Ձեր վստահելի աղբյուրը

Եվրոպայի խորհրդի խորհրդարանական վեհաժողովի կողմից ստեղծված կոռուպցիան ուսումնասիրող Արտաքին հետաքննության մարմինը ապրիլի 22-ին հրապարակել է իր զեկույցը, որը գրեթե ամբողջությամբ վերաբերում է ԵԽԽՎ-ում Ադրբեջանի կողմից լոբբիստական աշխատանքներին ու ԵԽԽՎ պատգամավորներին կաշառելու գործընթացին։

Զեկույցում անդրադարձ կա նաև մի քանի այլ երկրների գործունեությանը, որոնց թվում է Հայաստանը, Ռուսաստանը, Թուրքիան, Ուկրաինան, Մոնտենեգրոն, Ղազախստանը, Մակեդոնիան։

Զեկույցում Հայաստանին վերաբերող հատվածում ասվում է, թե իբր ԵԽԽՎ-ում Հայաստանի պատվիրակության անդամները ցանկացել են կաշառել ուկրաինացի զեկուցող Վոլոդիմիր Արիևին՝ նրան  առաջարկելով թանկարժեք կոնյակ, որպեսզի նա լրագրողների նկատմամբ զեկույցից հանի  հատվածը, որում Լեռնային Ղարաբաղը ներկայացվում էր որպես Ադրբեջանի տարածք։ Արիևն ասել է, որ մերժել է կոնյակն ու ասել, թե հաջորդ օրը հայերը սկսել են տարածել, թե իր տատիկը ադրբեջանցի է ու ինքն էլ Ադրբեջանի նախագահ Ալիևի գործակալը։

Նշենք, որ Արիևին «կաշառելու» հետ կապված ԵԽԽՎ պատվիրակության անդամները մեկնաբանություններ տվել են ու հերքել այն։ Իսկ ինչ վերաբերում է նրա տատիկին ադրբեջանցի անվանելուն, ապա այդ մասին ոչ թե հայերն էին ասել, այլ հենց Արիևը՝ ադրբեջանական կայքին տված հարցազրույցում, որում նաև «սեր է խոստովանում» Ադրբեջանին և նրա ղեկավարությանը։

Հետաքննության մարմին ԵԽԽՎ շվեյցարացի պատգամավոր Մարթին ասել է, որ իր նախկին գործընկեր Ջոն Պրեսկոտը, ով Հայաստանի հարցով համազեկուցող է եղել, իրեն պատմել է, որ հյուրանոցի իր սենյակում մի անգամ նվեր է եղել՝ արծաթյա իր, 1000-ից 2000 եվրո արժողությամբ, ինչը Պրեսկոտն առանց մտածելու վերցրել է։ Պարոն Մաթին այնուհետ Փարիզում Պրեսկոտին ու ՀՀ պավիրակության ղեկավարին ասել է, որ սա դեմ է ԵԽԽՎ էթիկայի կանոններին։ Մաթին նաև նշել է, որ տեղյակ է նվերներ անելու մշակութային պատճառների մասին։
​
Ադրբեջանցի լոբբիստ Ալան Դեստեքսն էլ հետաքննության մարմնին ասել է, թե մի անգամ լսել է, թե ինչպես է ֆրանսիացի պատվիրակը հեռախոսով խոսելիս ասել է, որ «իր հայ ընկերների» համար մի փոփոխություն է ներկայացրել։

Լեռնային Ղարաբաղի հետ կապված զեկույցով հայտնի դարձած ադրբեջանի մեկ այլ լոբբիստ Ռոբերտ Ուոլտերն էլ ասել է, թե ԵԽԽՎ-ում հայկական լոբբին ավելի նուրբ է, քան ադրբեջանականը։ Նա ասել է, թե իր զեկույցի համար, որը վերնագրել էր «Բռնության աճը Լեռնային Ղարաբաղում և Ադրբեջանի այլ օկուպացված տարածքներում», հայերը  իրեն մերժել են վիզա տրամադրել։

Եվս մեկ դեպք է ներկայացրել ԵԽԽՎ-ում Շվեդիայի նախկին պատգամավոր Գորան Լինդբլադը, ասելով, թե մի անգամ հայկական պատվիրակությունն իրեն «ՎԻՊ վերաբերմունք է» ցույց տվել՝ Հայաստանի ժողովրդավարության հետ կապված ֆորում անցկացնելու համար, ինչն ինքը մերժել է։