Ձեր վստահելի աղբյուրը

Վարչապետի պաշտոնակատար Կարեն Կարապետյանի հրաժարականի մասին տեղեկությունը պաշտոնապես հերքվել է: Այս մասին այսօր կառավարության նիստից հետո լրագրողների հետ ճեպազրույցում ասաց ՀՀ ֆինանսների նախարարի պաշտոնակատար Վարդան Արամյանը՝ պատասխանելով հարցին, թե արդյոք Կարեն Կարապետյանը մտադիր է հեռանալ կամ իր թեկնածությունն առաջադրել վարչապետի պաշտոնում:

«Չեմ կարծում, որ իմ մանդատի անունից՝  որևէ հայտարություններ անելը ճիշտ է: Ճիշտ կլինի, որ երբ գալիս է պահը, հայտարարություններ անեն այն մարդիկ, որոնք լիազորված են այդպիսի հայտարարություններ անել»,- նշեց նա:

Միաժամանակ Վարդան Արամյանն ասաց, որ այս իրավիճակը մտահոգում է բոլորին: «Չեմ կարծում՝ Հայաստանում կա որևէ մեկը, որը մտահոգված չէ այս իրավիճակով: Պետք է գտնվի այն ելքը, որը լավագույնը կլինի մեր երկրի համար»,- ասաց նա:

Ըստ նրա՝ միջազգային փորձը ցույց է տալիս, որ եթե ազգաբնակչության շրջանում կա որոշակի անհանգստություն՝ դա լինի տնտեսական, քաղաքական և այլն, պետք է ուշադիր լինել ինֆորմացիոն հոսքերի կառավարմանը: « Երբ տեղի են ունենում որոշակի անհանգստություններ և ինֆորմացիոն հոսքերը տարբեր ուղղություններով են գնում, դա ազդում է տնտեսական աճի վրա: Դրա համար պետք է ամեն ինչ անել, որ այս վիճակից առավելագույն օգուտներով և նվազագույն ծախսերով դուրս գանք»,- Վարդան Արամյանը: