Ձեր վստահելի աղբյուրը

Ամերիկյան հեղինակավոր columbiachronicle.com պարբերականում հոդվածագիր Օլիվիա Դելոյանն հրապարակել է  «Մենք  պետք է ճանաչենք» խորագրով հոդված, որում պատմում է, որ  իր տատիկի տատիկը ծնվել է Թուրքիայում 1915 թվականի սկզբերին և  իր ծնողների հետ միասին գաղթել է Ամերիկա մինչև Ցեղասպանությունը:

«103 տարի անց Թուրքիան դեռ չի ճանաչել Հայոց Ցեղասպանությունը և մենք չենք կարող թույլ տալ՝ լռել  ցեղասպանության մասին: Ամերիկացիները կարծում են, թե հասկանում  են և ճանաչում պատմության ընթացքում կատարված ցեղասպանությունները, բայց նրանք լռում են Հայոց Ցեղասպանության մասին»,-ընդգծել է հեղինակը:

Դելոյանը հոդվածում նկատել է, որ Ամերիկայի Հայ Դատի հանձնախմբի հավաստմամբ՝ ամերիկացիների միայն 35%-ն է տեղեկացված Հայոց  ցեղասպանության մասին և  հիշատակելով 2015 թվականի New York Times-ի հրապարակումը՝ հավելել է, որ նույն թվականին Թուրքիայում Ստամբուլում գործող տնտեսական և արտաքին քաղաքականության հետազոտությունների կենտրոնի հարցման արդյունքում պարզվել է՝  թուրք բնակչության  միայն 9%-ն է կարծում, որ Թուրքիայի խորհրդարանը պետք է ճանաչի Հայոց Ցեղասպանությունը:

Հեղինակը հոդվածում, հիշատակելով  նաև ԱՄՆ նախկին նախագահ Բարաք Օբամայի կողմից 2008 թվականին ցեղասպանության ընդունման մասին տված խոստումը, նկատել է. «2015 թվականին ցեղասպանության 100-ամյա տարելիցին նա դրժեց իր խոսումը և անգամ չարտասանեց «ցեղասպանություն» բառը»: Թուրք ժխտողների կողմից 2017 թվականին էկրան բարձրացած, հայոց ցեղասպանության մասին պատմող «Խոստումը» ֆիլմի վարկանիշի իջեցման փորձերը վկայում են՝  թուրքերի կողմից պատմությունը կրկնելու փորձը  շարունակվում է»,- շեշտել է հեղինակը

Նրա խոսքով՝  իր կրթության ընթացում երբեք չի իմացել Ցեղասպանության  մասին և ընդգծում է, որ եթե չլիներ իր հայրը և չպատմեր նրան այդ մասին նա՝ ինչպես շատերը, ևս անտեղյակ մեկը կլիներ: Նա կարևոր է համարել Ցեղասպանության ճանաչումը և Թուրքիայի ժխտողականության դեմ պայքարելը կրթության միջոցով:

«Ամերիկյան դպրոցներում պետք է դասավանդվեն պատմության վայրագությունների մասին, որոնց թվում է Թուրքիայի կողմից իրականացված Հայոց Ցեղասպանություն: Ես հպարտ եմ որ կրում եմ հայկական ազգանուն և որ իմ տատն ու պապը վերապրել են Ցեղասպանությունը»,- գրել է հեղինակ:

Եզրափակելով հոդվածը՝ Դելոյանը գրել է. «Հանուն մեր նախնիների, ովքեր սպանվել են, մենք չենք կարող լռել: Եկեք բարձրաձայնենք, եկեք կրթենք և եկեք ասենք «ցեղասպանություն» բառը»: