Փաշինյանի ասուլիսը՝ միջազգային լրատվամիջոցներին (լրացված)
«Իմ քայլը» նախաձեռնության առաջնորդ, «Ելք» խմբակցության անդամ Նիկոլ Փաշինյանն այսօր հրավիրած մամուլի ասուլիսին պատասխանել է միջազգային լրատվամիջոցների հարցերին։
«Որևէ թեկնածու Հանրապետական կուսակցությունից չի լինելու վարչապետ, Հայաստանում Հանրապետական կուսակցության կառավարման ժամկետը վերջացել է»,- լրագրողների հարցերին պատասխանելիս՝ ասաց Նիկոլ Փաշինյանը։
Միջազգային լրատվամիջոցների ներկայացուցիչները Փաշինյանից հետաքրքրվեցին, թե նա պատրաստ է դառնալ վարչապետ, ինչին ի պատասխան ասաց. «Բազմիցս եմ ասել, եթե ժողովուրդն իմ վրա դնի այդ պարտականությունը, ես, իհարկե, կստանձնեմ այն։ Հասկանում եմ, որ կա շատ մեծ հավանականություն, որ հենց այդպես էլ կլինի»։
Շարունակող հարցին՝ թե հենց ինքն այդպիսի ծրագիր ունի, նա պատասխանեց. «Խոսքը գնում է մեր հայտարարած կետերից երրորդի մասին, մենք պետք է երաշխավորենք բացարձակապես ազատ և արդար ընտրություններ Հայաստանում։ Սա ամենակարևորն է և առաջին բանը, որ պետք է անենք՝ բարեփոխենք ընտրական օրենսգիրքը և քաղաքական կուսակցությունների մասին օրենքը։ Ես այսօր չեմ տեսնում որևէ ուժ, որը կարող է դիմադրել ժողովրդի ցանկությանը»։
Լրագրողներից մեկը հարցրեց՝ դուք առաջնորդել եք ժողովրդին, բայց արդյոք պատրա՞ստ եք առաջնորդել կառավարությանը։
«Մենք պատրաստ ենք մեր երկիրն առաջնորդել դեպի ապագա, մենք վստահ ենք դրանում։ Այսօր խոսքում ենք ժամանակավոր կառավարության մասին, կարծում եմ՝ ամենակարևոր և միակ պատասխանատվությունը, որ այդ ժամանակավոր կառավարությունը պետք է ունենա՝ արդար և ազատ ժողովրդավարական ընտրությունների անցկացումն է։ Վստահ ենք, որ մեր թավշյա հեղափոխությունը մեծ պոտենցիալ ունի և մեծ թիմ ունի այդ ամենին հասնելու համար, բայց մենք նաև կներառենք գուցե մի քանի այլ գործիչների այլ ուժերից, նկատի ունեմ օրինակ քաղաքացիական հասարակությունից և այլն»,- պատասխանեց Փաշինյանը։
Ճշտող հարցին, թե որևէ քաղաքական ուժից ներառում կլինի՞, նա պատասխանեց. «Այս պահին մենք բաց ենք բանակցությունների համար, և եթե որևէ լավ առաջարկ ստանանք՝ կքննարկենք»։
Առաջիկա քայլերի մասին խոսելով՝ Փաշինյանը նշեց, որ իրենց հեղափոխությունը դեռ տրամաբանական ավարտին դեռ չի հասել: Նա տեղեկացրեց, որ վաղը հանրահավաք են անցկացնելու Հանրապետության հրապարակում:
«Այսօր հնարավորություն ունենք մեկ, անգամ կես ժամվա ընթացքում կազմակերպել ցանկացած միջոցառում: Մենք այս պահին տիրապետում ենք իրավիճակին, վայելում ենք ժողովրդի աջակցությունը: Որևէ մեկը պիտի չփորձի այդ կարևոր հաղթանակը ժողովրդի ձեռից տանել»,- ասաց նա:
Փաշինյանը հակադարձեց նաև իրենց շարժման հետևում տարբեր արտաքին ուժերի տեսնողներին, ասաց, որ իրենք օտարերկրյա ուժերի հետ որևէ խոսակցություն կամ բանակցություն չեն ունեցել, չկա որևէ աշխարհաքաղաքական ենթատեքստ իրենց շարժման մեջ. դա Հայաստանի մաքուր ներքին գործն է:
«Հույս ունեմ՝ բոլոր աշխարհաքաղաքական ուժերը հասկանում են դա: Մենք պատրաստ ենք ՀՀ - ՌԴ, ՀՀ - ԵՄ, ՀՀ - ԱՄՆ, ՀՀ - Վրաստան ապագա հարաբերությունների մասին խոսել, բայց մեզ համար ամենակարևորը հիմա Հայաստանի ազգային շահն է: Կուզեմ ավելացնել նաև Արցախի Հանրապետության շահը, մենք պաշտպանելու ենք, պաշտպանում ենք, նախկինում էլ պաշտպանել ենք և միշտ պաշտպանելու ենք Արցախի ազգային շահը և Հայաստանի ազգային շահը»,- ասաց նա:
Լրագրողները հետաքրքրվեցին հայ-ռուսական հարաբերությունների ապագայով: Փաշինյանը նշեց, որ հայկական իշխանությունները այդ հարցին պատասխանելու են միատեսակ, այն է՝ Հայաստանի և Ռուսաստանի հարաբերությունները շատ, շատ և շատ կարևոր են:
«Կասկած չկա, որ այդ երկրները եղբայրական պետություններ են, բայց դա չի նշանակում, թե այդ հարաբերություններում խնդիրներ չկան: Մեր նպատակների մեջ չի մտնում քննադատել դրանք, մեր խնդիրն է՝ դրանք լուծել բանակցությունների միջոցով, և ես վստահ եմ, որ այդ խոսակցությունը ստացվելու է»,- ասաց նա:
Իբրև օրինակներ՝ Փաշինյանն առանձնացրեց Ռուսաստանում ՀՀ քաղաքացիների շահերի հետ կապված խնդիրները, օրինակ՝ այն, որ ՀՀ քաղաքացիները հայկական վարորդական վկայականով չեն կարողնում վարորդի գործ անել:
Պատգամավորն առանձնացրեց նաև ԼՂ խնդիրը, Ադրբեջանին ռուսական զենքի մատակարարման, վաճառքի հարցը:
«Կարծում եմ՝ դրա հետևանքով ուժերի հավասարակշռությունը խախտվել է, և Ռուսաստանը, զենք վաճառելով Ադրբեջանին, կամա թե ակամա նպաստել է խնդիրների զարգացմանը, ու այդ հարցերը պետք է քննարկվեն»,- ասաց նա: Փաշինյանը նշեց, որ կան նաև տնտեսության հետ կապված խնդիրներ, որովհետև շատ հայկական ձեռնարկություններ որոշակի խնդիրներ են ունենում ՌԴ տարածքում:
«Ամեն դեպքում, ես կարծում եմ, որ հայ-ռուսական հարաբերություններում չկան անլուծելի խնդիրներ, պարզապես պետք է համբերատար լինել և դրական տրամադրվածությամբ մոտենալ»,- հավելեց նա:
Ժողովրդի, հեղափոխության թեկնածու վարչապետի հաստատումն, ըստ Փաշինյանի, դարձյալ ժողովուրդը պիտի անի:
«Մենք դա հեշտությամբ կկազմակերպենք հրապարակում, ժողովրդին կներկայացնենք թեկնածություն, և ժողովուրդը իր պահվածքով կհաստատի թեկնածուին»,- ասաց նա:
Փաշինյանը պատրաստակամություն հայտնեց՝ բոլոր ուժերի հետ խոսելու, գործընթացները քննարկելու, որպեսզի լինի խաղաղ, առանց ցնցումների իշխանության փոխանցում: Նրա խոսքով՝ հաղթանակը պիտի իր տրամաբանական ավարտին հասնի:
Ժողովրդավարությունն, ըստ Փաշինյանի, ոչ միայն իշխանություն ընտրելու հնարավորություն է, այլև այդ իշխանությանը ընտրությունների միջոցով հետ կանչելու, հեռացնելու, փոխելու հնարավորություն:
«Մեր խնդիրն այն է, որ ոչ ոք չի հավատում ընտրությունների արդյունքներին, որովհետև հայաստանցիների մեծամասնությունը համոզված են, որ բոլոր անցած ընտրությունները մեր անկախության ընթացքում կեղծված են եղել, և մեզ համար ժողովրդավարությունը իրական արժեք է»,- ասաց նա:
Փաշինյանը կրկին ընդգծեց, որ վրեժխնդրություն չի լինելու, լինելու է օրինականություն:
Նիկոլ Փաշինյանը նշեց, որ հայ-իրանական և հայ-վրացական հարաբերություններին ստրատեգիական նշանակություն է տալիս, կարևորում է ՌԴ, ԱՄՆ, ԵՄ հետ հարաբերությունները, սակայն կրկին ընդգծեց՝ որևէ ուղղությամբ հարաբերությունների զարգացումը չի լինելու մեկ այլ ուղղության հաշվին:
Մարտի 1-ի մեղավորների մասին հարցին անդրադառնալով՝ նա ասաց, որ ինքը դատախազ չէ, չի կարող և պիտի չասի, թե ով է մեղավոր կամ ով անմեղ, ընդամենը ասում է, որ այդ սպանությունները պիտի բացահայտվեն:
Ժամանակավոր կառավարության առաջին խնդիրն, ըստ Փաշինյանի, երկրի արդյունավետ կառավարումն ու իսկապես ազատ, օրինական ընտրությունների անցկացումը պիտի լինի: Թե վարչապետ ընտրվելու դեպքում ովքեր կլինեն իր կառավարության թիմում՝ Փաշինյանը չհստակեցրեց, նշեց, որ ամեն ինչ կախված է նաև քաղաքական կոնկրետ իրավիճակից:
«Կարծում եմ, որ մեր գործող կառավարությունում, հատկապես դրա միջին օղակում, շատ կան այնպիսի պաշտոնյաներ, որոնք մեծ պոտենցիալ ունեն, նաև մեր կողմնակիցները, որոնք հաջողությամբ կշարունակեն իրենց աշխատանքը: Մենք կադրային ջարդ չենք իրականացնելու, հատուկ ծառայություններում և ոստիկանությունում կան բազմաթիվ մարդիկ, որոնք կշարունակեն իրենց ծառայությունը»,- ասաց նա:
Փաշինյանը հորդորեց հավատալ իր թիմին: Հարցին՝ ինչ քայլերի կդիմի, եթե հանրապետականները չցանկանան լուռ հեռանալ, նա նշեց, որ այդ դեպքում ակցիաները կշարունակվեն ավելի մեծ ծավալով:
Ժողովրդական հեղափոխության օրակարգային հաջորդ հարցն, ըստ Փաշինյանի, ժողովրդի թեկնածուին վարչապետ ընտրելն է, երրորդը ժամանակավոր կառավարության կազմումը, չորրորդը խորհրդարանական նոր ընտրությունների անցկացումը:
«Ինձ համար մոդելը, որին արժե հետևել, Նելսոն Մանդելան է և Չէ Գևարան, համեմատություններ են տանում նաև Գանդիի հետ, հաճելի է, բայց այս պահին կուզեի խոսել Նելսոն Մանդելայի մասին, որովհետեւ մեր քաղաքական շարժման համար ամենակարևոր դետալը երկրում միջավայրի փոփոխությունն է: Անկախությունից հետո շատ արագ այդ դրական միջավայրը մենք կորցրինք, երկրում սկսվեց ընկճախտ, և կարծում եմ, որ այս շարժմամբ մենք հաղթահարեցինք դեպրեսիայի իրավիճակը»,- ասաց նա:
Լրահոս
Տեսանյութեր
Արցախի ղեկավարությունը Բաքվում է, որովհետև նրանք առաջնորդել են մեր քաղաքական պայքարը. Բեգլարյան
