Ձեր վստահելի աղբյուրը

20։44
Հանրահավաքի հարթակից ներկաներին դիմեց «Ելք» խմբակցության ղեկավար Նիկոլ Փաշինյանը: Նա նշեց՝ հայ ժողովուրդը, ՀՀ քաղաքացին հաղթել է, և հաղթել է անվերապահորեն, և դա արձանագրելով՝ ինքը ցանկանում է ասել, որ ՀՀ քաղաքացին և հայ ժողովուրդը այլևս երբեք չեն պարտվելու, և հաղթանակը լինելու է մեր ժողովրդի մշտական ուղեկիցը:

«Որևէ կասկած չկա, որ այս հզոր և ոգեղեն ժողովուրդը հաղթելու է ԼՂ հակամարտությունը, որևէ կասկած չկա, որ այս հզոր ժողովուրդը հաղթելու է կոռուպցիային, աղքատությանը, որևէ կասկած չկա, որ այս ժողովուրդը հզոր հաղթանակներ է տանելու տնտեսության բնագավառում, որ հզոր այս ժողովուրդը դադարեցնելու է դեպի արտերկիր իր քայլարշավը, և սկսվելու է մի մեծ երթ աշխարհի բոլոր անկյուններից դեպի սիրելի, երջանիկ հայրենիք»,- ասաց նա:

Փաշինյանն ընդգծեց՝ այսօր ՀՀ քաղաքացին ուղղել է իր մեջքը, ամուր կանգնած է իր ոտքերի վրա, նրա բազուկներն ու միտքը հզոր են, նա վստահ հայացքով նայում է իր ապագային: Նրա խոսքով՝ այսօր ՀՀ քաղաքացիության ինստիտուտը հաղթանակել է, և այդ հաղթանակը անշրջելի ու երաշխավորված դարձնելու համար կա միայն մի ճանապարհ, այն է՝ ժողովրդի թեկնածուին ՀՀ վարչապետ ընտրելը:

«Ելք» խմբակցության ղեկավարը նշեց՝ եթե կա մի ճանապարհ, որը չի կոտրելու ՀՀ քաղաքացու հաղթանակը և հաղթանակի զգացողությունը, ապա ինքը կհրաժարվի այս հայտարարությունից, բայց քաղաքական պատասխանատվությունը և պահի լրջությունը ստիպում են արձանագրել հետևյալը՝ ժողովուրդը հաղթել է, և նրա հաղթանակը պետք է «դե-յուրե» նաև մայիսի 1-ին ԱԺ-ում տեղի ունենալիք ընտրություններում:

«Սա ուրիշ Հայաստան է, սա հաղթանակած քաղաքացու Հայաստանն է, հաղթանակած սիրո, հաղթանակած միասնության Հայաստանն է»,- ասաց նա: 

Փաշինյանը հայտնեց, որ Հայաստանը հավատարիմ է մնալու իր ստանձնած միջազգային պարտավորություններին:

«Մենք ՌԴ թշնամին չենք, բայց առավել ևս մեր սեփական երկրի թշնամին չենք, որ մեր երկիրը տանենք ոչ խելամիտ և արկածախնդիր ճանապարհներով»,- ասաց նա՝ հավելելով, որ իրենց իշխանության գալուց հետո աշխարհաքաղաքական ռևերսներ չեն լինելու:

«Մենք երբեք չենք ասել և չենք ասում, որ Հայաստանը պետք է դուրս գա ՀԱՊԿ-ից: Հայաստանը կմնա ՀԱՊԿ անդամ, որովհետև դա բխում է ՀՀ ազգային շահերից: Բայց մենք նաև կաշխատենք, որ այդ կազմակերպությունը ավելի արդյունավետ լինի և շատ ավելի լուրջ երաշխիքներ ապահովի ՀՀ և ԼՂՀ համար, քան ապահովում է մինչև հիմա»,- ասաց նա:

Փաշինյանը նշեց՝ իրենք այս հարցերի լուծումը չեն պատկերացնում հակամարտության տոնայնությամբ, սրանք համբերատար, խաղաղ, գործընկերային աշխատանքի հարցեր են: Հայաստանն, ըստ Փաշինյանի, հավատարիմ կմնա նաև ԵՄ հետ կնքած համաձայնագրին և ԵՏՄ հետ ստորագրված պայմանագրին, սակայն դա չի նշանակում, թե իրենք համարում են՝ երկու ուղղությամբ էլ ՀՀ համագործակցությունն անթերի է:

«Մենք պիտի ձգտենք այդ հարաբերությունները դարձնել անթերի, և ես համոզված եմ, որ այսպիսի հզոր ժողովրդի աջակցությամբ մենք դա անպայմանորեն և անխուսափելիորեն կանենք»,- ասաց նա:

Քաղաքական այս իրավիճակն, ըստ Փաշինյանի, ունի մեկ լուծում՝ ԱԺ բոլոր խմբակցությունները համաձայնությամբ ՀՀ վարչապետի թեկնածու են առաջադրում ժողովրդի թեկնածուին, և մայիսի 1-ին նրան ընտրում են ՀՀ վարչապետ: «սա իրավիճակի միակ ճանապարհն է, մնացած լուծումներն ավելի են խորացնելու ճգնաժամը, և հրապարակներում հավաքված հարյուր հազարավոր քաղաքացիների թիվը հասնելու է միլիոնների»,- ասաց նա:

Պատգամավորը նաև ընդգծեց՝ մարդիկ դուրս են եկել ոչ թե հանուն Նիկոլ Փաշինյանի, այլ իրենց իրավունքի, ազատության, արժանապատվության համար:
հանրահավաքն ավարտվելու է երթով: Նա հիշեցրեց՝ ուղիղ 28 օր առաջ հենց այս հրապարակից է սկսել իր պայքարը և համոզված է եղել հաղթելու է:

20։13
«Ելք» խմբակցության անդամ Սասուն Միքայելյանը շարքային գյումրեցուն դիմելով՝ նշեց. «Շնորհակալություն քեզ, քո թասիբին, քո պայքարին»:

Նա ասաց, որ արդեն երկար տարիներ պայքարող, երբեք չհուսահատվող, չընկճվող գյումրեցիները մշտապես շարունակել են այդ պայքարը:

«Մենք պայքարում ենք ոչ թե իշխանության, այլ մեր թասիբի, մեր նամուսի, մեր հաղթանակի համար: Այսօր ժամանակն է ընդամենը երեք-չորս օր կանգնել, կռել այդ հաղթանակը, ամեն մեկս պարտավոր ենք մեր բաժին բեռը վերցնել»,- ասաց նա:

20։05
Դերասան Հայկ Մարությանը նախ նշեց, որ այսօր պատահաբար պարզել է՝ արմատներով գյումրեցի է : Մարությանը նշեց՝ որպեսզի արդեն իսկ ձեռք բերված հաղթանակը լինի վերջնական, ևս մեկ քայլ կա՝ անելու, այն է՝ ազատ, արդար և թափանցիկ ընտրություններ: «Իսկ դրա համար պետք է ունենանք մեր ժողովրդական թեկնածուն»,- ասաց նա:

Մարությանը հիշեցրեց՝ այս շարժումն աշխարհի ամենախաղաղ շարժումն է, որին ի պատասխան հանրահավաքի մասնակիցները ձեռքերը վեր պարզեցին:

19։56
Դերասանուհի Արսինե Խանջյանը նշեց, որ դժվարանում է բառերով արտահայտել իր ապրումները:
«Ես այսօր այստեղ եմ պարզապես, որ մարմնիս վրա զգամ այն գործը, որ արել եք»,- ասաց նա: Խանջյանը նշեց, որ Սփյուռքը միշտ գիտակցել է՝ պետք է մասնակցել Հայաստանի ներքին կյանքին, սակայն չի իմացել մասնակցության ճիշտ ճանապարհները:
«Ոչ թե մենք պետք է այդ փոփոխությունը բերենք, այլ այսօր դուք եք որ կարող եք հաղթել ու փոփոխություն բերել: Նիկոլ Փաշինյանը ձեզ պարզապես ուղղություն տվեց»,- ասաց նա:

Խանջյանը ողջունեց անկախությունը մարդկանց հոգիներում, կամքում, հավատքում, նշեց, որ կարևորը ազատ, անկախ Հայաստանն է:

19։35
Ողջունելով հանրահավաքի մասնակիցներին՝ «Իմ քայլը» նախաձեռնության անդամ Դավիթ Սանասարյանը նշեց, որ այլևս չկա ատելություն, կա միայն սեր՝ ժողովրդի, երկրի, մարդու հանդեպ:
«Այդ սերը քայլ առ քայլ, կաթիլ առ կաթիլ հանդիպել է բոլորիդ, բոլորից ստացել է սեր, դարձել մեծ ալիք, սրբել-տարել այն փոքր ատելությունը, որ մնացել էր մեր երկրում»,- ասաց նա:

19։26
Գյումրիի Վարդանանց հրապարակում մեկնարկեց «Իմ քայլը»նախաձեռնության կազմակերպած հանրահավաքը: Գյումրիում է նաև կանադահայ դերասանուհի Արսինե Խանջյանը: Հանրահավաքի մասնակիցները «Ելք» խմբակցության ղեկավար Նիկոլ Փաշինյանին ընդունեցին «Ողջույն, Նիկոլ», «Նի-կոլ, վար-չա-պետ» կոչերով, «Նիկոլ, Գյումրին քեզի սիրե գը» և այլ պաստառներով:

Գյումրու ժուռնալիստների «Ասպարեզ» ակումբի նախագահ Լևոն Բարսեղյանը հանրահավաքի մասնակիցներին հորդորեց չթուլանալ, չհոգնել և շարունակել պայքարել իրենց ազատությունների և արժանապատվության համար:

«Տարակույս չունեմ, որ մենք ունենալու ենք մեր ազատ և արդար Հայաստան»,- ասաց նա: