոսքով՝ այսօր իրենց գործողությունների թափը, ծավալը կրկնապատկվել է հանրապետության ողջ տարածքով:

«Մենք  շարունակում ենք նույն քաղաքական գծի մեջ մնալ, և մեր գործողություններում բացառվելու է բռնությունը: Եթե նույնիսկ ոստիկանները բռնություն են գործադրում մեր կողմնակիցների նկատմամբ, մենք բռնությամբ չենք պատասխանելու: Մենք ունենք մեր հանրության 80 տոկոսի աջակցությունը և Սերժ Սարգսյանը պետք է հեռանա, այստեղ երկրորդ կարծիք լինել չի կարող»,- ասաց Նիկոլ Փաշինյանը:

Հարցին, թե այսօր ոստիկանություն բերման ենթարկվածների թիվը հասել է շուրջ 200-ի, ինչո՞վ կբացատրի դա, նա նշեց, որ դա պայմանավորված է մասնակիցների թվի աճով:

«Ինչքան շատ են ցույցի մասնակիցները, այնքան մեծ է բերման ենթարկվածների թիվը: Հայաստանի քաղաքացին ազատագրված է, և նրան հնարավոր չէ կանգնեցնել»,- ընդգծեց նա:

15:40
Այս պահին երթևեկությունը կաթվածահար է մայրաքաղաքի մի շարք փողոցներում՝ Գարեգին Նժդեհ հրապարակում, Սեբաստիա փողոցում,  Արշակունյաց, Մաշտոցի  պողոտաներում: Ցուցարարները տարբեր խմբերով քայլում են Երևանի փողոցներով: Ոստիկանները շարունակում են «բերման ենթարկել» երիտասարդներին:

Նշենք, որ Նիկոլ Փաշինյանը Գյուլբենկյան փողոցից քայլերթով շարժվեց Դավիթաշեն, Հալաբյան, Սեբաստիա փողոցներ, ողջունեց  Մալաթիայի տոնավաճառի  աշխատողներին, որոնք հավաքվել էին ցուցարարներին դիմավորելու:

Այժմ ցուցարարները քայլում են Իսակովի պողոտայում:

15:26
Արշակունյաց պողոտայում լարված իրավիճակ է: 

Մեկ մեքենա ևս հորիզոնական կանգնեց և չի շարժվում: Ոստիկանները փորձում են քարշակի օգնությամբ մեքենաները դուրս բերել: Դանիել Իոննիսյանը նշեց, որ եթե մեքենայում մարդ կա, ապա չեն կարող մեքենան քարշակով դուրս հանել: Սակայն ոստիկանները մեքենաները փողոցի երթևեկելի հատվածից դուրս բերեցին:

Դրանից հետո ևս մեկ մեքենա փորձեց կանգնել, բայց ոստիկանները բռնի ուժով  մեքենայից դուրս հանեցին վարորդին: Նրան փորձեցին մտցնել ոստիկանական մեքենա, սակայն  տղամարդու ինքնազգացողությունը վատացավ: Մարդիկ ոստիկաններին հորդորում են բաց թողնել այդ տղամարդուն, սակայն ուժով մտցրեցին մեքենա և տարան ոստիկանություն: 

Նրա մեկ կոշիկը մնաց փողոցում: