Ձեր վստահելի աղբյուրը

Ապրիլի 23-ին Թբիլիսիում կայացել է 10-րդ Ջահերով Երթ՝ նվիրված Հայ ժողովրդի Ցեղասպանության զոհերի հիշատակին: Ջահերով երթը սկսվել է Վակե այգու մոտ և ավարտվել Վրաստանում Թուրքիայի դեսպանատան մոտ:

Երթի ժամանակ հարյուրավոր վիրահայ երիտասարդներ վանկարկել են «Ճանաչում-Հատուցում», «Պայքար», «Թուրքիա-հանցագործ» կարգախոսները, ինչպես նաև երգել հայրենասիրական երգեր:

Ջահերով երթի ավարտին կայացել է բողոքի ցույց այն երկրի դեսպանատան առջև, որը հանցագործություն է իրականացրել մարդկության դեմ՝ Ցեղասպանություն, և պատիժ չի կրել իրականացրած հանցագործության համար, ավելին՝ շարունակում է Արևմտյան Հայաստանի բռնագրավումը:

Թուրքիայի դեսպանատան առջև անցկացված ցույցի ժամանակ շուրջ 300 մասնակից արտահայտել են իրենց բողոքը 1915-23թթ. Հայ ժողովրդի ցեղասպանության ժխտման քաղաքականության դեմ և պահանջել, որպեսզի Թուրքիան ամբողջ մարդկության առջև և միջազգային նորմերի համաձայն պատասխանատվության ենթարկվի կատարած հանցագործության համար:

Ապրիլի 24-ին Թբիլիսիում Թուրքիայի դեսպանատան մոտ կկայանա ավանդական ցույց: