Ձեր վստահելի աղբյուրը

12:56
Այս պահին փակ է Սևան-Գագարին ճանապարհը: Սևանցիները պատրաստվում են երթով գնալ Երևան: Այնտեղ է Սևանի քաղաքապետ Սարգիս Մուրադյանը, որը փորձում է հանգստացնել սևանցիներին և հորդորում է բացել միջպետական ճանապարհը:

«Երեք ժամ միջպետական ճանապարհը փակ է, որևէ մեկին չեմ ասում՝ ցույց արեք կամ մի արեք: Առաջինը որպես քաղաքացի եմ խնդրում, հետո նոր քաղաքապետ, եթե հարգանք ունեմ Ձեր մոտ՝ միջպետական ճանապարհը բացեք»,- ասաց նա

Սևանի ճանապարհին էր նաև Նիկոլ Փաշինյանի հայրը: Նա  «Ազատություն» ռկ-ի լրագրողի հարցին ի պատասխան նշեց, որ Երևան է գնում: Ինչ վերաբերում է որդու մասին լուրերին՝ նշեց, որ նրանից տեղեկություն չունի:

12:50
Ապրիլյան պատերազմի մասնակիցներն էլ են Բաղրամյան պողոտայում, նրանք ցանկանում էին Ազգային ժողովում հանդիպել պատգամավորների հետ: Սակայն նրանց թույլ չտվեցին մուտք գործել ԱԺ։

12:43
Ուսանողների երթին միացան հոգևորականները: Այժմ նրանք քայլում են Տիգրան Մեծ պողոտայով:

11:35
Երիտասարդները ազգագրական երգեր երգերով քայլում են մայրաքաղաքի փողոցներով: Րոպեներ առաջ ուսանողներին միացան զինվորական հագուստով տղաներ: Այժմ ուսանողները Խանջյան փողոցում են:

















11։20
Ազատության հրապարակից մեկնարկեց ապրիլյան պատերազմի մասնակիցների երթը: Նրանց հետ են նաև արցախյան պատերազմի վետերաններ և ապրիլյան պատերազմի զոհերի ծնողներ։







10։49
Երևանի պետական համալսարանում վաղ առավոտից դասադուլ սկսվեց։ Ուսանողները ասացին, որ նաև նստացույց են անում, սակայն քիչ անց  հայտնեցին, որ սկսում են քայլերթ «Ազատ, անկախ ուսանող»  կարգախոսով:

Քայլերթի ժամանակ նրանց են միացան նաև այլ բուհերի ուսանողներ:

Դասադուլ է Տնտեսագիտական, Ագրարային, Սլավոնական, Ֆրանսիական, Մանկավարժական, Ամերիկյան, Բյուսովի համալսարաններում:

Բժշկական համալսարանի ուսանողներն էլ դասադուլի են դուրս եկել սպիտակ խալաթներով: Ապագա բժիշկները երթի «առաջնագծում» են:

Դասադուլի դուրս եկած ուսանողները երթը շարունակելու են մի շարք բուհերի տարածքներով, որպեսզի այլ բուհերի դասադուլավորները ևս միանան իրենց: