Ձեր վստահելի աղբյուրը

18:27
Ցույցի մասնակիցներին է միացել «Ժառանգության» առաջնորդ Րաֆֆի Հովհաննիսյանը: Նա արյունահեղությունից զերծ մնալու կոչ արեց:

«Ես հպարտությամբ ներկա եմ այսօր՝ որպես շարքային քաղաքացի, գալու են դժվարին օրեր մեր առջև, բայց անխուսափելի է մեր հաղթանակը»,- ասաց նա:
Հովհաննիսյանն ասաց, որ պետք է ազատ արձակվեն պատգամավորները, բոլոր բերման ենթարկվածները:

Հարցին՝ միանու՞մ է թավշյա հեղափոխությանը, նա պատասխանեց. «Թավշյա ասես, թե սահմանադրական, սա ժողովրդական շարժում է, որը տասնամյակներ ուժի մեջ է»:

Հովհաննիսյանը նաև չբացառեց, որ հանրահավաքի ժամանակ կարող է հարթակ բարձրանալ, մեկ-երկու խոսք ասել:

17:29
Ցուցարարները շարժվում են դեպի Հանրապետության հրապարակ: Տեր Զաքարիա վարդապետ Բաղումյանը նշեց, որ իրենց՝ երթին մասնակցելու նպատակը խաղաղության կոչն է:

«Հույս ունենք, որ խոհեմությունը, իմաստնությունը և զգոնությունը պիտի հաղթեն: Երկու կողմերում էլ մեր եկեղեցու զավակներն են, մեր քարոզը սիրո, երկխոսության քարոզն է»,- ասաց նա:

Տեր Զաքարիան հայտնեց, որ շարունակելու են մնալ ցուցարարների կողքին, ընթացքում իրենց նոր հոգևորականներ կմիանան: Նա տեղեկացրեց, որ իրենց այդտեղ է առաքել Ամենայն Հայոց Կաթողիկոսը: 

17:16
Տեր Շահե քահանա Հայրապետյանը շարունակում է մնալ ցուցարարների կողքին: Նա նշեց, որ հուսով է՝ «ամեն ինչ խաղաղությամբ կավարտվի, հայը հայի արյուն չի թափի, և որ բոլորը խոհեմ կգտնվեն»:

16:54
Ցույցի մասնակիցներին է միացել «Ժառանգություն» կուսակցության անդամ Արմեն Մարտիրոսյանը: Նա նշեց, որ ամենասկզբից էլ համոզված է եղել՝ «Մարտի 1» չի կրկնվելու, կարող են բռնություններ լինել, բայց կրակոց չի լինելու՝ մի շարք պատճառներով. այլ է թե միջազգային իրադրությունը, թե ներքին իրավիճակը:

16:33
«Քաղաքացիական պայմանագիր» կուսակցության անդամ Ալեն Սիմոնյանը Էրեբունիում ցուցարարների առաջ ելույթ ունենալով՝ կոչ արեց բախման չգնալ ոստիկանների հետ: Նա տեղեկացրեց, որ երթով շարժվելու են դեպի Հանրապետության հրապարակ: Սիմոնյանն ասաց, որ իր տեղեկություններով՝ Էրեբունիում է Նիկոլ Փաշինյանը:

16:18
Շենգավիթի ոստիկանության առջև հավաքվել են ցուցարարները և վանկարկում են այսօր ձերբակալված պատգամավորների անունները, ովքեր, ըստ որոշ տեղեկությունների, հենց այստեղ էին բերվել:

Փաստաբան Նիկոլայ Բաղդասարյանը տեղեկացրել է, որ Շենգավիթի ոստիկանությունում խուզարկել են Արարատ Միրզոյանին և Սասուն Միքայելյանին, նրանց մոտ որևէ անօրինական իր չի հայտնաբերվել:

15:44
Մայրաքաղաքի փողոցներով քայլերթը շարունակվում է: Այժմ Քոչարի փողոցից դուրս եկան Տիգրան Մեծ և շարունակում են քայլել դեպի Էրեբունի:

Էրեբունու շրջանում արդեն մի քանի ժամ կանգնած ցուցարարներին միացան հեծանվորդներ:

15:04
Ցույցի մասնակից մի շարք քաղաքացիներ բողոքում են, որ ոստիկաններից հարվածներ են ստացել: Նրանց խոսքով՝ օգտագործել են նաև էլեկտրաշոկ, ոստիկանական մահակներ:

Շենգավիթ վարչական շրջանում ոստիկանական լրացուցիչ ուժեր են կենտրոնացվում: Ոստիկանները վահաններով են:

14:06
Փաստաբան Նիկոլայ Բաղդասարյանը, ով Ոստիկանության Շենգավիթ բաժնում էր, հայտնեց, որ իրեն թույլ չտվեցին տեսակցել այնտեղ պահվող պատգամավոր Արարատ Միրզոյանի հետ:

13:38
Հանրապետության հրապարակում ոստիկանները բերման են ենթարկում քաղաքացիների: Ոստիկաններն ընդառաջեցին ցուցարարներից մեկի կոչին և հանեցին դիմակները:

13:32
Ցույցի մասնակիցները որոշեցին երթը շարունակել Էրեբունու ներքին փողոցներով:

Ըստ որոշ տեղեկությունների՝ պատգամավոր Արարատ Միրզոյանը Երևան քաղաքի ոստիկանության Շենգավիթի բաժնում է: Տեղեկությունները Միրզոյանի կինն էր ասել «Ազատությանը»:

Հանրապետության հրապարակը շրջափակել են ոստիկանական ուժերը:

Ոստիկանները հրապարակում շղթա են կազմել, զուգահեռաբար բարձրախոսով տեղեկացնում են, որ հավաքն օրինական չէ:

Ոստիկանները երթին միացած հոգևորականներին հորդորում են՝ երթի մասնակիցներին «տուն ուղարկել»:

12:48
«Իմ քայլը» նախաձեռնության երթը շարունակվում է, սակայն՝ առանց քաղաքական առաջնորդի: Ցուցարարներն այժմ Արշակունյաց պողոտայում են: Նրանց մեջ է նաև Նիկոլ Փաշինյանի կինը՝ Աննա Հակոբյանը:

Ցուցարարների երթի դիմացից  այժմ հոգևորականներ են քայլում, ովքեր աղոթք են կարդում, խաչակնքվում:

Երթին միացած հոգևորականների թվում են Տեր Շահե քահանա Հայրապետյանը, Տեր Ասողիկ քահանա Կարապետյանը, Տեր Զաքարիա վարդապետ Բաղումյանը և ուրիշներ:

12:06
Լրագրողներին մոտեցավ Նիկոլ Փաշինյանի կինը՝ Աննա Հակոբյանը, ով նշեց, որ ամուսնու կարգավիճակի ու պահման վայրի մասին տեղեկություններ չունի:

Նա ասաց, որ իրավապահների՝ Փաշինյանին տանելու մասին տեղեկացել է հենց նոր: Հարցին՝ մտավախություն չունի՞ իր և ընտանիքի անդամների անվտանգության հարցով, նա ասաց. «Ոչ, երբեք չեմ ունեցել և հիմա էլ չունեմ»:

Լրագրողները հետաքրքրվեցին՝ պատրա՞ստ է ղեկավարել շարժումը, ի պատասխան՝ Հակոբյանը նշեց. «Չէ, իհարկե ոչ, ես չեմ կարող շարժում ղեկավարել: Ես մեկն եմ այստեղ հավաքվածներից, ոչ մի կազմակերպչական հարցի չեմ կարող պատասխանել»:

Տեղեկություններ են հայտնվում, որ ոստիկանները բերման են ենթարկել նաև պատգամավոր Արարատ Միրզոյանին:

Նշենք՝ Հայաստանի Սահմանադրության 96-րդ հոդվածը սահմանում է.

«Պատգամավորի նկատմամբ քրեական հետապնդում կարող է հարուցվել միայն Ազգային ժողովի համաձայնությամբ: Պատգամավորն առանց Ազգային ժողովի համաձայնության չի կարող զրկվել ազատությունից, բացառությամբ երբ նա բռնվել է հանցանք կատարելու պահին կամ անմիջապես դրանից հետո: Այս դեպքում ազատությունից զրկելը չի կարող տևել յոթանասուներկու ժամից ավելի: Պատգամավորին ազատությունից զրկելու մասին անհապաղ տեղեկացվում է Ազգային ժողովի նախագահը»:

11:53
Ոստիկանությունը սկսել է բերման ենթարկել ցույցի մասնակից քաղաքացիներին: Դիմակավորված ոստիկանները տարան նաև պատգամավոր Սասուն Միքայելյանին:

11: 45
Ոստիկանները փակեցին ցուցարարների ճանապարհը: Բախումներ ու հրմշտոց սկսվեց ցուցարարների ու ոստիկանների միջև: Լսվում են պայթյուններ, որից հետո ծուխ է բարձրանում:

 Արցախի փողոցում հատուկ միջոցներ են կիրառում:

Նիկոլ Փաշինյանին ուժայինները տարան: Նրա կարգավիճակի վերաբերյալ տեղեկություններ չկան:

Ոստիկանությունը կրկին միջոցներ է ձեռնարկում՝ ցույցը հետ մղելու համար:

Ցուցարարներին դիմելով՝ «Ելք» խմբակցության անդամ Սասուն Միքայելյանը նշեց. «Մեր ցույցը խաղաղ է, ոչ մեկդ չցրվեք: Եթե ուզում եք մնալ նույն Հայաստանում՝ դուք մտածեք, կոչ եմ անում մնալ տեղերում: Մենք պիտի համախմբված՝ Նիկոլին ազատենք»