Ձեր վստահելի աղբյուրը

Հանրապետության հրապարակում «Իմ քայլը» նախաձեռնության հանրահավաքի ժամանակ «Ելք» խմբակցության անդամ Արարատ Միրզոյանն անդրադարձավ Նիկոլ Փաշինյան - Կարեն Կարապետյան հանդիպման չեղարկմանը: Նա նշեց, որ Կարապետյանը ցանկություն ուներ բանակցություններին գալ միայնակ, մինչդեռ իրենք երեք հոգուց կազմված խմբի էին հրավիրել, որից հետո Կարեն Կարապետյանը հրաժարվեց և դուրս եկավ բանակցություններից:

Միրզոյանը նշեց, որ ժողովուրդը վարչապետի այլ թեկնածու ունի, և հենց այդ թեկնածուն դառնալու է վարչապետ: Նա կոչ արեց հաշվի նստել ժողովրդի կարծիքի հետ, տեղեկացրեց, որ ԱԺ բոլոր մյուս խմբակցությունները միացել են այս շարժմանը, և փաստորեն աջակցություն հայտնել ժողովրդի թեկնածուին:

«Ելք» խմբակցության ղեկավար Նիկոլ Փաշինյանը խոսեց Կարեն Կարապետյանի հրաժարականի լուրերի մասին, նշեց, որ նրա պաշտոնավարումը պետք է դիտել միայն ՀՀ օրենսդրության տեսակետից:

«Այն պահից, երբ գործող վարչապետ Սերժ Սարգսյանը հրաժարական է տվել, նրա հետ հրաժարական է տալիս ամբողջ Կառավարությունը, և այսօր կառավարությունում չկա ոչ մի գործող պաշտոնյա, բոլորը հրաժարական տված են, Հայաստանում այս պահին չկա Կառավարություն»,- ասաց նա:

Փաշինյանը նշեց, որ Կարեն Կարապետյանի հետ հանդիպումից առաջ իրեն զանգում էին ՀՀԿ-ական պատգամավորներ և խնդրում հաշվի առնել, որ նա իրենց չի ներկայացնում:

Կարեն Կարապետյանի՝ Ռուսաստանի համար նախընտրելի թեկնածու համարվելուն արձագանքելով՝ նա հիշեցրեց՝ Ռուսաստանից այսօր կրկին հնչել է տեսակետ, որ սա Հայաստանի ներքին գործն է:

«Մենք չենք պատրաստվում ժամավաճառությամբ զբաղվել, պատրաստ ենք բանակցությունների, և դրանք, ինչպես նախկինում պնդել ենք, պետք է վերաբերեն իշխանության խաղաղ և անցնցում փոխանցմանը: Մենք պատրաստ ենք քննարկել անցումային շրջանի, ժամանակավոր կառավարության գործունեության հետ կապված ցանկացած հարց»,- ասաց նա:

Փաշինյանը նաև արձագանքեց հնչող տեսակետներին, թե իրենց գործողություններն օրինական չեն: Նա նշեց, որ այդ գործողությունները համապատասխանում են ՀՀ օրենսդրությանը: