Ձեր վստահելի աղբյուրը

«Իշխանությունը չի կարող ադեկվատ պատկերացում չունենալ: Բոլոր այն գործողությունները, որոնք ձեռնարկվում են իշխանության կողմից,  դրանք հենց իրավիճակին համարժեք են: Իշխանության ադեկվատության հարցը քննարկման առարկա անգամ չի կարող լինել»: Այս մասին «Շանթ» հեռուստաընկերության եթերում հայտարարեց ԱԺ Հանրապետական խմբակցության անդամ Գևորգ Կոստանյանը:

Հարցին, թե Հայաստանում կա՞ն բավարար թվով ոստիկաններ, բողոքի ակցիաների մասնակիցներին ցրելու համար, ԱԺ պատգամավորը պատասխանեց.

«Մարդկանց քանակը չի նշանակում միջոցների անհնարինություն: Չասենք իշխանությունը, ասենք` պետությունն ունի բոլոր ռեսուրսները հասարակական ու սահմանադրական կարգը պաշտպանելու համար»:

Դիտարկմանը, թե ումի՞ց է պաշտպանելու, Կոստանյանն արձագանքեց. «Խնդիրը հետևյալի մեջ է. հասարակական կարգի պաշտպանությունը պետության պարտականությունն է: Այն պետությունն ունի անկախ այն հանգամանքից, թե ով է իշխանություն, ով` ընդդիմություն: Եթե վաղը որևէ ընդդիմություն դառնա իշխանություն, ինքն էլ է պարտավոր պաշտպանել հասարակական կարգը: Պետությունն այսօր ունի այդ պարտավարությունը բոլորի ու ցանկացածի համար հասարակական կարգը պաշտպանելու համար, պետությունը պարտավորություն ունի ցուցարարների ու ցույցի մասնակից չհանդիսացող անձանց իրավունքների պաշտպանության տեսանկյունից»:

Հարցազրույցը վարող Արամ Աբրահամյանը նկատեց, որ ցուցարարների իրավունքները կարծես թե չպաշտպանվենցին, նրանց նկատմամբ ուժ կիրառվեց:

Ի պատասխան Կոստանյանն ասաց. «Ես չեմ կարող այս պահին գնահատական  տալ բոլոր դեպքերին, բայց կարող եմ ասել, որ ուժի կրառումը շատ ժամանակ նաև պարտավորություն է, դա սահմանված է «Ոստիկանության մասին» օրենքով, դա միայն  Հայաստանին չէ բնորոշ կամ միայն Հայաստանի իրավական համակարգով չէ սահմանված, դա աշխարհում, ցանկացած պետության մեջ ընդունված կանոն է, սկզբունք, որ ոստիկանությունն իր պարտավորությունների կատարումն ապահովելու համար այդ թվում իրավասու է ֆիզկիկական ուժ, հատուկ միջոցներ և զենք կիրառել: Յուրաքանչյուր կոնկրետ դեպքում կիրառված ֆիզիկական ուժը կամ հատուկ միջոցների կիրառման իրավաչափության հարցն այլ խնդիր է, վստահ եմ այս գնահատականը կտան իրավապ մարմինները»:

ԱԺ պատգամավորի խոսքով, սխալ պատկերացում ու կարծիք է, եթե ցույցերը խաղաղ են կարող են շարունակվել անընդհատ.
«Բոլորն ասում են, որ ցույցը խաղաղ է, բաց ձեռքերով  է: Ցույցի խաղաղ լինելը դեռևս չի նշանակում անսահմանափակ հնարավորություններ:  Եվրոպական կոնվենցիայի 11-րդ հոդվածը երաշխավարում է քաղաքացիների խաղաղ ցույցի իրավունքը, իսկ երկրորդ մասով սահմանում է,  որ թիվս այլ հանգամանքների, այլ անձանց իրավունքների պաշտպանության նկատառումներից ելնելով սահմանում է սահմանափակումներ: Այն, որ այդ ցույցը խաղաղ է, չի նշանակում, որ այն անընդհատ պետք է իրականացվի: Պետությունը պարտավորություն ունի Կոնվենցիայի 11-րդ հոդվածի 2-րդ մասի կոնտեքստում այլոց իրավունքների պաշտպանության նկատառումներից ելնելով սահմանափակել  նաև խաղաղ ցույցի անցկացումը»:

Հարցին, թե այս դեպքում այլոք ովքե՞ր են, հանրապետական պատգամավորը նշեց` ցույցերին չմասնակցող մարդիկ:

«Մենք չենք կարող պնդել, որ Հայաստանի բոլոր քաղաքացիները ցույցի մասնակից են: Հետևաբար այն մարդիկ, ովքեր ցույցի մասնակից չեն ևս ունեն իրավունքներ: Անկախ այլ անձանց բողոքի առկայությունից պետությունը պարտավոր է պաշտպանել հասարակական կարգը, ազատ տեղաշարժի, հանգստի իրավունքը:  Եթե անգամ  ՀՀ բնակչության 90 տոկոսը ցույցի մասնակից լինի, պետությունը պարտավոր է մյուս 10 տոկոսի պաշտպանության նկատառումներից ելնելով սահմանափակել ցույցերի անցակցումը»,-ասաց նա: