Ձեր վստահելի աղբյուրը

Շփման գծում հակառակորդի տեղաշարժերի, ակտիվացման, Հայաստանում ներքաղաքական իրավիճակի՝ պաշտպանության բանակի վրա ունեցած հնարավոր ազդեցության հարցերի մասին Panorama.am-ը խոսել է Արցախի նախագահի խորհրդական Տիգրան Աբրահամյանի հետ:

Հարց-Շփման գծում հակառակորդի կողմից կուտակումները շարունակվո՞ւմ են:
Պատասխան-Հակառակորդի՝ տարբեր ուղղություններով շարժերն ու կուտակումները շարունակվում են: ՊԲ-ը հետևում է դրանց և ըստ անհրաժեշտության գործուն քայլեր կձեռնարկի:

Հարց-Կուտակումներին զուգահեռ ադրբեջանական կողմից ակտիվացում՝ դիվերսիոն փորձերի, հետախուզական խմբերի ներթափանցման կամ այլ տեսքով եղե՞լ է:
Պատասխան-Վերջին տարիներին առաջնագծում իրականացված տեխնիկական վերազինման արդյունքում հակառակորդի կողմից դիվերսիոն գործողություններ իրականացնելու ռիսկերը կտրուկ նվազել են: Հակառակորդն առաջնագծում ակտիվություն մտցնում է դիպուկահար խմբերի, ծանր գնդացիրների, ինչպես նաև՝ առաջնագծում կտրուկ տեղաշարժերի միջոցով:

Հարց-Հայաստանում ստեղծված ներքաղաքական իրավիճակը որևէ ազդեցություն թողնո՞ւմ է ՊԲ մարտունակության վրա:
Պատասխան-Պաշտպանության բանակն իր ամենօրյա ծառայությամբ անընդհատ ձգտում է բարձրացնել իր մարտունակությունը: Տրամաբանորեն հայաստանյան ներքաղաքական զարգացումները չեն կարող ազդեցություն չունենալ առաջնագծում տիրող իրավիճակի, մասնավորապես հակառակորդի վարքագծի վրա: Սակայն պետք է ընդգծեմ, որ պաշտպանության բանակն ու նրա զինծառայողները չափազանց լրջորեն են գիտակցում իրենց առաքելությունը և պատվով են կատարում իրենց վրա դրված մարտական խնդիրը: Մեր զինվորն իր տեղում է, լավագույնս տիրապետում է Արցախի շուրջ տեղի ունեցող զարգացումներին և պատրաստ է ցանկացած իրավիճակում զսպել, հակազդել Ադրբեջանի ցանկացած քայլ, որը վտանգ կներկայացնի մեր անվտանգության համար: