Ձեր վստահելի աղբյուրը

Միջազգային մամուլն ակտիվ անդրադարձել է ՀՀ վարչապետ Սերժ Սարգսյանի հրաժարականին: Agence France-Presse գործակալությունը   գրել է, որ Հայաստանի վարչապետ Սերժ Սարգսյանը հրաժարական է տվել երկրում ծավալված զանգվածային բողոքի ցույցերից հետո:

Euronews-ը   գրել է, որ Սերժ Սարգսյանը երկուշաբթի հայտնել է, որ հրաժարական է տալիս այն բանից հետո, երբ ամբողջ երկրում մեկ շաբաթ շարունակ բողոքի լայնածավալ ակցիաներ էին կազմակերպվում:  Լրատվամիջոցը մասնավորապես մեջբերել է Սերժ Սարգսյանի խոսքն առ այն, որ «Ներկայիս իրավիճակում մի շարք լուծումներ կան, բայց ես չեմ ընտրի դրանցից ոչ մեկը: Դա իմ ոճը չէ: Ես լքում եմ երկրի ղեկավարի և վարչապետի պաշտոնը: Պայքարը փողոցներում դեմ է իմ պաշտոնավարմանը: Ես կատարում եմ ձեր պահանջը։ Խաղաղություն, ներդաշնակություն և տրամաբանություն մեր երկրին»: Ընդգծվել է, որ մինչ այդ կալանավորված Նիկոլ Փաշինյանն ազատվել է: Նրա կողմնակիցները նշել են այդ իրադարձությունը Երևանի փողոցներում:

Radio Free Europe-ի  փոխանցմամբ՝ Նիկոլ Փաշինյանին ազատ արձակելուց հետո Հայաստանի վարչապետ Սերժ Սարգսյանը հրաժարական է տվել: Ծառայությունը հատուկ ուշադրություն է հրավիրում այն հանգամանքի վրա, որ ցուցարարների վերջնական հաղթանակը հետխորհրդային տարածքում խաղաղ քաղաքացիական անհնազանդության հետևանքով խոշոր քաղաքական փոփոխության հազվագյուտ օրինակ կլինի: Ծառայությունը նկատում է, որ այս պահին Երևանի Մաշտոցի պողոտայում ցուցարարները տոնում  են իրենց հաղթանակը:

Reuters գործակալությունը  և CNN հեռուստաալիքը  նույնպես անդրադարձել են վարչապետ Սերժ Սարգսյանի հայտարարությանը՝  նկատելով, որ այս քայլին Սարգսյանը գնացել է հանրապետությունում խաղաղությունը պահպանելու նպատակով։

Associated Press գործակալություն գրել է, որ Երևանում մարդիկ դուրս են եկել փողոցներ՝ տոնելու հաղթանակը: Մարդիկ գրկում են միմյանց, համբուրում, վարորդները ձայնային ազդանշաններ են արձակում:

The Guardian-ը ևս է Հայաստանում տեղի ունեցող իրադարձությունների՝ մեջբերելով Սերժ Սարգսյանի հրաժարականի այն հատվածը, որում նախկին վարչապետն ասել է. «Փողոցի շարժումն իմ պաշտոնավարման դեմ է։ Ես կատարում եմ ձեր պահանջը»։