Ձեր վստահելի աղբյուրը

«Հիմա բոլոր հայերի համար ամենակարևորն այն է, որ խաղաղ միջավայրում գան ընդհանուր հայտարարի և կարողանան որոշել իրենց հետագա անելիքները: Ես դրական եմ տրամադրված այն առումով, թե ինչ ձեռքբերումներ կարող է ունենալ ժողովուրդը, եթե միասնական լինի»,- Ցեղասպանության զոհերի հիշատակը հարգելուց հետո Ծիծեռնակաբերդի բարձունքում լրագրողների հետ զրույցում ասաց Հայաստանում ԱՄՆ դեսպան Ռիչարդ Միլսը:

Նա ընդգծեց, որ ԱՄՆ-ն պատրաստ է աշխատել ժամանակավոր վարչապետի ու կառավարության հետ առաջիկա շաբաթվա ընթացքում:

«Պատրաստ ենք շարունակել աշխատել Հայաստանի կառավարության հետ»,-ասաց դեսպանը:

Ամերիկացի դիվանագետը գովեստով խոսեց Հայաստանի ժողովրդի, ոստիկանության ու հրաժարականի որոշում կայացրած Սերժ Սարգսյանի մասին:

«Ուզում եմ Ամերիկայի Միացյալ Նահանգների կառավարության ու ժողովրդի անունից գովեստի խոսքեր ասել Հայաստանի ժողովրդի մասին՝ վերջին շաբաթվա ընթացքում խաղաղ ու արժանապատիվ կերպով իրենց բողոքի ակցիաներն իրականացնելու համար:

Ես ուզում եմ նաև գովեստի խոսքեր ասել ոստիկանության ու անվտանգության ուժերի մասին, ովքեր վերջին 7-10 օրերի ընթացքում  հանդես էին բերում զսպվածություն ու արհեստավարժություն:

Եղել են արժանահավատ հաղորդումներ լրագրողների ու ցուցարարների նկատմամբ բռնության որոշ դրսևորումների մասին, անհրաժեշտ է, որ այս դեպքերի վերաբերյալ քննություն իրականացվի ու մեղավորները պատժվեն օրենքի համաձայն:

Ես ուզում եմ նաև գովեստով արտահայտվել նախկին վարչապետ Սերժ Սարգսյանի  և նրա առաջնորդության մասին, ով լսելով ժողովրդին, կայացրեց հրաժարական տալու դժվար որոշումը»,-ասաց դեսպան Միլսը: