Ձեր վստահելի աղբյուրը

«Սուրբ Աստվածամայր» ԲԿ-ում անցած գիշեր մահացել է ապրիլի 23-ի գիշերը Սարալանջի փողոցում ավտովթարի հետևանքով վնասվածներ ստացած 1 տարեկան 3 ամսական երեխան:

«Գիշերը մահացավ: Վնասվածքները կյանքի հետ անհամատեղելի էին»,-Panorama.am-ի հետ զրույցում ասաց ԲԿ վերակենդանացման բաժանմունքի ղեկավար Աննա Չոբանյանը:

Հիշեցնենք, որ վթարի հետևանքով տուժել էր չորս մարդ: Երեքը շարունակում են բուժումը:

Ոստիկանությունից մանրամասնում են, որ ապրիլի լույս 24-ի գիշերը Երևանի Սարալանջի փողոցում ճանապարհատրանսպորտային պատահար է տեղի ունեցել։ Աշտարակում ապրող 27-ամյա Դավիթ Արզումանյանի վարած «Մերսեդեսը» դուրս է եկել ճանապարհի երթևեկելի գոտուց և, աջ ընթանալով, բախվել բետոնե արգելապատնեշին։ Վարորդը, նրա ուղևորները, որոնք ամուսիններ են, և նրանց 1-ամյա որդին տարբեր աստիճանի մարմնական վնասվածքներով տեղափոխվել են համալսարանական թիվ 1 հիվանդանոց, որտեղից էլ փոքրիկը տեղափոխվել է «Սուրբ Աստվածամայր» բժշկական կենտրոն։

Պատահարի հանգամանքները նախապես պարզվել են ճանապարհային ոստիկանությունում։ Պարզվել է, որ «Մերսեդեսին» հետևից հարվածել է «Օպել» մակնիշի ավտոմեքենա, ինչի հետևանքով էլ Դ. Արզումանյանը կորցրել է մեքենայի կառավարումը և դուրս եկել երթևեկելի գոտուց։ «Օպելի» վարորդը, թողնելով ճանապարհատրանսպորտային պատահարի վայրը, հեռացել է։ Դեպքից ժամեր անց «Օպելի» վարորդը՝ մայրաքաղաքում ապրող 29-ամյա Ս.  Գյուլումյանը, մեքենայով հանդերձ ներկայացել է ճանապարհային ոստիկանություն։

Նախապատրաստված նյութերը ճանապարհային ոստիկանությունից փոխանցվել են Երևան քաղաքի քննչական վարչություն։  Կատարվածի հանգամանքները պարզվում են։  Կատարվում է նախաքննություն։