ՀՀ նախագահ. Պատրաստակամ եմ հանդիպել Նիկոլ Փաշինյանի հետ

17:41 21/04/2018 Հայաստան

ՀՀ նախագահ. Պատրաստակամ եմ հանդիպել Նիկոլ Փաշինյանի հետ

Հայաստանի Հանրապետության Նախագահ Արմեն Սարգսյանն այսօր հայտարարություն է տարածել երկրի ներքաղաքական իրավիճակի վերաբերյալ: ՀՀ նախագահի պաշտոնական էջի փոխանցմամբ, հայտարարության մեջ ասված է.

«Սիրելի հայրենակիցներ,

Իմ խոր անհանգստությունն եմ հայտնում Հանրապետությունում ստեղծված իրավիճակի կապակցությամբ:

Օդի մեջ կախված անհանդուրժողականությունը հասել է գագաթնակետին: Ինձ խորապես անհանգստացնում է երկխոսության առաջարկի մերժումը, որը կարող է հանգեցնել առճակատման:

Ուստի դիմում եմ բոլորին՝ մի պահ կանգ առնելև սթափ մտածել, թե ինչ հետևանքների կարող է հանգեցնել այս դիմակայությունը:

Սա քաղաքական կոչ չէ, այլ դիմում եմ ձեզ որպես ծնող, որպես բարեկամ և որպես հայ մարդ:

Կոչ եմ անում բոլորին՝ ցանկացած քայլ անելուց առաջ հանդես բերել ծայրահեղ զսպվածություն և պատասխանատվություն, խստորեն հետևել օրենքի ոգուն և տառին, դուրս չգալ Հայաստանի քաղաքացու իրավունքների և պարտականությունների շրջանակից, դուրս չգալ ձեր պաշտոնական իրավասությունների շրջանակից:

Քաղաքական ցանկացած պահանջ, ինչքան էլ այն հիմնավոր թվա, եթե վտանգելու է քաղաքացու առողջությունն ու կյանքը, դառնում է իմաստազուրկ:

Ցավոք, մենք դրա փորձն ունենք և թույլ չպետք է տանք այն կրկնվելու:

Չեն լինելու հաղթողներև պարտվողներ, տուժելու ենք բոլորս, տուժելու է երկիրը:

Անհրաժեշտ է պարպել լարվածությունը: Չպետք է թույլ տալ, որ կողմերին բաժանող անջրպետը հնարավոր չլինի կամրջել:

Ուստի, պատրաստակամ եմ հանդիպելու Ազգային ժողովի պատգամավոր Նիկոլ Փաշինյանի հետ՝ առկա լարվածությունը քաղաքական ուժերի երկխոսության միջոցով մեղմելու նպատակով»:

Հարակից հրապարակումներ`

Արմեն Սարգսյան. Ես հրավիրում եմ կողմերին երկխոսության՝ ստեղծված վիճակից լավագույն ելք գտնելու համար

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: