Ձեր վստահելի աղբյուրը

21:15
«Իմ քայլը» նախաձեռնությունը վաղը Երևանում հանրահավաք չի անի: Նիկոլ Փաշինյանը հայտարարեց, որ վաղը ժամը 18:00-ին պետք է հանրահավաք անեն ոչ թե Երևանում, այլ Գյումրիում:

Ըստ նրա՝ Երևանում վաղվա համար բոլոր գործողություններն առժամանակ դադարեցվում են, որպեսզի Երևանի ակտիվիստները 1-2 օր հանգստանան, ուժերը վերականգնեն, բայց եթե կան մարդիկ, որոնք իր նման հանգստանալու կարիք չունեն, ապա վաղը ժամը 15:00-ին, հավաքվեն Աշտարակի խճուղու մոտ ու գնան ավտոերթով դեպի Գյումրի:

«Հույս ունենք, որ գյումրեցի մեր ընկերները մեզ կդիմավորեն Շիրակի մարզի մուտքի մոտ: Վաղվա երևանյան գործողությունները չենք իրականացնելու մեկ նպատակով՝ ապրիլի 29-ին և 30-ին, մայիսի 1-ին, մեր գործողությունները Երևանում վերականգնվելու են աննախադեպ թափով»,- ասաց նա:

Նա նաև նշեց, որ մյուս օրը  հանրահավաք կանեն Վանաձոր քաղաքում:

21։10
Նիկոլ Փաշինյանը հայտարարեց, որ որևէ խոչընդոտ չստեղծվի դեպի Արցախ իրականացվող ռազմական և քաղաքացիական բեռների համար: Ըստ նրա՝ պետք  է բաց լինեն դեպի Արցախ տանող ռազմավարական նշանակության ճանապարհները, և ընդհանրապես շտապ օգնության, արտակարգ իրավիճակների ծառայության մեքենաների համար որևէ խոչընդոտ չպետք է լինի:

20:50
Նիկոլ Փաշինյանը նշեց նաև, որ ուզում է հստակեցնել՝  ՀՀ վարչապետի պաշտոնը կստանձնի միայն այնպիսի պայմաններում, երբ ՀՀ յուրաքանչյուր քաղաքացի երկրում իրեն զգա ինչպես վարչապետ: 

20։35
Նիկոլ Փաշինյանը հայտարարեց, որ երեկ հրապարակում հավաքվածների կողմից  առաջադրվել է որպես ժողովրդի վարչապետի թեկնածու, ինչը շատ պատասխանատու կարգավիճակ է: «Եվ բնականաբար մենք ակնկալում ենք, որ ԱԺ խմբակցությունները կոնսենսուսով կկայացնեն այդ որոշումը, բայց ուզում եմ հստակ արձանագրենք մեկ բան՝ խնդիրը ոչ թե իմ վարչապետ դառնալն է, այլ Հայաստանում հաստատված կոռումպացված համակարգը վերացնելը»,- ասաց  նա:

Նրա խոսքով՝ կոռումպացված ու հակաժողովրդական համակարգի հետ որևէ կոմպրոմիս լինել չի կարող, իրենք ՔՊ կուսակցությամբ ու  նախաձեռնություններով, ուսանողական շարժման հետ քննարկել են, որ պաշտոնների բաժանման մասին խոսք լինել չի կարող. «Ուզում եմ ժողովուրդը հստակ արձանագրի՝ մենք չենք գնալու կուլիսային պայմանավորվածության, նաև այն պատճառով, որ այս պրոցեսի գործող առանցքային անձը հրապարակի ժողովուրդն է, որևէ գործարք չի լինելու ժողովրդի թիկունքում: Եվ ես կա՛մ վարչապետ կընտրվեմ  ժողովրդի պահանջով, կամ էլ Հայաստանի Հանրապետությունում ընդհանրապես վարչապետ չի ընտրվի:
Ուզում եմ հստակ արձանագրել՝ մեր շարժման որևէ արժեք, ձեռքբերում մեր բարձրությունից 1 մմ անգամ չի իջնելու, մենք բարձրանալու ենք ու միայն բարձրանալու ենք, և ուրեմն մենք ակնկալում ենք, որ բոլոր խորհրդարանական խմբակցությունները ժողովրդի հաղթանակն ընդունեն առանց նախապայմանների»:

20:20
«Արդեն բավականին երկար ժամանակ մենք պնդում ենք, որ Հայաստանում դե ֆակտո տեղի է ունեցել իշխանափոխություն, Հայաստանում գոյություն ունի նոր իշխանություն և այդ իշխանությունը Դուք եք»,- այսօր Հանրապետության հրապարակում իր ելույթն այսպես սկսեց «Քայլ արա» նախաձեռնության առաջնորդ, ԱԺ պատգամավոր Նիկոլ Փաշինյանը:

Նրա խոսքով՝ երեկ երեկոյան բազմաթիվ ահազանգեր են ստացել, որ մայրաքաղաքում կան առանց պետահամարանիշի բազմաթիվ ավտոմեքենաներ, և այսօր առավոտվանից արագ լուծել են այդ խնդիրը շարժման ակտիվիստների  միջոցով. «Եվ ընդամենը կես ժամ, մեկ ժամ հետո Երևանում չկար առանց պետհամարանիշերի կամ փակ համարանիշերով մեքենա:
Ես ներողություն եմ խնդրում, որ ավելի վաղ, ավելի արագ չենք լուծել այդ խնդիրը, բայց դրա պատճառն այն էր, որ երեկ ամբողջ օրը ես և իմ ընկերները մի հսկայական պարագծով երթ ենք իրականացրել և զբաղված էինք այդ երթով, ժամանակ չենք ունեցել գնահատել խնդրի մասշտաբները: Կարևորը՝ խնդիրը լուծված է և այս պահից Երևանում, Հայաստանում չպետք է լինի ոչ մի առանց պետհամարանիշի, փակ համարանիշով մեքենա, ոչ մի լկտի վարորդ: Եթե այդպիսիք նկատվեք, ապա Դուք տեղում պետք է այդ խնդիրը լուծեք, քանի որ դուք իշխանություն եք Հայաստանում»,- նշեց Նիկոլ Փաշինյանը:

19:45
ԱԺ պատգամավոր Արարատ Միրզոյանը հայտարարեց, որ կարճ է խոսելու, քանի որ երեկ զգուշացրել են՝ ելույթների քանակի և տևողության առումով համը հանել են:

Նա նշեց, որ ժողովուրդը հաղթել է, բայց այդ հաղթանակը փորձում են խլել. «Դուք հեռացրել եք առվի ճանապարհը փակածներին, բայց այդ հաղթանակը Ձեզանից ուզում են խլել: Ձեր ձեռքը կրակը չե՞նք ընկել, լիքը գործ ունենք անելու, հո ձեզ հերթով չե՞նք մերժելու, պետություն ունենք շենացնելու: Երևի դուք էլ եք տեսնում, որ Հայաստանում տեղի է ունենում քաղաքական առևտուր. մեկը հանդիպում է մյուսին, գնում են, գալիս են, մեզանից են պաշտոն ուզում, իրար մեջ են բաժանում: Մեզ հետ պետք չէ սակարկել, մենք հստակ հասկանում ենք, դուք էլ վստահ եղեք՝  չենք ուզում իշխանության գալ, պաշտոններ բաժանել, մենք ուզում ենք փոխել համակարգը, խաղի կանոնները, արժեքները»,- ասաց Արարատ Միրզոյանը:

Նա նաև կարճ ուղերձ հղեց ՀՀԿ-ին ու մյուս կուսակցություններին. «Որևէ գործարք, որը կլինի մայիսի 1-ին Ազգային ժողովում, կլինի ոչ լեգիտիմ, քանի որ Հայաստանի ժողովուրդը դա չի ընդունելու: Սա հստակ է, ես ուզում եմ բոլորը հասկանան՝ բացի Նիկոլ Փաշինյանի օգտին քվեարկելուց, այլ քայլ կհարվածի պետականությանը ու կլինի պետական դավաճանություն»:

19։32
Հանրապետության հրապարակում մեկնարկեց «Քայլ արա» նախաձեռնության առաջնորդ Նիկոլ Փաշինյանի նախաձեռնած հերթական հանրահավաքը:

Հանրահավաքում կրկին անգամ հիշեցվեց այն մասին, որ չի կարելի երթևեկել առանց համարանիշների ավտոմեքենաներով, պետք չէ գերազանցել արագությունը, ավտոմեքենաներով մուտք չգործել Հանրապետության հրապարակ, 22:45-ից ազդանշաններ չարձակել, մեքենաների կտուրներին չնստել, երբ դրանք ընթացքի մեջ են, անսթափ վիճակում ղեկին չնստել: